JOSUWE 9 - Tupuri Bible

Jar Gabawoŋ kiɗ wo ɗeŋ le ma tay jag de jar Israyel wo

¹ Waŋre maga hay wo nen faale Jurdẽẽ ma ɓaŋ lan nen wur bolawn wo, ma ti húulìn wo, ma ti jeŋ maarog ma kluun wo, maga wo nen Libaŋ no kay mo ɓuy, jar Hitid wo, jar Amorid wo, jar Kanaan wo, jar Feresid wo, jar Hefid, jar Yebusid wo, jar sen wo ɓuy kal wo laa re se no.

² Saara raw tay see ɓaara le ɓuy ma dur Josuwe wo de jar Israyel wo.

³ Jar Gabawoŋ laa wo fen maga Josuwe joŋ jar Jeriko wo de jar Ay wo de ɓe mokay,

⁴ saara raw ɓaaran kiɗgi diŋ ɗeŋ, kal wo laa jar le de ndar ma de gragge wo ti gerhẽẽre wo, de ndar bii ma de cragge wo, de ma de nduɗgi wo de ma de neɗge wo.

⁵ Saara her taarag ma de cragge, de neɗge wo le ɓaale ɓaara, her wo õõbe ma de ngragge wo le see ɓaara lay. Saara hoo le doo ɓaara diŋ hoole tãy wo de frum ɓe.

⁶ Saara raw age daʼ Josuwe ti ngel lagge jar Israyel wo Gilgale. Saara day riŋn ga : Wùr hoo le ɓi sir ma hãã. Patalam no, tay we jag go de wùri.

⁷ Ama jar Israyel kal wo ferge ne jar Hitid sen wo gana : Ti ga nday de tiŋ see wùr la mbaŋ layblaʼ day wùr tay jag go de ɓay nà tayge la?

⁸ Saara kal ferge ne Josuwe ga : Wùr diŋ gebeere ɓon wo no. Josuwe day wii ra ga : Nday diŋ wose wo la? Nday a le genla?

⁹ Saara kal ferge ne hẽn ga : Gebeere ɓon a wo le ti sir ma hãã debaŋ. Wùr a nà wer riŋ Manwuri, Baa ɓo no werga wùr hay laa wããre ti ɓe, ti fẽẽre maga á joŋ ra le ɓil sir Ejipte mo ɓuy no.

¹⁰ De fen maga á joŋ Sihon waŋ Hesbon wo de Og waŋ Basan maga hay de tiŋ Astarod wo de ɓe mono, waŋre se ma ɓog mani jar Amorid wo ga hay le go faale Jurdẽẽ nen wur botoŋ mono.

¹¹ Jar kluuri wùr wo de jar sir wùr wo ɓuy kal wo wii wùr ga : Hoo we rege doo ɓay, maŋ we faage, wo we daʼ rage day ni nday wii ra ga : Wùr diŋ gebeere ɓay, patala tay we jag go de wùri.

¹² De maga wùr hoo le mono, hoole ma doo wùrn hay de tuu ɗa. Patala nday ko we lay ga á hig go mokay doo hãã faage. Á kol frum go werga wùr nà ti faage debaŋ.

¹³ Ti wur maga wùr hoo le mono, ndar bii hay wo de fayre ɗa. Ko we mbay ra mo hãʼ no á wo go de cragge, õõbe ma see wùrn wo de taarag ma ɓaale wùr kol wo go de gragge mo ɓuy nà doo faage se de pããge no.

¹⁴ Jar Israyel kal wo yãã fẽẽre ma doo ɓaaran wo bay wii jag Manwuri.

¹⁵ Josuwe raw baa barge go de ɓaara, kal tay jag go de ɓaara day riŋ ra ga mopo joŋ ge ra gà. Waŋre ma pel jar Israyel haʼ wo go doosen no lay.

¹⁶ Naw wo maŋge swaʼ blam ɓe mono, jar Israyel kal wo laage ga jar sen la wo diŋ jar leege ma mbaŋ tuu.

¹⁷ Saara wo dayge ni ɓaara ti naw ma de swaʼ no. Ɓi leege ɓaara hay wo diŋ Gabawoŋ, Kefira, Beerod wo de Kiryad-Yearim.

¹⁸ Jar Israyel id wo ra go gà wer haʼge maga waŋre ma pel ɓaaran hay haʼ wo go ne hara de Manwuri, Baa mani Israyeln mono. Ane ngaɓa jar Israyel ma ɓuyn ngrum wo jag ti waŋre ɓaaran wo debaŋ.

¹⁹ Waŋren wo ɓuy kal wo wii ngaɓan ga : Naa kãã ma duʼ rage gà wùr hay haʼ go ne hara de Manwuri, Baa mani Israyel no.

²⁰ Fen maga naa joŋ ge ra de ɓe diŋ ma kay no : Wer haʼge jag no naa id ra go gà Manwur day la caa jiili go ne naa ti.

²¹ Á joŋ ge mbaara tiʼ, waŋre ma pel jar Israyel kal wo ga jar sen la mo saɗ wo hããre day mo ɗad wo bii ne jar Israyel wo.

²² Josuwe raw ɗe jar Gabawoŋ wo le day riŋ ra ga : Wer mayse ga nday jãã wùr ga nday hoo le hãã ni paga nday de tiŋ ti jeŋ wùr la la?

²³ Patala nday go de faɗge. Wer mani ɓayn joŋ ge mbe tum gebeere. Nday joŋ ge yaŋ diŋ jar saɗ hããre, jar ɗad bii ma joŋre ɓil tiŋ mani Baa ɓi no.

²⁴ Jar Gabawoŋ kal wo ferge ne Josuwe ga : Wùr joŋ doosen nono werga à wii wùr go ga Manwuri, Baa ɓon hay hã jag go ne Moyis je peele ɓen ga sir mo tiʼ la ɓuy se hãn go we day se taw jar ma ɓil ɓen wo go ɓuy. Wùr joŋ hẽẽne doo ɓay nà wer maysee wùr wo.

²⁵ Patala wùr go nen doo ɓo, joŋ mbo wùr ti ngel ɓe doo maga ndo ɗig ga ndo joŋ wùr mbo nono.

²⁶ Josuwe joŋ ra doo maga se ɗig nono. Se men jar Israyel wo go id rage gà.

²⁷ Hãã le ti wur sen ni tuu Josuwe lag ra ma saɗ hããre ma ɗad bii ne ngaɓan lay, ma kay joŋre ma ti ngel siɗ jag mani Manwurn lay, ti ngel ma honla ɓuy ga se laa ra ni mo lay. A wo jag joŋre sen hãã wara.