JOWEL 2 - Tupuri Bible

Wur mani Manwurn go maŋ

¹ ʼWad we cõõ ma pũy jar Siyoŋ wo go! Ɗii we ti húulì ɓi ma bay ɗag no, ʼwad we ne! Daga jar ma ɓi sirn ɓuy mo daɗ wo, Werga wur mani Manwurn le de age, á go de kosge.

² Wur sen diŋ wur suŋgu ma ɗiligi, á diŋ wur legar wo de sãy. Á joŋ ge doo suŋgu maga leʼ yoo húulì nono. Koɗa, jar po ma ngaɓa de egre debaŋ wo le de age. À hay ko te ɓaara ti boŋ gà à ko ge ra wo pel gà so lay.

³ Wùu ma roɗ jar pel ɓaara, wùu ma yããge nen blam ɓaara lay. Sir se maga hay doo pay Eden no no, gwaʼ ge yaŋ go diŋ puuli ma poɗag poɗage. Mopo gwaʼ ge jag ɓaara ni gà hase.

⁴ Ndo ko ra á ɗee wo doo piiri maga à de yaʼ ra ge nono.

⁵ Ngarge jag ɓaara doo pus durgi maga wo de ɗii húulì nono. Á car wo põõ doo wùu maga de roɗ fíi nono. Á wo doo jar maga wo wo ti põõ nono.

⁶ Jar maga á wo le de seege ne hara ti caa wo hẽẽne go ɓuy, Ti bii go nen ɓaara taʼtaʼ ɓuy lay.

⁷ Á ɗe wo doo blumri wo nono, yor wo go ne kor ti doo soode wo nono. Wosela ɓuy yoo ɓaara ti faage ma ɓe day cel go gà.

⁸ Je ma daw kẽẽ bay yoo ɓaara ni wa. Wosela ɓuy see pel ɓe de deele. Á yor wo go ne fẽẽ wo ti, fen po ma dig rage bay wa hase.

⁹ Á ɓug gi wo ɓi leege Jerusalem go, ɗid ge wo go ciŋ ti kor no, ciŋ ti tiŋ wo lay. Á lag ge wo go ti ywaale doo je freŋ wo nono.

¹⁰ Sirn ɓuy go de daɗge doo ɓaara. Ngel ma ciŋ doo ga se le go de leʼge gesiŋ nono. Wur wo de few bay wo tee ngel go wa so lay, Gér bay wo sagge wa lay.

¹¹ Manwur de see ɓe pel soode ɓen wo. Werga soode ɓen wo ngaɓa, je ɓag jag wããre ɓen go de egre. Á joŋ wo hẽẽne ne jare. Kidolgi, wur mani Manwurn diŋ wur ma kluu, á joŋ hẽẽne ne jar debaŋ. Wose kãã ge ma ooge pel ɓe la?

Wurn diŋ ma ferge le see Manwuri

¹² Patala Manwur wãã so ga : Fer we le see ɓi go de jag jiili ɓay ɓuy. Hẽẽ we bii, ra we, day ni nday law we see ɓay.

¹³ Ngrag we diŋ õõbe ɓayn wo koɗ wa, coo we diŋ jiili ɓay. Fer we le see Manwuri, Baa ɓay no, werga á fug ɓil go ne jar ti, Á ko decoo jare. Á bay go caa jiili ne jar ti deparday wa. Á joŋ ɓil de el ti jare. Á fer go maŋ jag fen maga se hay riŋ ga se á de ɓe ne jar ti mono.

¹⁴ Wose ko bà we ga Manwur fer go fug ɓili day maŋ jag re sen wo go ne nday ti, Noga kaŋ bosaʼ we ti nen maga nday mo fer siɗ jage day hã fẽẽre ne hẽn pa gà la?

Wurn diŋ ma hẽẽ bii

¹⁵ ʼWad we cõõ ma riŋ jar ma Siyoŋ wo. Hẽẽ we bii, ʼwaa we ɓay wo go ne kããra ɓuy!

¹⁶ Tay we jar ma ɓil sirn wo le go ɓuy! Tay we le doo jar ma bay ɗag wo nono. Jar kluuri de weere kleere mo tay wo le ɓuy, hayba ma ti pãã wo draʼa. Daga je tiŋ mo men tiŋ ɓen go, wãy mo men tiŋ naw ɓen go lay.

¹⁷ Daga jar siɗ jag ma joŋ peele ne Manwurn Mo tay wo le jag tiŋ ɓen ma rage ne hẽn ti, ma tosge ɓe ga : Manwuri, men re leʼge ne jar ɓon wo ti wa, Kaŋ sõõre ne hara ti nen maga jar mo feg wo ti ɓaara wa. Joŋge joŋge ga jar wãɗ ge wo ga Baa ɓaaran nà genla la?

Manwur yiŋ jag ne jar ɓen wo

¹⁸ Manwur de hun ti sir ɓe no, á ko decoo jar ɓen wo tum.

¹⁹ Manwur kal yiŋ jag ne jar ɓen wo day riŋ ra ga : Patala ndi hã ge coore yaŋ wo ne nday de yii ma defay wo de noo. Nday kãã ge yaŋ go day ndi men ge nday ge go mbuɗ foo yoo wer jar wo gà so.

²⁰ Ndi maŋ ge ɓil jar hee ɓay maga a wo le nen ɓaŋ gloŋhwede Wo yaŋ wo go see ɓay hãã. Maga sen hay wo wo seege pele, Ndi srog ge ra yaŋ wo go nen marog ma nen wur botoŋ no, Maga sen wo le blam, ndi srog ge ra yaŋ go nen marog ma nen wur bolawn lay. Á sõʼ ge wo yaŋ go, day fõõre ɓaara yãã ge ngel yaŋ wo go ɓuy. Ndi joŋ ge ra doosen nono werga a joŋ wo nday de ɓlagge debaŋ.

²¹ Nday jar ma ti tamsir no, joŋ we hẽẽne wa so. Jag ɓay mo caa feg so, joŋ we mbay fruygi so lay, Werga Manwur de joŋ fen ma woo weege.

²² Nàyre ma mbásga wo, joŋ we hẽẽne wa so. Werga fíi fer yaŋ laage, koore fer wo yaŋ leɗ ge lay, Koo hõõ wo de tlalum fer ge wo yaŋ ruggi lay.

²³ Ma ɓay jar Siyoŋ no, jag ɓay mo caa fege. Joŋ we fruygi wer Manwuri, Baa ɓay no. Baa tĩĩ wer rage yaŋ day taw rage yaŋ go ti wur ɓe doo ma ɓaa nono.

²⁴ Yaage ɓayn bag ge wo yaŋ go de coore. Cããge ɓayn bag ge wo yaŋ go de yii ma defay wo de noo lay.

²⁵ Ndi fer ge coore maga nday hay nen daʼge ɓe nen kiŋgi ma blam wo yaŋ go ne nday ɓuy. Diŋ coore ma nen kiŋgi maga magalga, gejere, maapoɗ wo de degornog maga Ndi hay laa ra we ti reen wo go mono.

²⁶ Nday re ge yaŋ go ti koŋne ɓay day nday togoɗ ge ndi Manwuri, Baa ɓayn yaŋ. Nday jar mani ɓin nday joŋ ge nen sõõre gà so has wer fẽẽre mbuɗgi maga ndi joŋ ge ra see ɓay mono.

²⁷ Ti wur sen ni, nday jar Israyel, jar ma ni ɓin, Nday ko ge yaŋ ga ndi Manwuri, Baa ɓayn ti holaŋ ɓay. Nday ko ge yaŋ lay ga Baa ma tigriŋ bay doo ndi no wa so. Day nday jar mani ɓin nday joŋ ge nen sõõre gà so has lay.