MATIYE 15 - Tupuri Bible

Hadge moore ɓaaran wo

¹ Farisiyẽẽ wo de jar ma ndar wer wããre Baa raw wo age le Jerusalem daʼ Yeso, raw wo wii gi ɓe ga :

² Wer may ga jar ma wer ɓon bay wo joŋge doo hadge moore naa wo wa la? Á re wo hoole bay yog doo le la?

³ Yeso raw fer wããre ne hara ga : Nday de see ɓay, nday bay joŋge doo jag liŋgi ne wa, nday joŋ diŋ doo hadge ɓay de see ɓay wo no le la?

⁴ Baa wãã ga : Hoo sug ti pan ɓo wo de man ɓo, Je maga yaŋ ɗar pan ɓe wo de man ɓe, à mo ii je sen go.

⁵ Ma ɓay nday had ɓayn ga je maga riŋ pan ɓe noga man ɓe we ga fen maga se hay nen hãge ɓe ne hẽn ma kayge ɓe, se ɓoʼn we go ciŋ ne Baa no,

⁶ je sen bay nen kay pan ɓe mbe wa so mono, diŋ re maga nday ɓlag de el jag liŋgi go, de hadge ɓay wo de see ɓayn wo mo so no.

⁷ Nday jar bag bii jar no, Esay je ndar nen wããre ma jag Baa go hay wãã we go ti ɓay ga :

⁸ Jar sen togoɗ wo ndi diŋ de jag ɓaara tawa, Ama ɓil ɓaara go see ɓi hãã.

⁹ Goŋge maga a goŋ wo me de koɗ koɗe, Werga á had wo jar diŋ hadge wããre jar téebeere wo.

Fẽẽre maga kaŋ wo ɗag ne wosela se

¹⁰ Blam sen Yeso raw ɗe ngaɓan le, raw riŋ rage ga : Coʼ we sug ɓay ma laa wããre sen mokay no.

¹¹ Fen maga kal wo jag wosela raw ɓil ɓe, kãã ma kaŋ ɗag ne hẽn see gà. Say kaŋ ɗag ne hẽn see diŋ wããre maga a le ɓil ɓe, kal le go jag ɓe mono.

¹² Jar ma wer Yeson raw wo yaʼge see ɓe, kal wo riŋ gi ɓe ga : Ndo yaŋ mbo de koge ga Farisiyẽẽ laa wo wããre maga ndo wãã mokay ga ndo mbuɗ diŋ foo saara ge?

¹³ Yeso raw fer wããre ne hara ga : Maysela maga peɗ ra we diŋ Pan ɓi ma ciŋ gà mo ɓuy, à ndar ra ge go.

¹⁴ Men ra we, á wo rẽwre de ɗaw kããra jar rẽwre wo. Day je rẽw ɗaw je rẽw we no, á wo ge wo go laa ge ɓi tuu ɓog ɓuy.

¹⁵ Piyer raw riŋgi ɓe ga : Ɓoʼ wer jagjõõ sen go ne wùr ɗa ɓa.

¹⁶ Yeso raw fer wããre ne hara ga : Nday de see ɓay nday bay de kããge ma laa wer wããre patala wa ɗa pa?

¹⁷ Nday bay de koge ga fẽẽre maga laa wo wo jag wosela raw wo ɓil ɓe, day ẽẽ wo go diŋ glog ɓe wa yawla?

¹⁸ Ama wããre maga sen kal le go jag wosela a le diŋ ɓil ɓe, sen mokay diŋ ma kaŋ ɗag ne je sen see so.

¹⁹ Werga laa le go ɓil ɓe, diŋ ɗiggi ma de ɓlagge wo, maga wo de ɓe id jare, lengãɗge de naare jare, fẽẽre maga bay ti ngel ɓe wa, joŋge freŋ, carge geteʼe, wãɗge ɓlagge ti jar lan wo lay mono.

²⁰ Mokay diŋ fẽẽre maga kaŋ wo ɗag ne jobo see mo so no. Ama rege hoole maga jobo re mbe tuu bay yog doo go taŋgu doo hadge moore ɓay wo no gà mono, sen kãã ma kaŋ ɗag ne jobo see gà.

Wãy jar Kanan po hã ɓil ɓe ne Baa

²¹ Blam sen Yeso raw men ngel sen go, kal rawge ɓi sir maga see Tir wo de Sidoŋ mbaŋ mono.

²² Wãy jar Kanan po yaŋ de hayle ɓi sir sen ni, raw age see ɓe, kal ɗege ɓe ga : Waŋ ɓi no, moo Dafid no, ko decoo ɓi ɗa la. Sõõ de joŋ coo may ɓi debaŋ.

²³ Ama Yeso laa fer wããre ne hẽn gà hase. Jar ma wer ɓen raw wo yaʼge see ɓe wii gi ga : Á bay men ngar jag go ne naa wer wa lay, niin wo go ɗa la.

²⁴ Yeso raw fer wããre ga : Baa ɓoʼ me le diŋ ne sããre jar Israyel maga wo go de yeɗ ge mo tawa no.

²⁵ Ama wãyn raw age leʼ monɗra pel Yeso raw ɗege ɓe ga : Waŋ ɓi no, kay mbo ndi.

²⁶ Yeso raw riŋgi ɓe ga : Ndi mo ɓoɗ hoole weere kleere wo go ne wayre wo mokay sen bay nen ɓi de el wa.

²⁷ Wãyn raw wããge ga : Mbe cwãy doosen nono Waŋ, ama de sen ɓuy, wayre re wo mbaara nen hoole maga leɗ go gesiŋ doo pan tiŋ ɓaaran mono.

²⁸ Blam sen Yeso raw fer wããre ne hẽn ga : De ele, wãy ndo hã ɓil ɓo ne Baa de egre debaŋ. Re sen joŋ yaŋ mo doo ga ndo da nono. May ɓen raw pẽẽ ge go de wur sen ni tuuseŋ.

Yeso pẽɗ jar cege wo go debaŋ

²⁹ Yeso raw men ngel sen go, kal rawge jag maarog ma Galile, raw ɗiigi ciŋ ti húulì, raw hayge gesiŋ.

³⁰ Jar raw age le see ɓe ngaɓa debaŋ, jar leŋre wo, jar rẽwre, jar maga cegè kol de hugli ɓaara go, jar mbululum, de jar cege ma tigriŋ wo debaŋ. Á raw wo lag rage ɓiŋ Yeso, se raw pẽɗ rage go ɓuy lay.

³¹ Jar raw wo ngrisgi debaŋ wer maga á ko wo jar mbululum wãɗ wããre, jar maga cege kol de hugli ɓaara go pẽɗ wo go, jar leŋre seɗ wo, nen jar rẽwre car wo go, á raw wo togoɗ Baa maga jar Israyel goŋ wo mono.

Jar ndar naa Yeso wùu ra de hoole

³² Yeso raw ɗe jar ma wer ɓen wo ga : Jar se deŋ ko wo de coo nen ɓi debaŋ werga naw ɓaara wara wer ɓi swaʼa, á bay wo de rege doo wa so lay. Hayga ndi fer ra we liŋ koŋne no, á yaʼ ge wo go gay ge ti faage.

³³ Jar ma wer ɓen raw wo wii gi ɓe ga : Naa yeɗ hoole ma wùu ngaɓa ma deŋ mo deŋ ti puuli mo taʼ la gen so la?

³⁴ Yeso raw wiigi ga : Hoole doo ɓay gãy ne? Á raw wo ga : Hoole doo wùr renam, weere cẽẽ ti ɓe ni mbag lay.

³⁵ Yeso raw riŋ ngaɓan ga : Lag we gesiŋ.

³⁶ Blam sen, á raw hoo hoole ma renam wo de cẽẽ ma ti ɓen doo ɓe raw joŋ suseʼ ne Baa wo ti hoole no, raw car nen hoolen go, raw hãge ɓe ne jar ma wer ɓen wo, á raw wo ɓesge ɓe go ne ngaɓan wo.

³⁷ Wosela ɓuy wùu go de hoole. Jar ma wer ɓen raw wo bag yããge de nen hoole maga gwaɗ go ni renam pa.

³⁸ Jar maga re wo hoolen, werpiiri wo ndar naa, jobo kee naare wo de weere kleere wo ni gà.

³⁹ Blam sen á raw men faage ne jar wo rawge, raw ɗii daage, kal rawge ɓi sir Magadaŋ.