MATIYE 8 - Tupuri Bible

Yeso fãã je cíi go

¹ Yeso le ciŋ ti húulì, á raw ɗii gi le go gesiŋ, jar raw wo maŋ blam ɓe debaŋ.

² Je cíi po raw yaʼ ge le see ɓe, raw leʼ monɗra pel ɓe, raw ɗe ge ɓe ga : Waŋkluu, hayga ndo da we, ndo kãã ma fãã me yaŋ go.

³ Yeso raw coŋ doo ɓe wo, raw duʼ gi ɓe, raw riŋgi ɓe ga : Ndi da we, fãã go so. Cíi bloon raw fããge go ni tuuseŋ.

⁴ Blam sen Yeso raw riŋgi ɓe ga : Ko nen ɓo, siin go ne jobo wa hase. Ama wo wii nen see ɓo ne je kluu siɗ jagn nene, hã fen sii jag maga Moyis hay riŋ ti ɓe ne hẽn ma kaŋ nen jar go ɓuy ga ndo fãã we go.

Yeso pẽẽ wejõõ je kluu soode po go

⁵ Yeso wo kal ge ɓi leege Kapernam mokay, je kluu soode po, soode maga á de wãã re ɓaara wo kisi. Á raw yaʼ ge see Yeso, raw wiigi ɓe ga á mo kay se,

⁶ raw ɗe ge ɓe ga : Waŋkluu, wel ɓi yaŋ le de sayge go gesiŋ liŋ, cege de joŋ coo ɓe debaŋ.

⁷ Yeso raw riŋgi ɓe ga : Ndi wo yaŋ pẽẽ ge ɓe go.

⁸ Ama waŋ sooden raw fer wããre ga : Waŋkluu, ndi bay de kããge maga ndo wo kal ge liŋ ni ɓi wa. Ama wãã mbo de jag ɓo tawa, ni wel ɓin pẽẽ yaŋ go.

⁹ Ndi de see ɓi jar kluuri ɓi yaŋ wo, ndi diŋ je kluu soode maapo wo lay, ndi wii maapo ga : See, á kal rawge, ndi raw riŋ ma baapo pa ga : A le, á raw age. Ndi raw riŋ wejõõ ɓi po ga : Joŋ fen ma kay no, á raw joŋge ɓe.

¹⁰ Yeso wo laa wããre bloon mokay raw ngrisgi, day raw riŋ jar ma wer ɓen wo ga : Ndi de riŋ nday kidolgi ga ndi bay de daʼ te hãge see se ma kay mokay ne ndi ti boŋ no wa ɗa hase, hay bo le yoo jar Israyel wo draʼa.

¹¹ Ndi de riŋ nday cwãy ga jar debaŋ a ge wo yaŋ le nen were, á wo yaŋ le nen wur bolaw, day lag ge wo yaŋ rege ɓiŋ Abraham, Isag wo de Jakob ti twaywaŋ ma ciŋ no.

¹² Ama jar maga hay wo nen lagge ti twaywaŋ mani Baan diŋ saara, à nii rage go siigi nen suŋgu ragge, so saŋ ɓaara wo ni.

¹³ Blam sen Yeso raw riŋ waŋ sooden ga : See mbo liŋ, á joŋ yaŋ mo doo ga ndo hã ɓil ɓo ne ndi nono. Wel waŋ sooden raw pẽẽ ge go de wur sen degaʼ tuu.

Yeso pẽɗ jar cege wo go debaŋ

¹⁴ Yeso raw ferge wo liŋ ni Piyer. Á raw daʼ mannee Piyer de suuli ti ɗeere de cege, see ɓe leɗ wùu.

¹⁵ Á raw duʼ doo ɓe, see ɓe raw wooge tuu, á raw urgi go ciŋ joŋ rege ne Yeso.

¹⁶ Wur wo go coŋge mokay, à raw age de jar maga wo de sõõre ti ne Yeso debaŋ, Yeso raw niɗ sõõren wo go de wããre ma jag ɓe tawa tawa, pẽɗ jar cegèn wo go ɓuy lay.

¹⁷ Re sen raw leʼ ge go ti jag wããre maga Esay je ndar nen wããre ma jag Baa go hay siin go ga : Á diŋ bloo se maga yãã re de hugli naa jar téebeere wo go see ɓe, kol cege naa jar téebeere wo go ti ɓe mono.

Jar po da wo ga saara maŋ blam Yeso

¹⁸ Yeso wo ko ngaɓan wo go de yiŋ ti ɓe mo cwẽẽ deŋ, á raw riŋgi ga saara mo cegaɗ go faale maarog ɓaŋla.

¹⁹ Je ma pel jar had jar de wããre Baa raw ɗege ɓe ga : Waŋ, ndi da ga ndi maŋ blam ɓo ti ngel maga ndo wo ge ni mo ɓuy no.

²⁰ Yeso raw fer wããre ne hẽn ga : Baygama yaŋ wo de tuu ɓaara, dweere yaŋ wo de tiŋri ɓaara, ama ma Wel je Tabay bay de ngel suuli ma ig see ɓe draʼ wa.

²¹ Jobo ma tigriŋ yoo jar ma wer ɓen wo pa raw ɗe ge ɓe ga : Waŋkluu, hã faage me ga ndi mo wo tee pan ɓi le go ɗa.

²² Yeso raw fer wããre ne hẽn ga : See ɓon le diŋ wer ɓi, men húulín wo ter húulí ɓaaran wo.

Yeso dig leege ga á mo fĩɗ wa

²³ Yeso raw ɗiigi ɓi daage, jar ma wer ɓen raw wo maŋ blam ɓe lay.

²⁴ Ko la leege po raw urgi le ciŋ ti maarogn de hãã debaŋ, hãã kaŋngaw biin leʼ go vbum daage no, Yeso ɓen ti naa.

²⁵ Jar ma wer ɓen raw wo yaʼge see ɓe, pũyn wo go, raw wo ɗe ge ɓe ga : Waŋkluu, yãã wùr go ɗa la. Naa go de taw ge.

²⁶ Yeso raw fer wããre ne hara ga : Nday joŋ hẽẽne le la? Nday bay go de hã ɓil ɓay me sog wa debaŋ. Á raw urgi ciŋ raw car põõ ne leegen wo de biin de egre, á raw wo lagge go seɗem.

²⁷ Jar raw wo ngrisgi ɓuy, á raw wo wii kããra ga : Sen diŋ je may ga leege wo de bii yãã wo jag ɓe lay ɓuy mo ɓa?

Jar po wo ɓog Yeso niɗ sõõre go ne hara ti

²⁸ Yeso wo cegaɗ ge go faale maarog ɓaŋla ɓi sir jar Gadaren wo mokay, jar po wo ɓog raw wo laage le go yoo tipaale wo, raw wo caa pel ɓe. Jar sen wo de sõõre ti de hãã debaŋ, jobo hay bay seege ti faage biŋ ɓaara ni draʼ wa.

²⁹ Á raw wo ɗege ɓe kloŋ ga : Yeso, ndo nduu ga ndo joŋ wùr joŋ ge la? Ndo wel Baa no, ndo a joŋ bon wùr taŋgu naw maga á ngaɓn go mo yawla?

³⁰ Gaduuru yaŋ wo wo koɗge hãã tiʼ i.

³¹ Sõõren raw wo wii Yeso ga : Hayga ndo da we ga ndo nii wùr go no, ni ndo laa wùr wo ɓil gaduurun wo wo mo tiʼ no.

³² Yeso raw riŋ rage ga : See mbay. Á raw wo laage go ɓil jar se ɓogn wo, raw wo rawge laage ɓil gaduurun wo. Gaduurun raw wo hoo temge le de ɗeere ti húulìn gesiŋ, laa wo go nen maarog no, hã wo bii go.

³³ Jar koɗ gaduurun raw wo hoo ɗeere wo liŋ, siɗ wããre maga joŋ jar ma ɓog ma de sõõre tin wo.

³⁴ Wersen jar ma ɓi leegen raw wo laage le go caa pel Yeso, á wo wo yiŋgi de ɓe mokay, raw wo wiigi ɓe ga á mo men sir saaran go.