JOWEL 4 - Tupuri Bible

Manwur saʼ ge hee jar ɓen wo go

¹ Ti wur sen wo ni mono, ndi fer ge jar Juda wo de jar Jerusalem wo yaŋ le liŋ, Day ndi ʼwũy gi sir ɓaaran yaŋ go ne hara ti.

² Ndi tay ge wer jar wo yaŋ le go ɓuy ɓil log mani Josafad no. Ndi caa ge kiida ɓaara yaŋ ti ngel sen ni wer fen maga á joŋ wo jar Israyel, jar mani ɓin wo de ɓe mono, ti maga á ɓes wo sir mani ɓin go ti holaŋ ɓaara mono.

³ Á hay naa wo wãywáale go ti jar ɓin wo, Hay yeɗ wo weere ma jõõren wo go ma nà gawlaŋre wo, Yeɗ wo mayre ma tigliirin wo go ma jo yii lay.

⁴ Nday jar Tir de Sidoŋ no, nday da ga ndi mo joŋ we joŋge la? Nday ma ɓi sir Filistẽẽ no, Wer mayse ga nday joŋ ɓay diŋ fẽẽre maga car wo jiili ɓi go tum la? Hayga nday yaŋ joŋge doosen no tum no, ɓlagge ɓayn fer ge wo yaŋ leʼge ne nday ti doo ga.

⁵ Nday hoo solay wo de boo biŋni, de horog ɓi ma de wooren wo ɓuy, Nday wo go lag rage ɓil tiŋ sõõre ɓayn wo.

⁶ Nday yeɗ jar Juda wo de jar Jerusalem wo go doo jar Jafaŋ wo Nen maga á mo hay wo ɓi sir ɓaaran wa so.

⁷ Ko we ga ndi caa ge nen ɓaara yaŋ go nen maga á mo men wo ngel maga saara le ni mo go. Ndi joŋ ge nday yaŋ de te fen maga nday hay joŋ ra de ɓe mo lay.

⁸ Weere ɓay wo de mayre ɓay kol ge wo yaŋ go gebeere jar Juda wo lay, Day saara yeɗ ge ra yaŋ go doo jar Saba maga go hãã see ɓay mo lay. Werga, ndi Manwur ndi hay wããn go.

Durgi ma kluu ma blam taw no

⁹ Wii we wer jar wo go ɓuy ga á mo ʼwũy wo see ɓaara go ma durgi, Mo tay wo soode ma de egren wo le go ɓuy ma woge ti põõ.

¹⁰ Wii we ra ga á mo tor wo soŋre ma doo ɓaaran wo go, Mo kol wo ra go diŋ moslamre wo, mo kol wo saŋ ma doo ɓaaran wo go diŋ jawre wo. Daga jobo mo hay de hẽẽne yoo ɓaara wa ɓuy.

¹¹ Wii we ra ga á mo grag wo see ɓaara go deparday, Mo tay wo le go ti ngel maga Manwur go de gorge de soode ɓe ma de egren wo ni mono.

¹² Daga wer jar wo ɓuy mo hoo wo go ciŋ, Mo wo wo go ɓil log mani Josafad no. Werga, ndi caa ge kiida jar ma ti jeŋ sir Israyel wo ɓuy nà wo go ni.

¹³ We we mbay so werga cooren go de ruggi! Hãã we mbay so, werga hãw go de baage, Cããgen raw wo bagge go lay! Wer ɓe ga ɓlagge ɓaaran raw debaŋ.

¹⁴ Jar wo ngaɓa debaŋ wo go de tayge ti ngel caa kiidan yaw, Werga wur mani Manwurn go de kosge.

¹⁵ Wur wo de few ɓoʼ wo suŋgu we go nen yaw! Gér bay wo sagge wa so lay.

¹⁶ Sen mono werga Manwur le de car põõ le ciŋ ti Siyoŋ húulì ma ɓi leege Jerusalem no. Ngel ma ciŋ wo de tamsir wo de daɗge, Jar mani Manwurn daʼ ge wo ngel yoŋre nà diŋ ɓiŋ ɓe.

Manwur fer yaŋ go woo jar ɓe wo

¹⁷ Nday jar Israyel nday ko ge yaŋ ga ndi diŋ Manwuri, Baa ɓay maga le de hayle ciŋ ti Siyoŋ, húulì ma bay ɗag no. Jerusalem joŋ ge yaŋ go tinoo taʼ pa, jar dehãy wo ge wo ni gà so.

Jar mani Baa daʼ ge wo see ɓaara yaŋ

¹⁸ Ti wur sen ni mono, tlalum ma ciŋ ti húulìn leʼ ge wo yaŋ debaŋ, Pãã joŋ ge yaŋ debaŋ lay. Bii yuu gi go ɓil pyewre ma Judan wo ɓuy. Kããge bii kal ge yaŋ le go ɓil tiŋ mani Manwur no, Day maŋ ge log maga koore gasiya wo ni go.

¹⁹ Sir Ejipte kol ge yaŋ go wur sen nen coocoo. Sir Edom kol ge yaŋ go diŋ puuli. Coocoo baan ge go lay, wer debaycõõre maga á joŋn wo see jar Juda wo mo no, Wer maga á id wo ra go bay re ti sir ɓaaran mono.

²⁰ Sir Juda joŋ ge mbe de jar ɓil tum, Jerusalem doosen no lay, de kiŋgi de kiŋgi.

²¹ Ndi saʼ ge hee ɓaara maga ndi hay saʼn gà ɗa yaŋ go ɓuy, Day Manwur joŋ ge yaŋ de tiŋ ti Siyoŋ.