MATIYE 20 - Tupuri Bible

Jobo ga jar mo wo joŋ joŋre ne see ɓi pay, se poɗ ra

¹ Coʼ we sug ɓay, twaywaŋ mani Baan de ngaɓge doo pan pay po maga kal go de jag toŋ crum, kiɗ jar joŋre ɓi pay tlalum ɓe.

² Á raw riŋ rage ga síilí hẽẽ, se poɗ ra solay boŋ boŋ doo poɗge maga à go de caa ge ɓe nono. Á raw laa rage wo ɓi pay ɓen so.

³ Á raw kalge go de moɗay, raw ko jar po wo de lagge de koɗ ti ngel lumo lag bay joŋre.

⁴ Á raw riŋ rage ga : See we joŋ joŋre me ɓi pay ɓin lay. Ndi poɗ we yaŋ ti ngel ɓe de ele.

⁵ Á raw wo rawge ɓi pay no. Je pay kal rawge de wur ɗeger pa, blam sen á raw de wur maga fǐiri ma de law wo go de kos age liŋ, raw riŋ jar sen wo doosen no lay.

⁶ Blam sen á kal rawge de wur maga go de kos leʼ ge gesiŋ, wo daʼ jar po wo de lagge de koɗ lag pa, á raw riŋ rage ga : Nday lag ɓayn la tum tum bay joŋre le ɓa?

⁷ Á raw wo riŋ gi ɓe ga : Werga jobo bay ɗe wùr ti joŋre wa. Je pay raw riŋ rage ga : De ele. See we joŋ joŋre me ɓi pay ɓin lay.

⁸ Wur wo go leʼ ge gesiŋ mokay, je payn raw riŋ je kluu jar joŋren wo ga : Ɗe jar joŋren wo le, hã solay joŋre ɓaaran ne hara, ama tĩĩ wer poɗge diŋ jar maga á wo go blam taw ɗa, wo tawge ɓe hãã go ti maga á wo taŋgu mono.

⁹ Jar maga á wo ɓaaran wur de kos leʼge go gesiŋ raw wo age, á hã solay ne hara boŋ boŋ ɓuy.

¹⁰ Jar maga hay á wo taŋgu ko wo doosen mokay raw wo ɗiggi ga saara daɗ yaŋ daŋ ma jar lan wo, ama á raw hã solay ne hara boŋ boŋ ɓuy lay.

¹¹ Á wo wo yãã solayn mokay, ɓil ɓaara raw sõõ ge ne je payn ti.

¹² Á raw wo wãã ge ga : Jar ma lag á wo go blam taw, joŋ wo joŋre no meʼ koɗ no, ndo raw poɗ rage doo wùr maga wùr sii ti joŋre nen ceg hẽẽ no lay le la?

¹³ Je pay raw riŋ jobo yoo ɓaara boŋ ga : Bar ɓi, ndi bay de jãɗ moge wa, ndo hay go de yãã ãã ti solay ma boŋ nen síilín ga yawla?

¹⁴ Maŋ solay ɓo no, see yaw. Ndi hã ne bloo ma deŋ ga nduu blam taw doo ndo no lay, diŋ doo ga ɓil ɓi dan doosen nono.

¹⁵ Faage bay maga ndi joŋ fen maga ɓil ɓi da de solay ɓin wa yawla? Ndo raw sõõ ɓil wer maga ndi de el mono?

¹⁶ Blam sen Yeso raw wãã ge ga : Jar maga wo go blam jar taw, kol ge wo yaŋ go jar ma pel kããra taw, jar maga wo diŋ jar ma pel jar taw, kol ge wo yaŋ diŋ jar ma blam kããra tawn lay.

Yeso fer dog wããre húulí ɓe pa

¹⁷ Yeso wo raw ge Jerusalem mokay, á raw hoo Jar ma wer ɓe ma hwal ti ɓogn wo go sara, raw riŋ rage de maga saara wo de seege ti faage mo tiʼ ga :

¹⁸ Coʼ we sug ɓay, naa de ɗiigi wo Jerusalem mo tiʼ, à wo la à hã Wel je Táabayn ge go ne waŋre jar siɗ jag wo de jar ma ndar wer wããre Baa wo doo, maga á mo cag wo wããre ɓe ga ʼwar ne go,

¹⁹ hãn ge wo go ne jar maga bay wo ti jag Baa wa doo, jar sen feg wo yaŋ ti ɓe, jwagn wo yaŋ de mbreŋ, ɓaln wo yaŋ go ciŋ ti koo, ama wo day ge wur síilí ma de swaʼa, á fer ge mbe go birgi pa ane.

Man Jag wo de Jaŋ wii Yeso ti weere ɓen wo

²⁰ Man weere mani Sebeden raw yaʼ ge see Yeso de weere ɓen wo, á raw laa kõyõgre pel ɓe wiigi ɓe ga á mo joŋ se de ele.

²¹ Yeso raw riŋgi ɓe ga : Ndo da gahãy ɓa? Wãyn raw ga : Wãã go ga weere ɓin mo lag wo ti ɓo, boŋ ti ɓaŋ war ɓo, lan mo hay ti ɓaŋ gùr ɓo lay, ti ngel maga ndo hay ge we ti Waŋ mono.

²² Yeso raw riŋgi ɓe ga : Nday bay de ko fen maga nday wiɗn mo wa. Nday kãã mbay yaŋ ma joŋ bon maga ndi wo ge jo ge ɓe mokay yaŋ yawla? Á raw wo riŋ gi ɓe ga : Wùr kãã mbe yaŋ.

²³ Yeso raw riŋ rage ga : Nday jo mbay te bon ɓin ane, ama lagge ma ti ɓaŋ war ɓi wo de ɓaŋ gùr ɓin, wãã sen bay diŋ ndi wa. Ngel sen diŋ ma jar maga Pan ɓi kneʼ ne go ne hara mono.

²⁴ Jar ma hwaln wo wo laa wããre sen mokay, ɓil ɓaara raw sõõ ge ne hẽẽre ɓaara ma ɓogn wo ti.

²⁵ Yeso raw ɗe rage le ɓuy, raw riŋ rage ga : Nday yaŋ de koge ga waŋre jar yaŋ wo wãã re jar ɓaaran wo, jar kluurin yaŋ wo kaŋ nen ɓaara ga saara de wãã re ɓaara lay.

²⁶ Ama sen mokay mo joŋ yoo ɓay doosen no wa. Hayga jobo da we ga se mo hay je kluu ɓay no, á mo kol diŋ wejõõ ɓay,

²⁷ Hayga jobo da we yoo ɓay ga se mo hay diŋ je kluu ɓay ma pel jarn no, á mo hay diŋ gebee ɓay.

²⁸ Diŋ wersen Wel je Táabay nduu bay ma ɓoɗ jar joŋ peele ne hẽn wa, ama á nduu ma joŋ peele ne jare, ma tob tenen ɓen go ma pog jar le go debaŋ ti see ɓaara.

Yeso caa nen jar rẽwre wo go ko ge

²⁹ Á wo wo laa ge le go ɓi leege Jeriko mokay, jar raw wo maŋ blam Yeso ngaɓa debaŋ.

³⁰ Jar rẽwre po yaŋ wo de lagge ti jeŋ faage ni ɓoge, á raw wo laage ga de seege diŋ Yeso, á raw wo ngar jag ɗege ɓe ga : Waŋ, wel Dafid no, ko decoo wùr ɗa la.

³¹ Jar ma ngaɓan raw wo ruu rage ga á mo lag wo go seɗem, ama á raw wo yaɗ wer ngar jag yaw ga : Waŋ, wel Dafid no, ko decoo wùr ɗa la, ko decoo wùr ɗa la.

³² Yeso raw ooge, raw ɗe rage le, raw wii rage ga : Nday da ga ndi mo joŋ may ne nday la?

³³ Á raw wo ferge ne hẽn ga : Waŋ, wùr da ga nen wùr mo caa go koge.

³⁴ Á raw wo ko decoo nen Yeso, se raw duɗ nen ɓaara. Ni tuuseŋ nen jar se ɓogn raw wo go caage koge, saaraa raw maŋ blam ɓe lay.