MISE 4 - Tupuri Bible

Manwur fer ge ʼwũy Jerusalem

¹ Wo ge go dayge ti wur ma blam tawn mono, Húulì maga tiŋ mani Manwurn ti ɓe joŋ ge yaŋ go ciŋ ti tipẽẽge ti húulì wo. Á naa ge ti yaŋ go ciŋ de daŋ ngel ma de gẽẽren wo ɓuy, Day wer jar lwaʼge wo yaŋ le ma age ti ɓe.

² Wer jar wo ge wo yaŋ ni debaŋ debaŋ, Day wãã ge wo yaŋ ga : A we le, naa ɗii we ti húulì mani Manwur no, Wo ɓil tiŋ Baa mani Jakob no, Nen maga á mo had naa de faage ɓen wo, Day naa see ge yaŋ ti faage ɓen wo. Werga, jag liŋgin kal le go nà Siyoŋ, Day wããre mani Manwurn a ge le nà Jerusalem.

³ A joŋ ge diŋ je cag re ma ti holaŋ wer jar wo ngaɓa, Diŋ je blaw wer jar ma de egre maga wo wo go hãã hãã mono. Á tor ge wo saŋ soŋre ɓaaran wo ge go de moslamre ɓaaran wo, Á tor ge wo saŋn wo ge go de jawre ɓaaran wo. Wer jar po hoo ge wo moslamre wo ciŋ see jar tigriŋ wo gà so lay, Day à hadge jar de durgi gà so lay.

⁴ Á lag ge wo yaŋ go liŋ ni ɓaara, Wosela ɓuy go ɓil pay tlalum ɓe, Go wer koo hõõ ɓe. Je ma duɗ rage joŋ ge gà hase, Werga, jag Manwur Pantway hay wããn go.

⁵ De maga wer jar ma hon wo la ɓuy Noga jar ma hon wo la ɓuy see wo ti ɗúu baa ɓaara mono, Wùr ma wùrn wùr see tum ti ɗúu Manwuri, Baa wùrn lay, hãã wo sagsage.

Manwur joŋ ge diŋ waŋ jar ɓen wo

⁶ Wããre ma jag Manwurn ga : Ti wur sen ni mono, Ndi fer ge yaŋ yãã waare wãy ma leŋ no, Ndi fer ge yaŋ tayge de maga à hay niin wo go Ga ndi hay joŋ bon ɓe mono.

⁷ Ndi kol ge wãy ma leŋ yaŋ diŋ je ɓi maga gwaʼ ge mono. Ndi kol ge maga à caa nen ɓe go yaŋ diŋ wer jar ma de egre wo. De sen ni Manwur joŋ ge diŋ waŋ ɓaara ma tum Wo ciŋ ti húulì ma Siyoŋ no.

⁸ Day ndo ma ɓon kaw horog no, Ndo Ofel mani may ma Siyoŋ no, Ndo fer ge yaŋ daʼ kluu ɓo ma taŋgu no, Sir waŋn joŋ ge yaŋ diŋ ma may ma Jerusalem no.

À yãã ge Jerusalem go jag bon no

⁹ Wer mayse ga ndo ʼwad war patala la? Waŋ ɓo bay wa so has yawla? Je bag yaŋ ne ndon yee go, kol go maga bon daʼ mo go Doo wãy maga de biŋgi no so yawla?

¹⁰ Ndo may ma Siyoŋ no, ndum mbo, Tor-ãy mbo doo wãy maga de biŋgi no so no! Werga ndo men ge ɓi leegen ge go, Day ndo laa ge tiŋ ɓon yaŋ wo go ɓil payre wo. Ndo raw ge yaŋ wo go hãã Babilone, Day à fer ge le yãã ndo le nà ni. Manwur fer ge coo ndo le doo jar hee ɓon wo le nà ni.

¹¹ Ma patalam no, wer jar wo ngaɓa wo le go de tayge ma leʼ ndo yaw. Á wo le de wãɗge ga : Siyoŋ go de glubgi, Nen wùr wo de kaŋ ge nà diŋ ti ɓe.

¹² Ama wer jar sen bay wo de ko fen maga Manwur le de ɗiggi ɓe mo wa. A bay wo de laa wer fẽẽre maga á de ɗig rage ma joŋ ge mo wa. A bay wo de daʼ wer ɓe ga á tay saara le nà ma ɓum saara go doo coore ma ti yããge no wa.

¹³ May ma Siyoŋ no, ur mbo ciŋ dag jar ti so! Ndi hee ge cõõ ɓon yaŋ mo ti, Ndi her ge ɓaale boo dob yaŋ mo ti ma ɓo no, Day ndo ndreɗ ge wer jar ma ngaɓan wo yaŋ go. Fẽẽre ɓaara maga nday horge ge ra mono, Nday lag ge ra yaŋ go ti nen ne Manwur. Horog ɓaaran joŋ ge wo diŋ ma Waŋkluu ma wãã wããre tamsir ɓuy no.

¹⁴ Patala ndo may ma de jar durgi ti no, Tay soode ɓon wo go! À go de cir ti naa yaw, À go de mbar je car kiida ma Israyeln de graw plaŋngã yaw.