WÃÃRE MA DE CÕÕRE MAGA LUG YER NE MONO 15 - Tupuri Bible

Jagjõõ ma de ngaɓ ge de sam maga yee go mono

¹ Jar tar se wo de jar maga jobo bay kee rage jag wa raw wo yaʼge see Yeso ɓuy coʼ sug wããre ɓe no.

² Farisiyẽẽ wo de jar ma ndar wer wããre Baa raw wo ngrum jag ti holaŋ kããra ga : Ɓa bloo sen yãɗ jar maga à bay kee rage jag wa see ɓe, re wo de kããra lay le ɓaa.

³ Blam sen Yeso raw riŋ rage de jagjõõ ga :

⁴ Hayga jobo yoo ɓay la, sããre ɓe kis, raw yee ge we go yoo ɓaara boŋ, á joŋ joŋ ge ne? Á men ma hwal hwal kaawaʼ ti kaawaʼn wo go ti ngel koɗ ragen ni, kal raw ge kiɗ maga yee go mono, hãã wo daʼ ge ɓe.

⁵ Á wo we daʼ ge ɓe, á raw fruy gi debaŋ, raw ɓoʼ sam le bay ɓe,

⁶ raw kalge liŋ ni ɓe. Blam sen á raw ɗe bar ɓe wo de jar leege ɓe wo le ga : naa joŋ we fruygi, werga ndi daʼ sam ɓi maga hay yee go mo we.

⁷ Ndi de riŋ nday ga : Baa de jar ma see ɓen wo le ciŋ, joŋ wo fruygi yaŋ le debaŋ ti je maga mbuɗ faale we ne ɓlagge ɓen wo mono, daŋ jar ma hwal hwal kaawaʼ ti kaawaʼ maga á de horge sug ti ɓaara, day bay wo de sãy coo ɗiggi ɓaara ma de ɓlaggen de deele tigriŋ wa mono.

Solay maga yee go mono

⁸ Doo wãy po, hayga solay boo doo ɓe hwale, raw yee ge go boŋ, á joŋ joŋ ge ne. Á raw doʼ gèere, tor tiŋman go raw kiɗ gi ɓe de el hãã wo daʼ ge ɓe.

⁹ Á wo we daʼ ge ɓe, á raw ɗe bar ɓe wo de jar leege ɓe wo le ga : Naa joŋ we fruygi, werga ndi daʼ solay ɓi maga hay yee go mo we.

¹⁰ Ndi de riŋ we ge ga : je maga fer we coo ɗiggi ɓe ma de ɓlaggen de deele tigriŋ, Baa de weere jõõre ɓe ma ɓiŋ ɓen wo le ciŋ, joŋ wo fruygi yaŋ le ti ɓe debaŋ doo sen no lay.

Wel maga yee go mono

¹¹ Yeso raw wãã ge pa ga : Jobo, weere ɓe twerpiiri ɓoge.

¹² Ma klee raw riŋ pan ɓe ga : Pan ɓi hã nen horog ma ɓin go me. Wersen pan ɓaara raw ɓes ɓil horogn go ne hara.

¹³ Wo nà ge blam sen mbag, wel ma kleen raw yeɗ nen horog ma ɓen wo go ɓuy, kal rawge wo go de solay ɓen ɓi sir po hãã. Wo ni á raw joŋge go hãy hãy, wersen se raw ray horog ɓen wo go ɓuy.

¹⁴ Fẽẽre ɓen wo wo go leʼ jag ɓuy mokay, koŋne raw leʼ ge ɓi sir sen ni kluu debaŋ, rege raw tĩĩ wer pẽɗ jag ɓe.

¹⁵ Á raw kalge ti joŋre ni jobo ɓi sir sen ni, je sen raw ɓoʼ ge ɓe ɓi pay ɓen koɗ gaduuru wo.

¹⁶ Ɓil ɓe da debaŋ ga se re leʼ ge koo maga à hãn ne gaduurun wo re ge mono, de sen ɓuy jobo bay hãge ɓe ne hẽn wa.

¹⁷ Wersen á raw tĩĩ wer ɗig gi ti see ɓe, raw wãã ge ga : Jar joŋre mani pan ɓin wo ɓuy rege mbe see ɓaara debaŋ deŋ, maga re go doo ɓaara ɓuy ga : ma ɓin ndi mbi go de laɓ see ɓi de koŋne la yeʼe.

¹⁸ Ndi ur ciŋ ndi fer ni pan ɓi, ndi wo wii pan ɓi ga ndi diŋ je ɓlagge nen Baa, ndi joŋ re nen ɓo pan ɓi ni ndaŋ ga lay,

¹⁹ Ndi bay nen maga ndo ko me doo wel ɓo no wa so. Ama ko me doo jobo ma yoo jar joŋre ɓon wo nono.

²⁰ Blam sen á raw urgi ciŋ, raw ferge ni pan ɓe. Á le go se tiŋ mani pan ɓen mbeɗa ɗawa ɗa mono, nen pan ɓe raw leʼ ge wo ne hẽn ti, á raw ko decoo nen Pan ɓe debaŋ. Pan ɓe raw caa pel ɓe de ɗee, raw klew ge ɓe, raw togoɗ ge ɓe.

²¹ Weln raw ɗe ge ɓe ga : Baba, ndi diŋ je ɓlagge nen Baa, ndi joŋ re nen ɓo pan ɓi ni ndaŋ ga lay, ndi bay nen maga ndo ko me doo wel ɓo no wa so.

²² Ama pan ɓe raw riŋ weere jõõre ɓen wo ga : See we hoo õõbe ma kluu de woore le deparday, laa we ne hẽn ti, hee we boo biŋni ne hẽn ti we doo, her we taarag ne hẽn ɓaale lay.

²³ Á we le de wedày ma de goɓre, ngaʼ we ne go, naa joŋ we few de rege de fruygi.

²⁴ Werga wel ɓin mokay hay nen ɓi doo ga á huu gon no, day fer le bir gi go, á hay yee go nen ɓi, day ndi fer we daʼ ge ɓe. Blam sen fruygi fewn raw tĩĩ wer joŋ ge so.

²⁵ De sen ni, wel ma kluun hay le go ɓi pay. Á wo le fer ge, wo kos tiŋ le mokay, á raw laa gẽẽge didil wo de dag ge jõõ le deŋ.

²⁶ Á raw ɗe ge le yoo weere jõõren wo boŋ, raw wiigi ɓe ga ngar ge jag sen ngar re may ɓa.

²⁷ Wejõõn raw riŋgi ɓe ga : wegeman ɓon fer we le liŋ, day pan ɓo raw ii wedày maga naa hay goɓ ge ɓe mono, werga wel sen fer le jam mono.

²⁸ Wel ma kluu raw tĩĩ gi go de waŋ, laa day ge kal ge wo liŋ ni gà. Pan ɓe raw kalge le go kam ge ɓe ga á mo kal le liŋ.

²⁹ Ama weln raw riŋ pan ɓe ga : Coʼ sug ɓo ɗa la, kiŋgi wara pur maga ndi de joŋ joŋre mo, ndi ɓoʼ jag ɓo go ti boŋ ga has lay, de sen ɓuy ndo bay de hã wel-fìi po me ti boŋ boŋ draʼ ga ndi mo joŋ fruygi de ɓe de bar ɓi wo wa.

³⁰ Ama wel ɓo maga fer le mo yeʼ no, á ɓlag horog ɓon wo go ne naare figliw wo ɓuy, ndo raw ii wedày maga naa hay goɓn go ne hẽne.

³¹ Pan ɓe raw ga : Naʼã, ndo see ɓi la tum, fẽẽre ɓin wo ɓuy diŋ ɓo wo lay.

³² Ama naa nen joŋ few de fruygi de woore, werga wegeman ɓon mokay hay doo ga se huu gon no, day fer bir gi go. Á hay yee go, ndi fer we daʼ ge ɓe.