MATIYE 19 - Tupuri Bible

Yeso had jar ga bus naare wa

¹ Yeso wo taw wããre sen go mokay, á raw men sir Galile go, kal rawge ɓi sir Jude maga wo go faale Jurdẽẽ, ɓaŋla mono.

² Jar raw wo maŋ blam ɓe ngaɓa debaŋ, á raw pẽɗ jar cege ɓaaran wo go ni lay.

³ Farisiyẽẽ po raw wo yaʼge see ɓe maga saara mo baan de wããre, raw wo wii gi ɓe ga : Jag liŋgi yaŋ de hã faage ne jobo ga á mo bus mbe wãy ɓe go ti re ɓlagge po ma honla ɓuy yawla?

⁴ Yeso raw fer wããre ga : A go de yerge ɓi kefder ga : Le ti tĩĩ gi wer ma taŋgun Baa je joŋ fẽẽren joŋ je twar wo de wãy.

⁵ Blam sen á raw ga : Diŋ wersen je twar men ge pan ɓe wo go de man ɓe, raw ge tõõge go diŋ see wãy ɓe, á wo ɓog ɓuy raw wo kolge go diŋ hõõgese po boŋ. Nday bay de jaŋ ge ɓe wa yawla?

⁶ Wersen á bay wo go sar sar ɓog wa so, ama á kol wo go boŋ. Wersen fen maga Baa tayn we go boŋ no, je tabay mo blaw ɓil ɓe go wa so.

⁷ Farisiyẽẽ raw wo wii gi ɓe ga : Day wer may ga Moyis riŋ ga wosela leʼ we go bus wãy ɓe, á mo hã kefder ne hẽn doo ma kaŋ nen jar go ga se busn we go mo la?

⁸ Yeso raw ga : Moyis hã faage ne nday bus naare ɓay wo go werga nday bay yãã jag wa has mono. Ama á bay le ti tĩĩ gi wer sirn doosen no wa.

⁹ Ndi de riŋ nday ga : je maga riŋ we ga se bus wãy ɓe go, á mo hay busgi ɓe go diŋ werga á de lengãɗge de jare, bay we wersen wa, day á raw we da wãy ma tigriŋ no, de lengãɗge de wãy jobo nà lengãɗge lay.

¹⁰ Jar ma wer ɓen raw wo riŋ gi ɓe ga : Hayga re je twar wo de wãy ɓe yaŋ wo diŋ doo kayn no, ni ɗawa ɓen da wãy wa.

¹¹ Yeso fer riŋ rage ga : Jar bay de kããge ma yãã wããre sen ɓuy wa. Ama say yãã diŋ jar maga Baa hã egre sen ne hara ma joŋge no mono.

¹² Re yaŋ wo sar sar maga dig jar bay da naare, jar maapo biŋ wo le go ɓil man ɓaara bay ɓay, maapo jar ndar ɓay ɓaara go, ma baapo dig wo see ɓaara wer joŋre Baa Waŋ no. Ama je maga yaŋ de kããge ma yãã wããre sen no, á mo yãã ne mbe.

Yeso tos ti weere kleere wo ga Baa mo wo ra

¹³ Jar raw wo age de weere kleere ne Yeso ga á mo laa doo ɓe ne hara ti, mo tos ti ɓaara lay, ama jar ma wer ɓen raw wo ruu rage.

¹⁴ Yeso raw riŋ rage ga : Men we weere kleeren wo le a ge see ɓi, dig ra we wa, werga wo ge lagge ti twaywaŋ ma ciŋ diŋ jar maga wo doo saara no mono.

¹⁵ Á raw laa doo ɓe ne hara ti, blam sen á kal rawge.

Wejõõ ma de horog debaŋ

¹⁶ Jobo raw yaʼ ge see Yeso raw ɗege ɓe ga : Waŋ, ndi mo joŋ may ma de el maga ndi mo kol wurpo tenen caw tum la?

¹⁷ Yeso raw riŋgi ɓe ga : Wer may ga ndo wii me ti fen ma de el la? Jobo ma de el yaŋ boŋ. Hayga ndo da we ga ndo mo wo kol ge go wurpo tenen caw tum no, ni ndo see wer jag liŋgi no.

¹⁸ Á raw wiigi ɓe ga : Diŋ ma hon wo ne? Yeso raw ga : id húulí wa, lengãɗ de wãy jobo wa, joŋ freŋ wa, caa wããre ne jobo see wa,

¹⁹ hoo sug ti pan ɓo wo de man ɓo, da kan ɓo je tabay doo see ɓo no lay.

²⁰ Wejõõn raw riŋgi ɓe ga : Sen mo deŋ ɓuy ndi yaŋ joŋge doo ga a de wãã gen no, ndi mo joŋ may bo pa la?

²¹ Yeso raw riŋgi ɓe ga : Ndo da we ga ndo mo hay go ti ngel ɓe keɗed no, see wo yeɗ fẽẽre ma liŋ ni ɓon wo go ɓuy, hã solay ɓe go ne jar coo wo, ni ndo wo ge yaŋ daʼ horog ɓon wo wo ciŋ, day see le, maŋ blam ɓi.

²² Wejõõ wo laa wããre sen mokay, á raw caa jiili go debaŋ, kal rawge werga á hay de horog doo debaŋ.

²³ Yeso raw riŋ jar ma wer ɓen wo ga : Kidolgi ndi riŋ we ga je horog debaŋ wo ge kal ge ti twaywaŋ ma ciŋ de gaali debaŋe.

²⁴ Ndi de riŋ weege de wããre ma kay pa ga : Manyoŋyoŋ kal go ti rum paʼdal gus de daŋ maga je horog debaŋ wo kalge ti twaywaŋ mani Baan mono.

²⁵ Jar ma wer ɓen wo wo laa wããre sen mokay, á raw wo ngrisgi debaŋ, kal wo riŋ gi ga : Day ni wose kãã ma daŋ ge yaŋ go la?

²⁶ Yeso raw ko rage, raw riŋ rage ga : Jar tebere kãã wo ma joŋ ge ɓe gà ama Baa kãã ma joŋ fẽẽren ɓuy.

²⁷ Piyer raw ga : Ko nen ɓo ɗa, wùr men fẽẽren wo we go ɓuy, wùr maŋ blam ɓo we, day wùr wo daʼ may so la?

²⁸ Yeso raw riŋ rage ga : Kidolgi ndi de riŋ nday ga ti wur maga Wel je Táabay wo le fer ge hayge ɓi ngel ma defay ti paale waŋ ɓen ma de wooren, nday jar ma hwal ti ɓog maga nday maŋ blam ɓi mo lag la, nday lag ge ti paalen wo cag re wer mani weere Israyel ma hwal ti ɓogn wo no.

²⁹ Day jar maga men ge wo tiŋri ɓaara go, weregeman ɓaara wo, mayregeman ɓaara wo, pan ɓaara wo de man ɓaara de weere ɓaara wo, payre ɓaara wo we go ti re ɓi no, á daɗ wo fẽẽre yaŋ ɓaale kis kisi, day lag wo yaŋ wurpo tenen hãã tum.

³⁰ Ama jar debaŋ maga wo patala diŋ jar ma pel jarn wo, kol ge wo yaŋ go diŋ jar ma blam kããra taw wo lay, jar debaŋ maga wo patala diŋ jar ma blam kããra tawn wo, kol ge wo yaŋ diŋ jar ma pel jar tawn wo lay.