WÃÃRE MA DE CÕÕRE MAGA LUG YER NE MONO 5 - Tupuri Bible

Jar bag cẽẽ maŋ wo blam Yeso

¹ Ti wurpo Yeso raw oo ge go jag maarog ma Jenesared, jar raw gig gi ne hẽn ti ɓrid laa wããre Baa.

² Á raw ko daage wo jag gosoŋ ɓog lagge. Jar maga hay wo bag cẽẽ ɓil ɓaara, wo go de yog bày ɓaaran jag gosoŋ lag lay.

³ Yeso raw ɗii gi ɓi maapo boŋ, diŋ daage ma Simoŋ, á raw wiigi ɓe ga á mo yaʼ wo go de se nen bii meʼ ɗa, Yeso raw hayge ɓi daage no, raw had ngaɓan wo.

⁴ Á wo taw wããren go mokay, á raw riŋ Simoŋ ga : Yaʼ daagen wo nen tuu bii no, lag we bày ɓay wo nen bii bag cẽẽ so.

⁵ Simoŋ raw fer wããre ne hẽn ga : Waŋ wùr nà ti joŋre sen nà ge poɗag wùr daʼ mopo ga has ɓuy. Ama wer wããre ɓo maga ndo wii ga ndi mo joŋ no mono, ndi lag bày wo yaŋ nen bii.

⁶ Á raw wo lag bàyn nen bii, bàyn raw wo bag cẽẽ ma kluuri wo debaŋ, hãã bàyn leʼ wo go ngar ge.

⁷ Á raw wo da doo le ne kããre ɓaara maga wo le go ɓi daage ma la wo ga á mo á wo le kay saara. Á raw wo age, raw wo bag daagen wo go de cẽẽ ɓog ɓuy, hãã daagen hay leʼ wo go vbum gi nen bii.

⁸ Simoŋ Piyer wo ko ge no mokay, á raw laa kõyõgre gesiŋ pel Yeso, raw riŋgi ɓe ga : Waŋkluu, yaʼ ɓo see ɓo wo go see ɓi hãã, werga ndi diŋ je ɓlagge.

⁹ Hẽẽne joŋ Simoŋ wo de jar ma wer ɓen wo debaŋ wer cẽẽ maga á baan wo debaŋ mono.

¹⁰ Hẽẽne joŋ kããre Simoŋ wo doo sen no lay, kããre ɓen wo diŋ Jag wo de Jaŋ weere mani Sebeden wo. Yeso raw riŋ Simoŋ ga : Joŋ hẽẽne wa, ma patala ndo kol ge fleg ge diŋ jar téebeere wo ne Baa lay so.

¹¹ Á raw wo kog daage ɓaaran le go ciŋ, raw wo men fẽẽre ɓaaran go ni ɓuy maŋ wo blam Yeso.

Yeso fãã je cíi go

¹² Yeso wo day ge ɓi leege po, ko la jobo raw age le, cíi go de carge ɓe se ɓuy. Á kal ko Yeso, raw maʼ pel ɓe gesiŋ raw wiigi ɓe ga : Waŋ, hayga ndo da we, ndo kãã ma fãã me yaŋ go.

¹³ Yeso raw coŋ doo ɓe wo, raw duʼ gi ɓe, kal riŋ gi ɓe ga : Ndi da we, fãã go so. Ni tuuseŋ bloon raw fããge go.

¹⁴ Yeso raw riŋgi ɓe ga : Sii re sen mokay go ne jobo wa hase. Ama see wii nen see ɓo ne je siɗ jag nene, fen sii jag maga Moyis hay riŋ ga hã ne ma kaŋ nen jar go ɓuy ga ndo fãã we go, wo hãge ɓe ne hẽne.

¹⁵ Mbe de sen ɓuy wããre Yeso yaʼ wer dus gi wo go daŋ ge pa so yaw. Jar raw wo tayge le see ɓe ngaɓa debaŋ laa wããre ɓen maga á mo peɗ saara go lay.

¹⁶ Blam sen Yeso kal rawge wo go ti ngel maga jar bay go ni wa, kal hay ge wo go tos ge ni.

Yeso ur je grúm go ciŋ

¹⁷ Ti wurpo Yeso hay had jare. Farisiyẽẽ wo de jar ma ndar wer wããre Baa raw wo age le see ɓe ni lay. Á á wo le ɓi leege ma ɓi sir Galilen wo de ma Jude wo de Jerusalem. Egre Waŋkluu raw kay Yeso pẽɗ jar cege wo go.

¹⁸ Jar raw wo nduugi de bloo po de ɓoʼ ge ti fen suuli, see ɓe sor ne, á kiɗ wo faage ma kal ge de ɓe tiŋma ɓoʼ ge pel Yeso.

¹⁹ Ama ngar ngel maga á mo kal wo de ɓe ni no kay bay nen ɓaara wa doo ngaɓan wo. Á raw wo ɗii gi de ɓe ciŋ ti tiŋ no, raw wo cloʼ ge ɓe, raw wo sir bloo wo de fen suulin wo yoo ngaɓan wo pel Yeso.

²⁰ Yeso wo ko hãge ɓil ɓaaran ne Baan mokay, á kal riŋ je cegèn ga : Bar ɓi, ndi men ɗig re ɓlagge ɓon wo we go mo ti hase.

²¹ Jar ma ndar wer wããre Baa wo de Farisiyẽẽ raw wo ɗiggi de ɓil ɓaara ga : Á diŋ wose sen ga ɗar Baa mo deŋ ɓa? Je tabay kãã ma men ɗig re ɓlaggen go ne jobo ti has ga, say diŋ Baa boŋ.

²² Yeso raw ko ɗiggi ɓaara go raw riŋ rage ga : Nday ɗig ɗiggi ma se kayn ɓil ɓay gahãy ɓa?

²³ Maga go gus diŋ ma hon ɓa? Ga ndi mo riŋ ga : Ndi men ɗig re ɓlagge ɓen we go hẽn ti mo yaw, noga Ur go ciŋ see mono?

²⁴ Ama ndi da ga nday mo ko ga wel je táabayn yaŋ de kããge ti tamsir la ma men ɗig gi go ne jar wo ti ti ɓlagge ɓaaran wo ra. Á raw riŋ je cegèn ga : Ur go ciŋ, maŋ fen suuli ɓon fer liŋ ni ɓo.

²⁵ Ni tuuseŋ bloon raw urgi go ciŋ pel jar deŋ ɓuy, raw maŋ fen suuli ɓe maga se hay de ɓoʼ ge ni, kal rawge liŋ ni ɓe togoɗ Baa caw.

²⁶ Jar raw wo ngrisgi ɓuy, raw wo togoɗ Baa, werga hẽẽne raw joŋ rage debaŋ, á kal wo riŋ kããra ga : Naa ko fen mbuɗgi we wara.

Yeso ɗe Lefi

²⁷ Blam sen Yeso raw kalge go, raw ko je tar jar wo de hayle ɓi tiŋ ma tar se gen yeʼe, ɗúu je sen ga Lefi. Yeso raw riŋgi ɓe ga : Maŋ blam ɓi.

²⁸ Lefi raw urgi go ciŋ men fẽẽre ɓen wo go ti ngel ni ɓuy kal maŋ blam ɓe.

²⁹ Lefi raw joŋ rege liŋ ni ɓe debaŋ ma ra ɗúu Yeso go, jar tar se wo de jar tigriŋ raw wo le tayge rege ɓiŋ ɓaara ni ngaɓa debaŋ lay.

³⁰ Farisiyẽẽ wo de jar ma ndar wer wããre Baa wo wo ko sen mokay á laa coge jag ɓaara ga, á raw wo riŋ jar ma wer Yeso wo ga : Jar tar se wo de jar maga jobo bay kee rage jag wa, nday re hoole de kããra jo bii de kããra mokay jo ge la?

³¹ Yeso raw fer wããre ne hara ga : Jar maga bay wo de cegè wa, bay wo de sãy dogtor ti wa, de sãy dogtor ti diŋ jar ma de cege wo ra.

³² Baa ɓoʼ me le ɗe ge bay diŋ jar maga á de hoo sug ti ɓaara ga á wo de deele mo wa, ama ndi á ɗe ge diŋ jar maga á bay kee rage jag wa mono, maga á mo coo wo ɗiggi ɓaara ma de ɓlaggen de deele tigriŋ.

Jar wii wo Yeso ti wããre hẽẽ ge bii

³³ Jar po raw wo riŋ Yeso ga : Jar ma wer Jaŋ hẽẽ wo bii tum, tos wo lay, jar ma wer Farisiyẽẽ wo doo sen no lay, day jar ɓo ma wer ɓon re wo, jo wo mbaara an le la?

³⁴ Yeso raw fer wããre ne hara ga : Nday ɗig ɓayn ga nday kãã ma teb jar maga á ɗe ra le re doo ɓoʼ ge wãy ti bii, ga á mo hẽẽ wo bii de maga ni war wãyn yoo ɓaara ni ɗa mono. Nen naa taʼ ga bay wa.

³⁵ Ama wurpo a ge yaŋ le, jar hee war wãy la baa ge wo war wãyn yaŋ wo go wur sen á hẽẽ ge wo bii kway lay so.

³⁶ Yeso raw riŋ rage de jagjõõ ga : Á ngar se õõbe ma defay ma kaŋ nen ma de tããbe de ɓe ga, hayga á kaŋ we de ɓe no, ni á ngar õõbe ma defayn go de koɗ pa, kebdeŋ õõbe ma defayn day tayge de ma de tããben ga pa.

³⁷ Á ser yii maga de jii gi defay ɓi ndar bii ma de tããbe wo gà. Hayga á sern we ni, yii maga de jii gi defay cag ndarn wo go, yiin raw yuu gi go, ndarn ɓlag wo go lay.

³⁸ Á ser yii maga de jii gi defay diŋ ɓi ndar bii ma defay wo lay.

³⁹ Wosela maga gus yii ma de jii gi we go taŋgu, day jo ma burn ga so, werga á kal wãã ge ga yii ma de jiigin de cõõre daŋ ge.