MATIYE 18 - Tupuri Bible

Jar ma wer Yeson wo ga wose yoo saara diŋ je ma pel saaran la

¹ De sen ni tuu jar ma wer Yeson raw wo yaʼge see ɓe, raw wo wii gi ɓe ga : Ti twaywaŋ mani Baan mokay, wose joŋ ge diŋ je kluu ma wãã re jarn ɓuy mo la?

² Yeso raw ɗe wel ma klee le, raw ooge ɓe pel ɓaara deŋ,

³ kal riŋ rage ga : Kidolgi ndi riŋ nday, hayga nday joŋ see ɓay we doo weere kleere wo no gà no, ni nday kãã ge ma laage ti twaywaŋ ma ciŋ gà hase.

⁴ Je kluu ma ti twaywaŋ ma ciŋ diŋ je maga ko see ɓe go de pẽẽre, day joŋ see ɓe doo weklee no mono.

⁵ Je maga yãã weklee po we see ɓe doo kay, werga á diŋ je ɓi no, ni á yãã diŋ ndi.

Yeso de kaŋ nen jar ti ɓlagge ma de hãã

⁶ Je maga kaŋ wer wel po we go boŋ yoo weere ma de hã ɓil ɓaara me we go joŋ ɓlagge no, ɗawa ɓen à mo saʼ man niini ne hẽn soole, à mo basn wo go nen tuu maaroge.

⁷ Re daʼ ge jar maga srog wo wer jar joŋ ɓlagge yaŋ. Re ma srog wer jar go joŋ ɓlagge joŋ yaŋ mbe wo ti kiŋgi wo wo tum, ama re yaŋ ti je maga joŋ re ma srog wer jar joŋ ɓlagge mono.

⁸ Ndo ko we ga doo ɓo noga ɓaale ɓo go de kaŋ wer ɓo go joŋ ɓlagge no, caan go, ɓoʼn wo go hãã, ɗawa ɓen wo mbo kalge ti ngel ma de eln kol ge go tenen caw de ɓaale boŋ noga de doo boŋ daŋ maga à wo ge go ɓoʼ moge nen wùu maga huu gà de ɓaara ti ɓuy mono.

⁹ Ndo ko we ga nen ɓo po go de kaŋ wer ɓo joŋ ɓlagge no, naan go, ɓoʼ ne wo go hãã, ɗawa ɓen wo mbo kalge ti ngel ma de eln kolge go wurpo tenen caw nen boŋ de daŋ maga à wo ge go ɓoʼ moge nen wùu maga huu gà de ɓaara ti ɓuy mono.

Jagjõõ sen Yeso ngaɓ ne de sam po yee go

¹⁰ Koɗ we see ɓay, ɗar we wel po yoo weere ma lag wo boŋ wa. Kidolgi ndi de riŋ nday ga jar peele Baa ma gor ti ɓaaran yaŋ wo de lagge pel Pan ɓi ma ciŋ lag tum. [

¹¹ Werga Wel je Táabay nduu yãɗge go diŋ jar maga wo go de yeɗge mono.]

¹² Nday ɗig gahãyla? Nen naa taʼ ga jobo sããre ɓe yaŋ kisi, day raw yeege we go yoo ɓaara boŋ no, á raw men ma hwal hwal kaawaʼ ti kaawaʼn wo go ciŋ ti húulì ni, raw kiɗ ma boŋ maga yee go mono.

¹³ Ndi de riŋ nday go kidolgi ga á wo le daʼ ge ɓe mokay ɓil ɓe raw joŋge go ti ɓe feh daŋ ma hwal hwal kaawaʼ ti kaawaʼ maga yee wo go gà mono.

¹⁴ Weere ma lag wo mo lag Baa Pan ɓay ma ciŋ da ga maapo mo yee go yoo ɓaara boŋ wa doosen no lay.

Hayga hẽn ɓo joŋ ɓlagge we see ɓo no, ni ndo wo see ɓe

¹⁵ Hayga hẽn ɓo joŋ ɓlagge we see ɓo no, ni ndo wo daʼ ge ɓe de see boŋ tawa ma kaŋ nen ɓe ti ɓlagge ɓe no. Hayga á yãã jag ɓo we, ni ndo daʼ hẽn ɓon we.

¹⁶ Ama Hayga á yãã jag ɓo we gà no, ni ndo baa jobo boŋ noga hoo jar po wo wer ɓo ni ɓog, nen maga wããre sen mo oo de jag jar se ɓog wo, noga swaʼ wo, ti jag wããre maga go de yerge ɓil kefder mono.

¹⁷ Hayga á day we yãã jag ɓaara gà pa no, riŋ Tayge jar ma ti jag Baan wo ɓuy de ɓe, hayga á yãã jag ɓaara we gà pa no, ni kon doo je maga bay ti jag Baa wa, noga doo je tar jar nono.

Diggi wo de bud gi faage

¹⁸ Ndi de riŋ nday kidolgi ga fen maga nday dig ra ge go gesiŋ lam ɓuy, le go de diggi ciŋ doosen no lay. Fen maga nday bud faage ɓaara ge go gesiŋ lam ɓuy, wo le go de bud faage ciŋ doosen no lay.

¹⁹ Ndi de riŋ nday ga Hayga jar po wo yoo ɓay ɓog tay wo jag ɓaara we gesiŋ la wii may layblaʼ de tos ge no, Pan ɓi ma ciŋ hãn ge yaŋ ne hara.

²⁰ Hayga jar po wo ɓog noga swaʼ tay wo we ti ɗúu ɓi no, ndi joŋ yaŋ yoo ɓaara ni lay.

Yeso da ɓen ga wosela mo fug ɓil go ne kẽẽ ti tum

²¹ Piyer raw yaʼ ge see Yeso, kal ɗege ɓe ga : Waŋkluu, hayga hẽn ɓi yaŋ joŋ ndi de ɓlagge, bay menge ɓe wa no, ndi mo dog fug ɓil go ne hẽn ti ɓaale gãyla? Ɓaale renam yawla?

²² Yeso raw ga : Bay wa, ɓaale renam koɗ gà hwal hwal renam ɓaale renam.

²³ Wersen, twaywaŋ ma ciŋ de ngaɓge doo waŋ po maga da ga se wii ɓèere ɓe doo jar joŋre ɓe wo.

²⁴ Á wo tĩĩ wer wiɗ rage mokay, à raw age de je maga solay waŋ ti ɓe pur debaŋ ne hẽne.

²⁵ Bloo sen bay de mopo doo ma poɗ solayn go wa. Waŋ raw ga : See go yee bloon gebee de wãy ɓe de weere ɓe wo de fẽẽre ma liŋ ni ɓen wo ɓuy, ma yaʼ ɓèere sen go de ɓe.

²⁶ Je joŋre waŋ la raw leʼ monɗra pel waŋ kamge ɓe ga : Tem wa ɗa, ndi poɗ mbi ndo yaŋ go ɓuy.

²⁷ Bloon raw ko decoo nen waŋ no, waŋ raw men ɓèeren go ne hẽne, raw ga á mo see mbe so.

²⁸ Je joŋre sen la wo go kalge mokay, raw yiŋgi de kan ɓe maga á wo ti joŋre de kããra ɓuy, ɓèere ɓe ti ɓe nen solay kis boŋ koɗe. Á raw yoʼ ge de kiŋ ɓe, creɗn ngiŋ raw riŋgi ɓe ga : Poɗ ndi go ti fen maga ndo yãã doo ɓi mo ɓuy.

²⁹ Kan ɓen raw leʼ monɗra pel ɓe kamge ɓe lay ga : Tem wa ɗa, ndi poɗ ndo mbi yaŋ go ɓuy.

³⁰ Ama ma ɓen, á laa dayge gà raw de ɓe ɓoʼ ge ti daŋgay yaw, hãã á wo go poɗ ɓèere no.

³¹ Kããre ɓe ma lan wo wo ko re maga á joŋ mokay, wããre sen raw cee rage debaŋ. Á raw wo rawge riŋ waŋ ɓaaran de wããre se no.

³² Waŋ raw ɗe je joŋre sen la le, raw riŋgi ɓe ga : Ndo diŋ je debaycõõre, ndi men ɓèere ma ti ɓon go mo ɓuy wer maga ndo kam me.

³³ Ama ndo de see ɓo, ndo hay nen ko decoo kan ɓon doo ga ndi ko decoo ɓo no lay no.

³⁴ Ɓil waŋ raw sõõge debaŋ, á raw ɓoʼge ɓe ti daŋgay ga á mo joŋ bon hãã á mo wo go poɗ ɓèere sen ɓuy ɗa lay.

³⁵ Yeso raw wãã ge tigriŋ so ga : Hayga nday bay fug ɓil go ti ɓlagge maga hẽẽre ɓay joŋ wo we de ɓe go de ɓil ɓay ɓuy wa no, Pan ɓi ma ciŋ joŋ we ge wurpo doo ga nday joŋ jar lan wo no lay so no.