MISE 6 - Tupuri Bible

Manwur ʼwaa ge war ne jar ɓen wo ti

¹ Laa we fen maga Manwur wããn so : Ur go ciŋ ma woge ti kiida pel húulì wo, Day ngel ma de farge ciŋ mo laa wo gẽẽge ɓo!

² Nday húulìn wo, nday dog tamsir ma tum wo no, Laa we re kiida mani Manwur no! Werga Manwur yaŋ de re kiida de jar mani ɓen wo, Á da yiŋ kiida de Israyel wo.

³ Nday jar ɓi no, ndi hay joŋ nday de mayla? Ndi hay gay nday de mayla? Yiŋ we jag ne ndi ɗala!

⁴ Werga ndi hay laa nday le go ɓil sir Ejipte, Ndi hay yãã nday le go jag gebee no, Day ndi raw laa Moyis, Aaron wo de Mariyam ne nday pele.

⁵ Nday jar mani ɓi no, fer we ɗig ti ti fen maga Balag waŋ Mohab hay ɗig ne, Ti fen maga Balaam je ni Beworn hayn fern ne hẽn mo ɗala. Ɗig we ti ti maga nday hoo le Sitim hãã nday a go Gilgal mono, Nen maga nday mo ko de el maga Manwur joŋ ra see jar mono.

Fen maga Baa dan mono

⁶ Ndi wo ge ooge pel Manwur noga ndi leʼ ge monɗra pel Baa ma ciŋ hãã nà de mayse doo la? Ndi wo ge ooge pel ɓe nà de siigi jag maga à roɗ mo ɓen go ɓuy mo yaw, Noga de weere deere ma kiŋgi boŋ boŋ wo doo yawla?

⁷ Manwur yãã ge mbe doo ɓi yaŋ de gamlaare ma ngaɓan wo, Noga de noo maga yuu doo pyewre wo no mo yawla? Ndi hã ge jag wel ɓin go ti debaycõõre ɓi no Noga mbarga ma de ɓil ɓin go ti ɓlagge ɓin yawla?

⁸ O ndo je tabay no, à hay kaŋ nen ɓo we ti fen ma de el no. Fen maga Manwur wiin doo ɓo diŋ ga ndo mo joŋ fen ma de deele, Ndo mo da diŋ fen ma ti faage ɓe no Day ni ndo mo fer ti ɓo gesiŋ pel Manwur ti seele ɓo no.

Manwur de re de jar hramn wo no

⁹ Gẽẽge Manwur wo de ʼwaa ɓay ne ɓi leege no, Day je ma de ko reen diŋ je maga hẽẽ ɗúu ɓen mono. Coʼ we sug re bonn wo de je maga ɓoʼn le mono!

¹⁰ Horog hram po noga mundoore ma klee ma joŋ nen jar de hram po Yaŋ mbe wo liŋ ni je hram ɗa pa yawla?

¹¹ Ndi joŋ ge mbi yaŋ bay cerge de maga ndi de mo ma far klew hram doo ɓi, Noga de klew ma jãɗ jarn ɓil ndar ɓin mo yawla?

¹² Jar horog ma ɓi leegen wo go de bag ɓil de koŋne ɓil no. Jar ma ɓil ɓen car wo diŋ geteʼ sagsage, Trum ɓaara le ɓil jag ɓaara jãɗ diŋ jar jãɗge tawa tuu.

¹³ Diŋ wersen ndi kaŋ ge bon yaŋ mo ti, Ndi ɓlag ge ndo yaŋ go wer ɓlagge ɓon wo.

¹⁴ Ndo re ge yaŋ day ndo wùu gi gà Day sen mokay prẽd ge ɓiiri yaŋ mo. Fen maga ndo da ɗogge ɓe ɗog ge doo ɓo gà. Fen maga ndo laa ge sen go ciŋ ndi kaŋ ge moslam yaŋ go ne hẽn ti.

¹⁵ Ndo, ndo joʼ ge yaŋ, day ndo ween ge gà. Ndo, ndo hãã ge leʼge koo Olifiye yaŋ ti hãw, Day ndo yuu gi noo ɓe gà. Ndo hãã ge bii tlalum yaŋ, Day ndo jo ge yii ɓe ma de leʼgen jag ɓo gà.

¹⁶ À de lagge nà diŋ ti jag liŋgi ma de yerge mani Omrin wo, Ti faage seele ma liŋ ni Akabn ɓuy tuu. Nday see nà diŋ ti bagge yaŋ ɓaaran wo. Diŋ wersen ndi kaŋ ge wer ɓo yaŋ go tawge, Ndi kol ge jar ma ɓil ɓon wo yaŋ go diŋ fen feg ti, Day sõõre jar mani ɓin joŋ ge nà ti ɓay.