MATIYE 27 - Tupuri Bible

Jar a de Yeso pel Pilade

¹ De jag toŋ crum, waŋre jar ma siɗ jag wo de jar kluuri jar Jwif wo ɓuy, raw wo tay jag ɓaara ga saara mo wo go ʼwar Yeso.

² Á raw wo baŋge ɓe, nduu wo de ɓe ne Pilad goforne no.

Judas ʼwar see ɓe go

³ Judas je ma kaŋ taw Yeso go la wo koge ga reen baa Yeso we mokay, wããre sen raw cege ɓe debaŋ, á raw hoo solay boo ma hwal hwal swaʼn wo le ne waŋre ma siɗ jag wo de jar kluuri jar Jwif wo.

⁴ Á raw riŋ rage ga : Ndi joŋ ɓlagge ti maga ndi hã je maga joŋ ɓlagge gà go ʼwarge mono. Á raw wo ferge ne hẽn ga : Sen maŋ see wùr gà so. Sen diŋ re ma ɓo.

⁵ Judas raw laa solayn wo go ɓi tiŋ Baa, kal rawge hag see ɓe go ciŋ.

⁶ Waŋre ma siɗ jag raw wo hoo solayn ga : Wããre Baa bay de hã faage ma laa solayn mokay yoo solay ma ɓi tiŋ Baa wa, werga á diŋ poɗge cíi.

⁷ Blam sen á raw wo tay jag ɓaara ga saara mo yee pay de solay sen mokay doo je bor pãyre no, ma ter jar ma de koɗ wo ti ngel ni.

⁸ Diŋ wersen ga à raw kaŋ ɗúu ne pay sen ga pay cíi hãã wara mo so no.

⁹ Wersen wããre maga Jermi je ndar nen wããre Baa go hay yern go ga : Á hoo wo solay ma hwal hwal swaʼ no (solay maga ngaɓa jar Israyel tay wo jag ɓaara yeege ɓe de ɓe mono).

¹⁰ Á raw wo hãge ɓe yee pay mani je bor pãyn doo ga Baa Waŋkluu hay riŋ me de ɓe nono. Re sen raw leʼ ge go ti jag ɓe so.

Pilad de wii jag Yeso

¹¹ Yeso raw ooge pel gofornen deŋ, goforne raw wiigi ɓe ga : Ndo mbo diŋ Waŋ jar Jwifn wo ge? Yeso raw ga : Á mbe doo ga ndo wããn mbo nono.

¹² Waŋre jar ma siɗ jag wo de jar kluurin raw wo ɓoʼ ɗee car wããre ne Yeso see blam sen debaŋ, Yeso laa fer wããre ne hara gà has.

¹³ Pilad raw riŋgi ɓe ga : Ɓa ndo bay laa wããre maga á wo de car ge ɓe mo see mo deŋ wa ge?

¹⁴ Yeso laa fer wããre ne hẽn ti maapo ni boŋ gà has ɓuy, hãã Pilad raw ngrisgi debaŋ.

Jar wo ga saara mo ii Yeso go

¹⁵ Ti few Pag tum Pilad de hadge ɓoɗ je daŋgay maga ngaɓan dan wo ga ɓoʼ sen le go, se ɓoɗ sen go ne hara.

¹⁶ Paga ti wur sen ni tuuseŋ, je leɗ faage po yaŋ ti daŋgay ni, à ɗen ga Yeso Barabas.

¹⁷ Pilad raw wii ngaɓa ma de taygen wo so ga : Nday da ga ndi mo ɓoʼ wose go ne nday la? Yeso Barabas yaw, noga Yeso maga à ɗen ga Kris mo yawla?

¹⁸ Werga Pilad go de koge ga á hã wo Yeso go ne se ʼwarge mokay doo huni.

¹⁹ Pilad wo hayge ti paale ma cag wããren mokay, wãy ɓe raw ɓoʼ jobo le see ɓe ga : Kal see ɓo ti re bloo sen mo yeʼ wa, á bay de joŋ re wa hase, werga lwaʼge naa joŋ coo ɓi suŋ la ti re ɓe debaŋ.

²⁰ Waŋre ma siɗ jag wo de jar kluuri jar Jwifn wo ɓuy raw wo jãɗ nen ngaɓan wo ga á mo wii wo Pilad ga á mo ɓoʼ Barabas le go, mo ʼwar Yeso go lay.

²¹ Pilad fer wii rage tigriŋ ga : Yoo jar se ɓog wo mo lag nday da ga ndi mo ɓoʼ ma hon le go la? Á raw wo ga : Diŋ Barabas, Barabas.

²² Pilad raw wii rage ga : Day ni ndi mo joŋ may se de Yeso maga à ɗen ga Kris mo lay la? Á raw wo wãã ge ɓuy ga : Ɓaln go ti koo, ɓaln go ti koo.

²³ Pilad raw wii rage ga : Á joŋ diŋ ɓlagge may no maʼ la? Á raw wo ngar jag de egre ɓaara ɓuy ga : Ɓaln go ciŋ ti koo, ɓaln go ciŋ ti koo.

²⁴ Pilad wo koge ga egre se laa kããge gà so mokay, ngar jagn yaʼ wer lay, á raw maŋ bii yog doo ɓe go pel ngaɓan kaʼ ɓuy ga : Ama ma ɓi dugwaare húulí bloo sen mo deŋ bay ti ɓi wa, sen diŋ re ɓay.

²⁵ Á raw wo wãã ge ɓuy ga : Daga dugwaare húulí ɓe mo leɗ ne wùr ti de weere wùr wo.

²⁶ Blam sen Pilad raw ɓoʼ Barabas go ne hara, raw jwag Yeso de mbreŋ, raw hãge ɓe go ga wo go ɓalge ɓe ti koo.

Soode feg wo ti Yeso

²⁷ Soode Pilad raw wo age de Yeso ɓi tiŋ mani goforne no, sooden wo ɓuy raw wo yiŋ ti ɓe go cwẽẽ.

²⁸ Á raw wo ndar õõbe ɓen wo go, raw wo laa õõbe ma kluu desẽẽ ne hẽn ti.

²⁹ Blam sen á raw wo tãã klaŋ hõõre kaŋ wo ne hẽn ti, raw wo hã graw ne hẽn ti doo ware. Á raw wo lag kõyõgre gesiŋ pel ɓe, mbuɗ wo foo ɓe ga : Wùr hee jag mo, Waŋ jar Jwifi.

³⁰ Á raw wo tuf sããre ne hẽn nene, yãã wo grawn mbar wo ne de ɓe ti.

³¹ De maga á mbuɗ wo foo ɓe go mbuɗ mono, á raw wo naa õõbe ma kluun go, raw wo lag õõbe ma ɓen wo ne hẽn ti, raw wo rawge ɓalge ɓe go ciŋ ti koo ma ɓal jar no.

A ɓal Yeso go ti koo ma ɓal jare

³² De maga á wo laage le go mokay, á raw wo yiŋgi de je Siren po, à ɗen ga Simoŋ, á raw wo maŋ koo maga à de woge go ɓal Yeso ti ɓe ne hẽn ti de waŋ.

³³ Á raw wo dayge ti ngel maga à ɗen ga Golgota, wer ɓe ga ngel Hm Ti.

³⁴ Ti ngel sen ni, saara raw hã yii ne Yeso de tay nen de fen ma glagge ga á mo jo ne. Ama á wo gusgi ɓe mokay, á laa dayge joge ɓe gà.

³⁵ Á raw wo ɓalge ɓe go ti koo no, raw wo ɓes õõben wo go de naage wãywáale.

³⁶ Blam sen á raw wo lagge gorge ɓe ni.

³⁷ Á raw wo yer wããre ma kaŋ nen jar go ti re maga à baan ti ɓe ga : Bloo sen la diŋ Yeso Waŋ jar Jwif wo.

³⁸ Á raw wo ɓal jar leɗ faage wo ti jeŋ Yeso ni ɓog lay, ma la boŋ ti ɓaŋ war ɓe, ma lan ti ɓaŋ gùr ɓe lay.

³⁹ Jar maga see wo ti faage ni, glad wo ti ɓaara ɗar wo ne lay,

⁴⁰ wãɗ wo ga : Ndo bloo je se maga ndo mbug tiŋ Baan go, fer boo ma tigriŋ síilí swaʼ no, yãã see ɓo go de see ɓo sog ne. Hayga ndo yaŋ diŋ wel Baa, yãã see ɓo go jag koo ma ɓal jar no day cwaa le go gesiŋ sog ne.

⁴¹ Waŋre jar ma siɗ jag wo de jar ma ndar wer wããre Baa wo de jar kluurin feg wo ti ɓe doosen no lay, wãɗ wo ga :

⁴² Á yãɗ jar po wo go, day ɓen á kãã ma yãã see ɓe go de see ɓe gà ane? Á nà diŋ waŋ jar Israyeln wo so lay á mo ɗii le go gesiŋ mo men koo ma ɓal jar le go patala, ni wùr hã ɓil wùr yaŋ go ne hẽne.

⁴³ Á raw kaŋ ɗiggi ɓe ti Baa, á raw wãɗge ga se diŋ wel Baa lay no. De ele, wùr ko mo ɗa so, ti ga Baa yaŋ dage ga se yãã ne go patala so layblaʼ no.

⁴⁴ Jar leɗ faage maga wo de ɓalge ti jeŋ ɓe la, ɗarn wo doosen no lay.

Yeso huu go so

⁴⁵ Wur wo dayge ɗeger mono, suŋgu raw ɓoʼge go ti sir krub ɓuy, hãã wo dayge go de wur maga fǐiri ma de law wo go de kos age go liŋ mono.

⁴⁶ De wur sen, Yeso raw ngar jag ciŋ kloŋ ga : Eli, Eli, lamma sabagtani. Wer ɓe ga Baa ɓi no, Baa ɓi no, ndo tob me go le la.

⁴⁷ Jar po wo yoo jar maga hay wo de lagge ni, raw wo laa wããre sen mokay, kal wo wãã ge ga : Á de ɗe Eli.

⁴⁸ Jobo raw ur ɗee deparday maŋ fen kor hãn hee nen feneger, raw saʼge ɓe jag koo coŋ wo ne Yeso ga á mo jo ne.

⁴⁹ Ama jar maapo wo ga : Men eŋ ɗa, naa kon ɗa, ti ga Eli nduu yaŋ go yããge ɓe layblaʼ no.

⁵⁰ Yeso raw ngar jag de hãã tigriŋ pa, blam sen egre ɓe raw hooge go.

⁵¹ De sen ni, õõbe ma de caa nen tiŋ Baan raw ngar ɓil go ɓoge, le go ciŋ kaʼ, hãã go gesiŋ taʼa, sir raw fĩɗgi, húulì raw wo mungi go debaŋ lay,

⁵² tipaale raw wo bulgi go lay, ngaɓa jar mani Baa maga hay huɗ wo go ɓaa fer wo go birgi lay.

⁵³ Á raw wo laage le go ɓi tipaalen wo. Wo dayge blam maga Yeso wo go kalge ciŋ mokay, á raw wo laage ɓi leege Jerusalem, jar po debaŋ ko ra wo lay.

⁵⁴ Je kluu soode wo de soode maga wo de gor ti Yeso de kããra la, wo wo ko fĩɗgi sirn de re maga joŋ mo deŋ, á raw wo caa hẽẽne debaŋ, kal wo wããge ga : Á mbe diŋ wel Baa cwãy.

⁵⁵ Naare maga hay maŋ wo blam Yeso le hãã Galile joŋ peele ne hẽn, hay yaŋ wo ni debaŋ, lag wo koge ɓe wo go wer day lagge.

⁵⁶ Mari ma Magdala, Mari man Jag wo de Josef, de man weere mani Sebeden wo yoo ɓaara ni lay.

Á ɓoʼ Yeso ɓi rum húulì

⁵⁷ Wur wo go coŋge mokay, je horog debaŋ po le ɓi leege Arimate raw age, à ɗen ga Josefe, á de see ɓe diŋ je ma wer Yeso lay.

⁵⁸ Á raw woge see Pilad wii húulí Yeso. Pilad raw hã faage ga hã húulí Yeso ne hẽne.

⁵⁹ Josef raw maŋ húulí ɓe so, raw kuugi ɓe de õõbe ma defay,

⁶⁰ kal rawge ɓoʼ ge ɓe ɓi rum húulì maga se hay cloʼn de see ɓe ti húulì, blam sen á raw legad húulì ma kluu le ma tẽg jag rum húulì no, raw mbe rawge so.

⁶¹ Mari ma Magdala wo de Mari ma lan raw wo lagge pel tipaalen lagge.

Á lag jar gor ti tipaale no

⁶² Go toŋ ɓe wur Saba mokay, waŋre ma siɗ jag de Farisiyẽẽ raw wo de kããra see Pilade,

⁶³ á raw wo ɗege ɓe ga : Waŋ wùr ma de el no, ti wùr fer ɗig wããre je geteʼn ti maga á hay tenen caw ɗa, á hay wãã ga : blam síilí swaʼ se fer yaŋ birgi go.

⁶⁴ Wii jar ga á mo wo wo gor ti tipaalen hãã go wur síilí ma de swaʼ no, nen maga jar ma wer ɓen mo á wo go maŋge ɓe freŋ ma ferge riŋ jar ga : Á fer we go birgi wa. Hayga re sen joŋ we doosen, geteʼ ma blam la daŋ ge ma taŋgu no.

⁶⁵ Pilad raw riŋ rage ga : Hoo we soode mo lag wo no, see we gorge ɓe de el doo maga nday kãã nono.

⁶⁶ Á kal wo rawge so, lẽẽ wo jag tuun go de mopo doo keãy, kaŋ wo lamba ne hẽn ti ma koge ɓe, lag soode wo gorge ɓe lay.