MISE 5 - Tupuri Bible

Betlehem, biŋni sir waŋ no

¹ Day ndo Betlehem Efrata no, Ndo maga klee yoo moobe ma Judan wo mono, Je ɓi maga joŋ ge waŋ ti sir Israyel kal ge le go nà ni ɓo. Wer ɓe le ti wur ma ɓaa baan wo, Le ti naw ma kal wãyriŋ ma hon wo layblaʼ wo le hãã.

² Diŋ wersen á tob ge ra yaŋ go hãã wo go ti wur Maga wãy maga hay nen biŋgi biŋ go ɗa. Day hẽẽre ɓe maga gwaʼ ge wo mono, Sen fer ge wo yaŋ le see jar ni Israyeln wo.

³ Á oo ge yaŋ pele, Nday koɗ ge ra yaŋ diŋ de egre mani Manwur no, Diŋ de kluu ɗúu mani Manwuri, Baa ɓe no. Á lag ge wo yaŋ go flãy werga à togoɗn ge yaŋ wo go ti jag sir tawge tem tem.

⁴ Á de see ɓe tuu joŋ ge yaŋ diŋ jam no. De maga je Asirin a ge we ɓil sir naa no, Day kal ge we le go ɓil ngel kluu naan wo no, Naa laa ge jar koɗge wo ne hẽn ti renam, Naa kaŋ ge waŋre ma yoo jarn wo ne hẽn ti nenmaʼa.

⁵ A wãã ge wo wããre sir Asiri ge de moslam, Kol ge wo go waŋre sir mani Nimrodn wo liŋ ni ɓe ni tuu. Doo kay no so no, se yãã ge naa go doo je Asirin de maga á a ge we ɓil sir naa no, Day kal ge we le ɓil tway naa mono.

Jar Israyel maga gwaʼge wo mono

⁶ Te jar ni Jakob maga gwaʼ ge wo yoo wer jar ngaɓa joŋ Joŋ ge wo yaŋ doo meebe maga Manwur ɓoʼn nono, Doo bii maga fuɗ ti fíi ga wii wer ne je tabay gà lay, bay nen doo jar tabay wo wa lay nono.

⁷ Jar ni Jakob maga gwaʼ ge wo yoo wer jar wo Noga yoo jar ma ngaɓan wo mono, Sen joŋ ge wo doo mingir yoo nàyre ma yooway wo nono, Doo wel mingir ɓi kaw fǐiri wo nono. De maga á hee no kay à kii ti doo ɓe hiiri, Se crag jar mbe hãy, Day je yãã jar go doo ɓe joŋ ge gà hase.

⁸ Maŋ doo ɓo ciŋ see jar giŋ mogen wo, Daga jar hee ɓon mo taw wo ɓuy!

Deŋ we see ɓay see ngel de koɗn wa

⁹ Wããre ma jag Manwurn ga : Ti wur sen mono, ndi caa ge wer piiri ɓo ma liŋ ni ɓon wo go, Ndi ɓlag ge pus durgi ɓon wo yaŋ go.

¹⁰ Ndi caa ge wer ɓi leege ma ɓil sir ɓon wo yaŋ go. Ndi mbug gi ngel ɓo ma de ɓod kor ma de egre kiŋkiŋ tin wo yaŋ go.

¹¹ Ndi caa ge wer halge ɓon yaŋ go mo doo, Day je joŋ sogway joŋ ge ni ɓo gà so hase.

¹² Ndi caa ge wer sõõre ɓon wo de fodo ɓo mani ɓon wo yaŋ go, Day ndo leʼ ge monɗra pel mopo maga ndo joŋn de doo ɓo gà so hase.

¹³ Ndi yee ge nen koo maga ndo coʼn ne sõõ Asera ni ɓo yaŋ go, Day ndi ɓlag ge ɓi leege ɓon wo yaŋ go lay.

¹⁴ Ndi saʼ ge hee see ɓi ge go diŋ de bagge põõ Wo de sõõge ɓil ne wer jar maga hay day wo coʼ sug gà ti.