MISE 1 - Tupuri Bible

¹ Wããre maga Manwur hay wããn ne Mise je Moresetn ti kal mani Yotam, Akas wo de Esekiyas waŋre ma Judan wo mono. Á diŋ re maga à naa nen ɓe ne hẽn ti Samari wo de Jerusalem mono.

Manwur ruu jar ɓen wo

² Laa we ne, nday wer jar wo ɓuy! Tamsir de fẽẽre ma ɓil ɓen wo ɓuy mo coʼ wo sugi! Waŋkluu Manwur de ʼwaa war ne nday ti pel kiida, A ur gi le nà ti ngel ɓe ma bay ɗagn hãã!

³ Werga Manwur le go de men ngel hayle ɓe no. Á le de cwage, le de seege ne ngel ma de gẽẽre ma ti tamsirn wo ti.

⁴ Húulì ngroɓ wo go ɓaale ɓe, Log tos wo go doo keãy pel wùu nono, Doo bii maga ɗe le ti ngel ma de solge nono.

⁵ Sen mo ɓuy nà wer debay yããge jag mani Jakob no, Wer ɓlagge jar ma liŋ ni Israyeln wo! De bay yããge jag mani Jakobn a le nà bay Samari wa yawla? Ngel ma de farge ciŋ ma cor sõõren bay wo nà Jerusalem wa yawla?

⁶ Ndi kol ge Samari yaŋ go diŋ húulì ma de cor ɗugul ne kẽẽ ti wo go ɓil pay wo, Ndi peɗ ge tlalum yaŋ go ni. Ndi tor ge húulì ɓen wo yaŋ wo go ɓil loge, Day ndi men ge wer tiŋ ɓe ma de ɓodgen yaŋ wo go de koɗe.

⁷ À hrag ge fodo ɓe ma de ceɗgen wo yaŋ go ɓuy. À roɗ ge fẽẽre ɓe maga á daʼ ra le de figliw ɓen wo yaŋ go de wùu, Day ndi ɓlag ge sõõre ɓen wo yaŋ go ɓuy. Á hay yeɗ ra le de solay figliw day saara kol ge yaŋ Go diŋ fen ma joŋ figliw tigriŋ pa.

Mise law ti sir Juda

⁸ Diŋ wersen ndi raage yaŋ, ndi law ge yaŋ. Ndi see ge yaŋ go bay taarag ɓaale, go ɓaale koɗe. Ndi raage yaŋ doo wé nono, ndi ndum gi yaŋ doo gii wo nono.

⁹ Werga wããge ma de caa Samarin go diŋ ma tawge ɓe day se go de yaʼ Juda lay. Waŋkluu go de kaŋ ɓaw ne jar mani ɓin wo jag jiŋ, se leʼ wo go Jerusalem tem tem.

¹⁰ Wo we sii re sen ɓi leege Gad wa, wo we rage ɓi leege Ako wa! Wo mbo blulgi go nen sir ɓi leege Bet-Leafra so!

¹¹ Raw mbo glog koɗ nen sõõren so, ndo wãy ma de tiŋ Safir no! Tĩĩ kalge go wa so, ndo wãy ma de tiŋ Saana no! Lawge ma Bet-Haeseln go de maŋ jag ɓe ma caa war ɓo le.

¹² Wãy ma de tiŋ Marodn go de hẽẽne ti re jam ma see ɓe no, Werga re ma caa jarn a le nà see Manwur hãã, Day se wo go hãã jag Jerusalem.

¹³ Ndo wãy ma de tiŋ Lakis no, jag pus durgi ne piiri wo were! Ndo hay kaŋ wer may ma Siyoŋ taŋgu leʼge nen ɓlagge nà diŋ ndo, Werga de bay yããge jag ma Israyeln tĩĩ wo le nà ni ɓo.

¹⁴ Diŋ wersen nday bus gi kããra yaŋ go de ɓi leege Moreset-Gade. Tiŋ ma Agsibn kol ge wo yaŋ go diŋ fen car jiili waŋre ma Israyeln wo.

¹⁵ Ndo wãy ma Maresa no, ndi baa ge je wããre ɓo ma tigriŋ yaŋ le mo. Togoɗge ma Israyeln raw ge yaŋ wo go Adulam.

¹⁶ Cẽẽ ti ɓo go, poʼ riŋ ɓo go wer weere ɓo ma dagen wo! Kroʼ ti ɓo go doo gebeg-mbiiri nono, Werga á wo de rawge ti daŋgay wo go hãã see ɓo mono.