JOWEL 3 - Tupuri Bible

Manwur cwaa ge Nenterse ɓen ne jar ti

¹ Blam sen mokay no, ndi cwaa ge Nenterse ɓin yaŋ ne wosela ɓuy ti. Weere ɓay wo de mayre ɓay ndar ge wo nen wããre Baa yaŋ go. Jar kluuri ɓay lwaɗ ge wo yaŋ, Ndi ndar ge nen fẽẽre wo yaŋ ne weere jõõre ɓayn wo lay.

² Ti wur sen ni, ndi cwaa ge Nenterse ɓin ne gebeere wo draʼ ti lay, Ma twerpiiri wo de ma tenaare ɓaaran wo ɓuy.

³ Ndi joŋ ge fẽẽre mbuɗgi wo yaŋ nen ngel ma ciŋ lay ti tamsir lay. Nday ko ge wùu wo de cíi yaŋ de nen ɓay, cug ndar ge yaŋ ciŋ debaŋ lay.

⁴ Suŋgu ɓoʼ ge yaŋ go ne wur nene, few kol ge yaŋ go de sẽẽ doo cíi no lay. Sen mo ɓuy go taŋgu maga wur ma kluu mani Manwurn a ge mono.

⁵ De sen ni, je maga ra we de ɗúu Manwur no, je sen daʼ ge pẽẽge yaŋ. Doo maga Manwur wãã nono, ngel pẽẽgen joŋ ge Wursen nà ɓi leege Jerusalem ciŋ ti húulì ma Siyoŋ no. Á joŋ ge diŋ ma jar maga Manwur ɗe ge sen wo mo no.