MATIYE 14 - Tupuri Bible

Herod ii Jaŋ go

¹ Ti wur sen Herod waŋ Galile raw laa re Yeso.

² Á raw riŋ weere jõõre ɓen wo ga : Á diŋ Jaŋ ma joŋ batem jarn fer le go birgi. A daʼ egre ma joŋ fẽẽre mbuɗgi sen wo mo deŋ diŋ wer se no.

³ Werga Herod hay laa jar wo bà Jaŋ baŋ ne ɓoʼ ne ti daŋgay. Herod joŋ doosen wer Herodiyad wãy wegeman ɓe Filipi,

⁴ werga Jaŋ hay riŋ Herod ga : Faage bay de hãge mo ma yãã Herodiyad wãy ɓo wa.

⁵ Herod raw ɗiggi ga se ʼwar Jaŋ go, ama á raw joŋ hẽẽne werga jar Jwif wo de koge ga Jaŋ diŋ je ndar nen wããre ma jag Baa go.

⁶ Day ti wurpo Herod raw joŋ few wur naw biŋgi ɓe, may ma Herodiyad raw dag jõõ pel jar maga à ɗe ra le ti few sen ni mono. Á raw joŋ ɓil go ne Herod feh feh debaŋ,

⁷ hãã se kol haʼ ge go ga : Mayn mo deŋ wii gi may we doo ɓi la ɓuy ndi hãn ge ne hẽne.

⁸ Mayn raw riŋgi ɓe ti jag man ɓe ga : Hã ti Jaŋ ma joŋ batem jar ne ndi ɓi taasa patala.

⁹ Waŋ raw rage de ɓil ɓe debaŋ, ama wer haʼge maga se haʼ go pel jar maga à ɗe ra le mokay, á raw hã faage ga wo hã ti Jaŋ ne hẽne.

¹⁰ À raw ɓoʼ jobo wo caa ti Jaŋ ma joŋ batem jar le go.

¹¹ À raw age de tin ɓi taasa ne may no, á raw hãge ɓe ne man ɓe lay.

¹² Jar ma wer Jaŋ raw wo age maŋ húulí ɓe, raw wo teege ɓe, blam sen á raw wo rawge sii re sen ne Yeso.

Jar ndar dwee, Yeso hã rege ne hara

¹³ Yeso wo laa wããre sen mokay, kal rawge ɗiigi ɓi daage ma woge go hayge ti ngel po fentray ɓe boŋ. Ama ngaɓan raw wo laa wããre ɓe, á raw wo laage le go ɓi leege no, raw wo maŋ blam ɓe de ɓaale ti jeŋ maaroge.

¹⁴ Yeso wo le go ɗiigi ɓi daagen mokay, ko nen ɓe la ngaɓan pel ɓe la hĩf deŋ, jarn raw wo ko decoo nen ɓe debaŋ, á raw tĩĩ wer pẽɗ jar cege ɓaaran wo go.

¹⁵ Wur wo go coŋ ge mokay, jar ma wer ɓen raw wo yaʼge see ɓe, raw wo riŋ gi ɓe ga : Wur go de coŋ ge lay, ngel sen la go se tiŋ hãã lay, men jarn wo raw ge ɓi leege yeɗ fẽẽre rege.

¹⁶ Yeso raw fer wããre ga : Á raw wo we doosen no kay bay de el wa, hã we rege ne hara diŋ nday mbay.

¹⁷ Á raw wo fer wããre ne hẽn ga : Hoole doo wùr la dwee de cẽẽ ɓog koɗe.

¹⁸ Yeso raw riŋ rage ga : A we le de ɓaara me lam no.

¹⁹ Blam sen á raw riŋ jarn wo ga : Lag we gesiŋ ti fíi, raw hoo hoole ma dwee de cẽẽ ma ɓog no, raw maŋ nen ɓe ciŋ raw joŋ suseʼ ne Baa wo ti hoole no. Á raw car nen hoolen go, raw hãge ɓe ne jar ma wer ɓen wo, saara raw ɓesge ɓe go ne jarn wo.

²⁰ Wosela ɓuy wùu go. Jar ma wer ɓen hoo wo yããge le go hwal ti ɓog de bagge de nen hoole maga gwaʼ go doo ɓaara ni mono.

²¹ Werpiiri ma re hoolen wo ndar dwee, jobo kee naare wo de weere kleere wo ni gà.

Yeso see ti maarog de ɓaale

²² Blam sen ni tuuseŋ Yeso raw hoo jar ma wer ɓen wo ɓi daage maga á mo wo wo go faale maarog ɓaŋla taŋgu se de maga se men ngaɓan rawge mono.

²³ Á wo men rage rawge mokay, á raw ɗii gi ciŋ ti húulì tosge fentray ɓe boŋ. Wur wo go coŋge mokay, á mbe wo go ni boŋ yeʼe.

²⁴ Daagen hay go gesiɗgi maarog no, daagen hay gleŋge doo kaŋngaw-bii, werga leegen hay le fidgi pel ɓe.

²⁵ Wo dayge ti roo kag mokay, Yeso raw seege le ti bii de ɓaale ne jar ma wer ɓen wo ti ɗeger.

²⁶ Á wo wo koge ɓe le seege ti biin mo caw, á raw wo joŋ hẽẽne debaŋ, raw wo wãã ge ga : Á diŋ Barkage. Á raw wo laa ngar jag doo hẽẽne.

²⁷ Yeso raw riŋ rage deparday tuu ga : Coɓ we nen ɓay, á diŋ ndi.

²⁸ Piyer raw ɗege ɓe ga : Waŋkluu hayga á yaŋ diŋ ndo no, riŋ me le ga ndi mo see wo see ɓo ti biin caw lay.

²⁹ Yeso raw fer wããre ne hẽn ga : See mbo le. Piyer raw ɗiigi le go ɓi daagen, raw tĩĩ wer seege ti bii ma woge ɓiŋ Yeso.

³⁰ Ama á wo ko leegen mokay, á raw joŋ hẽẽne, raw tĩĩ wer sirgi nen bii tuu, á raw ngar jag ga : Waŋkluu, Waŋkluu yãã me go.

³¹ Ni tuuseŋ Yeso raw coŋ doo ɓe wo cegaw ge ɓe, raw riŋgi ɓe ga : Ndo bay go de hã ɓil ɓo me pah wa has debaŋ. Ndo mbraw ɓon le la?

³² Á raw wo ɗiigi ɓi daagen ɓog ɓuy, leegen raw ooge lay.

³³ Blam sen jar ma wer Yeso ma ɓi daagen raw wo leɗ monɗra pel ɓe ga : Ndo diŋ wel Baa cwãy.

Yeso pẽɗ jar cege wo go ɓi sir Jenesared

³⁴ Á raw wo cegaɗ maarogn go, raw wo dayge Jenesared.

³⁵ Jar ma ti ngel sen ni raw wo go ko Yeso, kal wo dus wããre ɓen wo go ɓi sir ma ɓiŋ ɓen ni ɓuy, à raw age de jar cegè wo ne hẽn ɓuy.

³⁶ À raw wo kam ge ɓe ga á mo men jar cegèn wo mbaara duɗ jag õõbe ɓen tawa. Jar maga duɗ wo õõbe ɓen mo ɓuy pẽɗ wo go.