MATIYE 25 - Tupuri Bible

Yeso ngaɓ wããre de mayre po wo hwale

¹ Wersen twaywaŋ mani Baa joŋ de ngaɓ ge de mayre po wo hwale, hoo wo gér doo ɓaara, kal wo rawge caa pel war wãy po le de a ge ɓoʼ wãy ti bii.

² Maapo wo yoo ɓaara dwee, sen bay wo de ko re wa, ma dwee lan wo de ko re lay.

³ Ma se dwee maga bay wo de ko re wa la mono, hoo wo gér ma ɓaaran bay noo ma tigriŋ wer ni.

⁴ Ama ma de ko re ma dwee lan raw wo hoo noo ma tigriŋ ɓi klobo doo ɓaara ni.

⁵ War wãy wo le yõõ ti mokay, mayre ma hwaln wo la nen ɓaara raw joŋ naa, saara raw laa naa.

⁶ Wo dayge gesiɗgi suŋ mokay, ngar jag raw rage le so ga : Coʼ we sug ɓay, war wãy yaŋ le, laa go caa pel ɓe so.

⁷ Blam sen mayre ma hwal raw wo pũygi go, raw wo kneʼ gér ɓaaran wo.

⁸ Maga bay wo de kore wa la, raw wo riŋ ma de koren wo ga : Hã we noo ne wùr meʼ meʼ lay, werga gér ma wùr huɗ wo go.

⁹ Ma de koren raw wo ga : Bay wa, werga á bay nen kãã naa de kããra ɓuy wa, see we wo ɓi tiŋ noo no, wo we yeege ni.

¹⁰ Maga bay wo de ko re wa la, kal wo rawge yee noo so, de sen ni, war wãy raw age lay. Mayre ma dwee maga hay wo go de gragge la, raw wo laage de war wãyn tiŋma so. À raw tẽg jag tiŋ go.

¹¹ Blam sen ma dwee lan raw wo nduugi lay, raw wo ɗe ɗúu ga : Waŋ, waŋ, bul jag tiŋ go ne wùri.

¹² War wãy raw riŋ rage ga : Kidolgi ndi riŋ nday ga ndi bay de ko nday wa.

¹³ Yeso raw wãã ge so ga : Lag we go de pũygi, werga nday bay de ko naw sen noga wur sen wa.

Wããre ma de ngaɓge de jar joŋre ma swaʼn wo no

¹⁴ Á joŋ ge yaŋ de ngaɓge degaʼ doo bloo po ga se raw go raŋ ge. Raw ɗe weere jõõre ɓen wo le, raw hã joŋre fẽẽre ɓen ne hara doo.

¹⁵ Á raw hã solay boo biŋni ne maapo boŋ kis kis dwee, hã ne ma la kis kis ɓoge, raw hãge ne ma de swaʼn kis boŋ lay, wosela ɓuy de ngar egre ɓe. Blam sen á kal rawge raŋ ge so.

¹⁶ Wejõõ ɓe maga daʼ solay boo biŋni kis kis dwee la, kal rawge joŋ trere de solayn tuu, raw daʼ ge wer ɓe ni kis kis dwee pa.

¹⁷ Je maga hay daʼ kis kis ɓog mo lay no, raw joŋge doosen no lay, raw daʼ ge wer ɓen ni kis kis ɓog lay.

¹⁸ Ama je maga daʼ ɓen kis boŋ la, raw tee tuu gesiŋ muu solay pan tiŋ ɓen go ni.

¹⁹ Naw nà go blam sen debaŋ pan tiŋ raw ferge le, raw tĩĩ wer wiɗ weere jõõre ɓen wo ti fẽẽre maga á hay hãn ne hara mono.

²⁰ Wejõõ maga hay daʼ solay boo biŋni kis kis dwee raw yaʼ ge le de solay ma kis kis dwee see ɓe, raw ɗege ɓe ga : Waŋ ɓi no, ndo hay hã solay boo biŋni me wur sen la kis kis dwee. Ko nen ɓo ndi daʼ wer ɓe ni mo kis kis dwee kay pa no.

²¹ Pan tiŋ ɓen raw riŋgi ga : De el debaŋ ndo diŋ wejõõ ma de ele, ndo joŋ re ma de deele de fen ma meʼ mokay, wersen ndi hã ge wããre fẽẽre maga wo de el yaŋ mo debaŋ, see le joŋ fruygi ɓiŋ ɓi.

²² Je maga hay daʼ kis kis ɓog, raw yaʼ ge le blam sen lay ga : Waŋ ɓi no, ndo hay hã solay boo biŋni me wurpo la kis kis ɓoge. Ko nen ɓo, ndi daʼ wer ɓe ni kis kis ɓog mokay pa no.

²³ Pan tiŋ ɓen raw riŋgi ɓe ga : De el debaŋ ndo diŋ wejõõ ma de ele, ndo joŋ re ma de deele de fen ma meʼ mokay, wersen ndi hã ge wããre fẽẽre maga wo de el yaŋ mo debaŋ, see le joŋ fruygi ɓiŋ ɓi.

²⁴ Blam ɓaara ɓuy je maga hay daʼ solay la kis boŋ raw yaʼ ge le lay, raw ɗe ge ɓe ga : Waŋ, ndi de koge ga ndo diŋ je ma de hãã debaŋ werga ndo wer fẽẽre maga ndo bay de joɗ rage wa, ndo car fẽẽre maga ndo bay de ray mbeere ɓaara wa mo lay.

²⁵ Ndi raw joŋ hẽẽne, ndi raw muu solay ɓon nen siri. Ko nen ɓo, solay ɓon mokay no.

²⁶ Pan tiŋ ɓen raw ferge ne hẽn ga : Ndo diŋ wejõõ ma de ɓlagge, ndo je cwããge. Ndo ko ga ndi wer fẽẽre maga ndi joɗ ra gà ndi car fẽẽre maga ndi ray mbeere ɓaara gà lay.

²⁷ De sen ɓuy ndo de hay wo de solay ɓin hãge ɓi baŋke, nen maga ndi wo le ferge mokay, ndi wo maŋ solay ɓin de bii were.

²⁸ Pan tiŋ raw ga : Yãã solay boo biŋni ma doo ɓe ma kis boŋ go, hãn go ne je maga ɓen kis kis hwal mono.

²⁹ Wersen wosela ɓuy maga mo ɓe yaŋ no, á raw hãge ne hẽn ni daŋ ge, day se raw kolge de fẽẽre debaŋ. Ama wosela maga mopo ɓe bay wa, mo maga hay doo ɓe meʼ draʼ á yãã sen go pa.

³⁰ Ama ma wejõõ maga joŋ mopo gà mo deŋ, ɓoʼn wo go siigi nen suŋgu ti ngel maga á rag wo ni, so saŋ wo ni mono.

Caage kiida ma blam taw no

³¹ Ti wur maga Wel je Tabay wo ferge le de gragge de woore de jar peele Baa wo wer wurpo doo Waŋ no mono, á raw hayge ti paale ɓe ma de woore debaŋ no.

³² Jar ma ti tamsir wo la ɓuy raw wo tay ti pel ɓe, á raw caa ɓil jar wo go ɓog, doo ga wel wer ɓẽẽre caa ɓil sããre wo go de fǐiri wo nono.

³³ Raw lag sããren wo ti ɓaŋ war ɓe, ɓẽẽren wo ti ɓaŋ gur ɓe lay.

³⁴ Blam sen waŋ raw riŋ jar ma ti ɓaŋ war ɓen wo ga : A we le ɓuy, nday jar maga Pan ɓi woo we go mono, yãã we twaywaŋ mani Baan maga se kneʼ ne le go ne nday taŋgu joŋge tamsir ɓaa mono.

³⁵ Werga ndi hay koŋne, nday raw hã rege me, ndi hay jwaale, nday hã bii me, ndi hay waare, nday raw yãã mege liŋ ni ɓay.

³⁶ Ndi hay see koɗe, nday raw laa õõbe me ti, ndi hay de cegè day nday hay ko el ɓi debaŋ, ndi hay ti daŋgay nday hay age ko mege ni.

³⁷ Jar ma joŋ re de deelen raw ge wo fer wããre ne hẽn so ga : Waŋkluu, wùr hay ko mo koŋne hun ga wùr hã rege mo la? Wùr hay ko mo hun jwaale ga wùr hã bii mo la?

³⁸ Ndo hay waare hun ga wùr yãã mo liŋ ni wùr la? Noga wùr hay daʼ mo see koɗe hun ga wùr laa õõbe mo ti la?

³⁹ Wùr ko mo hun de cegè noga ndo hay ti daŋgay ga wùr wo ko moge la?

⁴⁰ Waŋkluu raw fer wããre ne hara ga : Kidolgi ndi riŋ nday ga ti fẽẽre maga nday joŋ ne wel po yoo hẽẽre ɓi ma lag wo mo ɓuy no, nday joŋ diŋ ne ndi.

⁴¹ Blam sen Waŋkluu riŋ gi jar ma ti ɓaŋ gùr ɓen wo ga : See we wo go see ɓi hãã, nday jar maga Baa go de faɗ we ge no. See we nen wùu maga huu gà ga de kneʼ ge diŋ ti Manhúulí wo de jar peele ɓen wo mono.

⁴² Werga ndi hay koŋne, nday laa hã rege me gà ndi hay jwaale, nday laa hã bii me gà

⁴³ ndi hay waare, nday laa yãã ndi liŋ ni ɓay gà ndi hay go se koɗe, nday laa dayge laa õõbe me ti gà ndi hay de cegè, ndi ti daŋgay, ko nday ko el ɓi gà.

⁴⁴ Jar sen raw ge wo fer wããre ne hẽn so ga : Waŋkluu, wùr hay ko mo hun koŋne, jwaale, waare, se koɗe, de cegè, ti daŋgay, day wùr hay kay mo gà la?

⁴⁵ Waŋkluu raw fer wããre ne hara ga : Kidolgi ndi riŋ nday, ti re maga nday joŋ wel po ma klee meʼ yoo hẽẽre ɓi ma lag wo de el gà mo ɓuy no, nday joŋ de el gà diŋ ndi lay.

⁴⁶ Blam sen á raw laa rage wo nen bon maga taw gà mono. Ma jar ma joŋ re de deelen wo mo lay no, sen wo ge wo ɓaaran lagge tenen tum lay.