JOSUWE 8 - Tupuri Bible

Jar Israyel yãã wo ɓi leege Ay

¹ Manwur day riŋ Josuwe ga : Caa hẽẽne go wa, daŋ jiili go wa lay! Hoo sooden wo wer ɓo ɓuy, ur go ciŋ, see wo dur jar Ay wo. Ko mbo ga ndi go de hã waŋ Ay wo de jar sir ɓen wo de ɓi leege ɓe no, de sir ɓen ɓuy mo doo.

² Ndo joŋ ge jar Ay wo de waŋ ɓaaran doo ga ndo hay joŋ jar Jeriko wo de waŋ ɓaaran no pa no. Ane fẽẽre maga nday daʼ ge ra ni de horog wo mo ɓuy, joŋ ge wo ma ɓay. Ndo ma ɓon mono, laa gǔu le ne hara faale tiŋ ɓaara no.

³ Josuwe kal urgi go ciŋ de sooden wo ɓuy ma woge dur jar Ay wo. Josuwe kal hoo soode ma de egre wo ndar dwee, kal laa rage de suŋ.

⁴ Day wii ra ga : Ko we see ɓay, wo we le laa gǔu ne ɓi leegen le nen faale ɓe. Ane lag we wo go hãã debaŋ wa, lag we go de gragge lay.

⁵ Ma ɓi wùr de jar ma ɓuy no, wùr wo ge yaŋ go see ɓi leegen mbaŋ. Day de maga á laa wo we le go ne wùr nen no, wùr hoo ɗeere yaŋ pel ɓaara doo ma taŋgun no pa no.

⁶ Day ni saara hoo ɗeere yaŋ le nii wùri, saara yaʼ yaŋ le go hãã see ɓi leege no werga á ɗig gi wo yaŋ ga : Á ɗee wo we doo naa doo ma taŋgun no pa no. De maga wùr hoo ɗeere we pel ɓaara no,

⁷ ni nday laa we le go, ɓug we ɓi leege no. Manwur hãn ge yaŋ mbe go we ɓi coo doo.

⁸ De maga nday ɓug gi ɓi leege we go no, ni nday hee we wùu go ne hẽne. See we ti jag mani Manwur no, ko we see ɓay day joŋ we doo maga ndi siin we nono.

⁹ Josuwe raw laa rage day saara wo laa gǔu ti holaŋ Betel wo de Ay nen faale Ay nen wur bolaw no kay no. Josuwe gwaʼ nage ti wur sen yoo jar ma ngaɓa no.

¹⁰ Toŋ ɓe de jag toŋ mbuh mono, Josuwe kal kee sooden wo go ɓuy, se kal woge leʼ Ay. Josuwe wo de jar kluuri ma pel jar Israyel wo pel sooden wo.

¹¹ Josuwe wo de soode ma wer ɓen wo wo go mbaŋ see Ay. Saara raw lagge le go nen ɓaŋ gloŋhwede ɓe no kay. Por hay go de caa nen ɓaara de Ay.

¹² Josuwe raw hoo jar nen ndar dwee, raw lag rage ti gǔu ti holaŋ Betel wo de Ay nen wur bolaw no kay no.

¹³ Te soode ma po wo de lagge nen ɓaŋ gloŋhwede, ma lan wo nen wur bolaw lay. Blam sen mokay Josuwe kal woge de suŋ ɓil log no.

¹⁴ De maga waŋ Ay wo de jar ɓen wo wo koge no kay mono, saara kal hooge go ciŋ de jag toŋ mbuh ma caa pel jar Israyel wo le ma dur rage. Waŋ Ay wo de jar ɓen kaŋ wo ti ɓaara ti jar ma ɓil logn tawa tuu, bay wo de koge ga jar ma tigriŋ yaŋ wo go de laa gǔu ne saara wa.

¹⁵ Josuwe wo de jar Israyel kal mbaara hoo ɗeere pel jar Ay wo tuu maŋ wo faage ma nen ɓil puuli no.

¹⁶ Jar Ay raw wo joŋ togle ne kããra ɓuy, kal wo hoo ɗeere wer Josuwe wo. Josuwe jãã wo ra wo go hãã see ɓi leege no.

¹⁷ Je twar po gwaʼ le ɓi leege Ay wo de Betel ga kal le go dur jar Israyel wo gà nà gà. Saara laa le go ɓuy ma nii jar Israyel wo, men wo jag tiŋ ɓaaran wo go de buŋgi.

¹⁸ Manwur kal wii Josuwe ga : Ɗaw jaw ma doo ɓon wo ne Ay ti, gahãyla ndi hãn go mo ɓi coo doo. Josuwe kal ɗaw jaw ma doo ɓen wo ne Ay ti.

¹⁹ De maga se maŋ doo ɓe ciŋ no kay, jar maga hay wo de laa gǔu laa wo le go deparday tuu, laa wo ɓi leege no, hee wo wùu go ne hẽne.

²⁰ Jar Ay mbuɗ wo nen ɓaara no kay ko wo cug go ndarge ciŋ ti tiŋ deŋ yaw. Saara kal dawge go, ngar maga saara mo joŋ no kay bay nen ɓaara wa so. Jar maga hay maŋ wo faage ma ɓil puulin raw wo ferge le de ɓaara niigi.

²¹ De maga Josuwe wo de jar Israyel wo wo koge ga jar saara ma ti gǔun yãã wo ɓi leegen go day wo go de hee wùu ne hẽn lay mono, saara raw mbuɗ nen le de jar Ay wo niigi.

²² Jar Israyel maga hay wo le ɓi leegen laa wo le go lay. Saara cir ti jar Ay wo go cwẽẽ ɓuy. Jar Israyel id wo ra go ɓuy, jobo boŋ daŋ go yoo ɓaara gà.

²³ Jar Israyel baa wo waŋ Ay le tenene, á wo de ɓe daʼ Josuwe.

²⁴ De maga Jar Israyel car wo jar Ay maga hay maŋ wo blam ɓaara wo ɓil puuli go de moslam day taw wo ra go ɓuy mono, saara fer le ɓi leege no, car wo jar maga sen hay gwaʼ wo ni go ɓuy de moslam lay.

²⁵ Werpiiri de naare maga à ii ra ti wur sen ni wo ɓuy ndar hwal ti ɓoge, diŋ jar Ay wo ɓuy.

²⁶ Josuwe ɗaw jaw ma doo ɓen go ciŋ ni kay hãã à id jar Ay wo go ɓuy ɗa.

²⁷ Ane Jar Israyel hoo wo horog de fũy wo de fẽẽre maga saara daʼ ra ɓi leegen ni ɓuy ma ɓaara doo maga Manwur hay wããn ne Josuwe nono.

²⁸ Josuwe roɗ ɓi leege Ay go, se kol go diŋ tabuli, hãã wara.

²⁹ Josuwe hag waŋ Ay go ti koo men go ni kaʼ hãã wur coŋ go. De maga wur go de leʼge gesiŋ mono, se kal riŋgi ga bud húulí ɓe le go. Saara raw ɓoʼge ɓe wo jag faage ma Ay no, kal wo tay húulí wo ne hẽn ti, húulì sen yaŋ wo hãã wara ni kaʼ ɗa.

Jar Israyel boo wo ngel siɗ jag ti húulì Ebal no

³⁰ Josuwe raw boo ngel siɗ jag ne Manwuri, Baa ma Israyeln ciŋ ti húulì Ebal no.

³¹ Á boon doo maga Moyis je peele Manwur hay wãã ne weere Israyel wo nono, doo maga á de yerge ɓil kefder jag liŋgi mani Moyis nono. Húulìn wo diŋ húulì ma hãy wo tuu, bay wo de ceɗge wa. Jar Israyel sii wo jag ti ngel sen ni ne Manwuri, saara kal joŋ siigi jag maga à roɗ fẽẽre ɓaaran go ɓuy wo ne Manwuri, siɗ wo jag ma joŋ suseʼ ne hẽne.

³² Ti ngel ni pa, Josuwe kal hoo húulì wo, kal ferge yer jag liŋgi mani Moyis go pel jar Israyel wo ni pa.

³³ Jar Israyel wo de jar kluuri ma yoo ɓaaran wo ɓuy, de waŋre sooden wo, de jar car kiida ɓaara wo, de waare wo de weere biŋni wo ɓuy, cir wo ti jar siɗ jag ma ti ɓĩĩni mani Lefin ga wo de komrom tayge jag mani Manwur wo ti go. Te jar po plaŋ wo nen ti húulì Garisim no, ma la plaŋ wo nen ti húulì Ebal no, de ngaɓge degaʼ doo maga Moyis je peele Manwur hay wãã go ga kaŋ bosaʼ ne jar Israyel wo ti doosen no mono.

³⁴ Blam sen Josuwe raw kee jag liŋgin go ɓuy, bosaʼ wo de faɗgen wo, doo maga á de yerge ɓil kefder jag liŋgin nono.

³⁵ Josuwe men mopo go see maga Moyis hay yer ra go mo gà hase. Se kee ra go pel ngaɓa jar Israyel maga hay wo de tayge ni mo ɓuy no. Pel naare wo de weere kleere wo, pel waare maga hay wo yoo jar Israyel wo ni mo ɓuy no.