MATIYE 11 - Tupuri Bible

Jaŋ laa jar wo see Yeso

¹ Yeso wo taw wããre sen go ne Jar ma hwal ti ɓogn wo mokay, á kal rawge had jare, siɗ wããre ɓi leege wo ɓi sir sen ni.

² Jaŋ ma joŋ batem jarn le de ɓoʼge ti daŋgay mo tiʼ, raw laa wããre joŋre Kris le, raw laa jar po wo yoo jar ma wer ɓen wo wo,

³ saara raw wii Yeso ga : Jaŋ laa wùr le wii moge ga ndo mbo diŋ je maga wùr hay gorge ɓe mbe mo yawla noga wùr mo gor je tigriŋ ɗa pa yawla?

⁴ Yeso raw fer wããre ne hara ga : See we riŋ Jaŋ de wããre maga nday laɗ ne, de re maga nday kon mo lay.

⁵ Riŋ we Jaŋ ga ndi car nen jar rẽwre wo go, ndi kol jar leŋre wo go seɗ ge, ndi fãɗ jar cíi wo go, ndi bul sug jar ndigriŋ wo go laɗge, ndi fer bir jar ma de húulí wo go, ndi siɗ Wããre ma de Cõõren go ne jar coo wo lay.

⁶ Ama woo ge diŋ je maga ndi kol foo go nen ɓe gà mono.

⁷ Jar ma wer Jaŋ raw wo mbaara so, Yeso raw tĩĩ wer riŋ ngaɓan wo ti Jaŋ ga : Nday hay wo ko wose wo ti puuli mo la? Fíiri-bii po maga leege de fid gi ɓe yawla?

⁸ Nday hay wo ko mayla? Ko je ma de laa õõbe ma de woore ti yawla? Ama jar go de koge ɓuy ga jar maga lag wo õõbe ma de woore ti, à daɗ ra de lagge diŋ liŋ ni waŋren wo.

⁹ Day nday hay wo koge diŋ mayla? Je ndar nen wããre ma jag Baa go? Ndi de riŋ nday ga a de daŋ je ndar nen wããre ma jag Baa go yaw.

¹⁰ Werga bloo maga à yer go ti ɓe ga : Coʼ sug ɓo, ndi de ɓoʼ je soole ɓin wo pel ɓo, ma kneʼ faagen wo go mo pele. Jaŋ diŋ je se no.

¹¹ Kidolgi ndi riŋ we ga yoo weere jar téebeere wo ɓuy maapo bay de daŋ Jaŋ ma joŋ batem jar wa hase, ama je maga go depẽẽre yoo jar ma ti twaywaŋ ma ciŋ, sen de daŋge ɓe kluu ane.

¹² Ama le ti kal maga Jaŋ ma joŋ batem jar sii wããre le ni mo hãã á go patala, twaywaŋ ma ciŋ jar de leɗ ge ɓe de egre, jar sen kiɗ wo ga saara mo yãã de waŋ lay.

¹³ Jar ndar nen wããre Baa go wo ɓuy yaŋ wo de siɗ wããre sen le go ɓaa ga Baa de wãã ge doosen no, jag liŋgi, Moyis raw yerge ɓe go de wãã ge doosen no lay, hãã sii gi wããre sen a taw ti go ti Jaŋ so.

¹⁴ Hayga nday da yãã wããre ɓin we, ni nday mo ko Jaŋ diŋ Eli se maga Baa hay riŋ ga á nduu yaŋ mono.

¹⁵ Coʼ we sug ɓay hayga nday yaŋ de sug no.

¹⁶ Ndi mo ngaɓ jar ma waran wo de may la? Á wo de ngaɓge doo weere kleere maga tay wo joŋ hragge ti ngel hragge po, day raw wo riŋ jar lan ga :

¹⁷ Wùr ʼwad síilí ne nday ga nday mo dag jõõ, nday laa dag jõõ gà. Day wùr raw ʼwad war húulí, nday laa ragge gà pa.

¹⁸ Wersen Jaŋ raw nduugi, re hoole gà jo yii gà lay, à raw wããge ga á de sõõ ti.

¹⁹ Wel je Táabay raw nduugi, re, jo, à raw wããge ga : Ko bloo mo caw ɗa la, ɗig diŋ ti rege wo de jo ge yii koʼ boŋ, bar jar tar seen wo de jar ma de ɓlagge wo. De sen ɓuy á raw daʼ wer koge re Baa go ga koge re ɓen de deele diŋ de joŋre sen wo.

Re ti jar maga day wo hã ɓil ɓaara ne Yeso gà mono

²⁰ Blam sen Yeso raw tĩĩ wer ruu jar ma ɓi leege maga se hay joŋ fẽẽre mbuɗgi wo ni debaŋ daŋge, werga jarn laa wo coo ɗiggi ɓaara ma de ɓlaggen de deele tigriŋ gà. Á raw wãã ge ga :

²¹ Re ti ɓay jar Koraseŋ wo, re ti ɓay jar Betsayda wo. Werga fẽẽre mbuɗgi maga ndi hay joŋ ni ɓay mo deŋ, mo hay joŋ we diŋ ɓi leege Tir wo de Sidoŋ no, á de hay lag wo yaŋ ti ɓaara diŋ õõbe ma de yugudgi tuu tuu de lag wo sããge yaŋ ti ɓaara ma kaŋ nen jar ga saara coo ɗiggi ɓaara ma de ɓlaggen we de deele tigriŋ.

²² Wersen ndi de riŋ nday ga ti wur cagge wããren, bon ma Tir wo de Sidoŋ joŋ ge de el ɗawa daŋ ma ɓayn pa yaw.

²³ Ma ɓo Kapernam, ndo ɗig bà ɓon ga ndo gẽẽ yaŋ wo ciŋ hãã ndo wo yaŋ daʼ ngel ma ciŋ no. Ma nen ɓi ga ndo fer ge yaŋ gesiŋ hãã yoo jar ɓi tuu wo. Werga fẽẽre mbuɗgi maga ndi hay joŋ ni ɓo mo deŋ mo hay joŋ we le diŋ ɓi sir Sodom, jar ma ɓi leege sen de hay yaŋ wo wara ɗa.

²⁴ Wersen ndi de riŋ nday ga : Ti wur Caage kiidan, bon ma jar ma ɓi leege Sodom joŋ ge yaŋ de el ɗawa daŋ ma ɓon pa yaw.

Yeso ga wosela ɓuy mo a le ig gi se se

²⁵ Ti wur sen Yeso raw ɗe Baa ga : Baba, Waŋ ma wãã re jar ma ciŋ wo de ma gesiŋ la ɓuy no, ndo yoŋ see ɓo go ga jar ma de ko reen wo de jar ma de had wer fẽẽren mo daʼ wo wer ɓo wa, day ndo raw naa nen see ɓo go diŋ ne kamliiri maga bay wo de ko re po wa has ɗa yaw so mono, ndi joŋ suseʼ mo ti se no.

²⁶ Baba ndo joŋ doosen diŋ werga á co jag ɓo ga ndo mo joŋ doosen nono.

²⁷ Pan ɓi hã fẽẽren wo go me ɓuy, jobo bay de koge ga weln diŋ wo la wa, say de koge ɓe diŋ Pããben tawa, jobo bay de koge ga Pããben diŋ wo la wa lay, de ko ge ɓe diŋ wel wo de je maga weln kaŋ nen ɓe ni ga á mo kon mono.

²⁸ Nday jar maga põõre ma ti ɓay wo go de bal nday mo ɓuy, a we le see ɓi, ndi yãɗn go ne nday ti.

²⁹ Yãɗ we jag ɓi, had we re see ɓi, werga ndi desãy, ndi joŋ bon ɓay gà nday lagge yaŋ iggi eŋ lag cwãy.

³⁰ Werga wããre maga ndi bag ge ne nday, nday daʼ ge see ɓay yaŋ wer ɓe, fẽẽre maga ndi farn ge ne nday ti, fen sen põõ ge gà so.