JOSUWE 7 - Tupuri Bible

Akan joŋ ɓlagge day à ʼwarn go

¹ Paga jar Israyel cegaɗ wo jag Manwur we go ti fen maga Manwur hay riŋ ra ga á mo duʼ wo doo see ɓe wa mono. Jobo, ti ɓĩĩni mani Juda no, ɗúu ɓe ga Akan je ni Karmi no, moo Sabdi, didi Seragn kal hooge yoo fẽẽre maga à hay maŋ jag ɓaara go ti ɓe mono. Manwur raw caa jiili go ne jar Israyel wo ti debaŋ.

² De maga Josuwe Jeriko ni ɗa mono, se raw laa jar ko sir ma Ay no. Ay hay ɓiŋ Bet-Afen mbaŋ wo nen wur botoŋ Betel no kay no. Josuwe day wii ra ga : See we, wo we ko sir no. Jar sen la kal mbaara rawge ko ɓi leege Ay so.

³ De maga saara fer le daʼ Josuwe mono, saara wiin gana : Sen bay maga ngaɓan naa ɓuy wa so! Jar po wo la nen ndar ɓog noga swaʼ layblaʼ kãã mbaara yaŋ ma nii ɓi leege ma Ay no. Bay maga naa kaŋ gayre ne sooden wo ti ɓuy wa so, jar Ay bay wo ngaɓa wa.

⁴ Soode kal wo caage nen ndar swaʼa, jar Ay nii wo ra le.

⁵ Jar Ay ii wo jar wer ɓaara doo swaʼ ti hiiraʼa, tĩĩ wo nii rage jag feele Ay hãã kaŋ wo wer ɓaara wo go Sebarim, day ɓum wo ra wo go ti ngel ma de solge no. Jiili jar Israyel caa wo go, saara kal caa bii go ɓil lay.

⁶ Josuwe kal ngrag õõbe ma ti ɓen go, raw leʼge gesiŋ pel komrom mani Manwur no hãã wur coŋ go. Jar kluuri ma pel jar Israyel joŋ wo doosen no lay, saara lag sir ti ɓaara.

⁷ Josuwe day ga : Waŋkluu, Manwuri, ti re mayse ga ndo srog wer wùr le go cegaɗ Jurdẽẽ ma kaŋ wer wùr go laage ne jar Amorid wo ɓi coo doo ma yee nen wùr go la? Wùr de lag bà we le faale Jurdẽẽ ɓaŋla nà ɗawa yaw.

⁸ Waŋkluu, ndi wãã ge bà nà gahãy de maga jar Israyel ɗee wo le go doo jar hee ɓaaran wo mo so la?

⁹ Jar Kanaan wo de jar ma ɓil sirn la laa ge wo re seno day saara maŋ ge põõ le ti wùr ma taw wùr go so mono, ndo joŋ ge mayse maga ɗúu ɓo mo ra pa la?

¹⁰ Manwur kal wii Josuwe ga : Ur go ciŋ! Ti re mayse ga ndo caa waŋ de mbuɗ nen ɓo gesiŋ ni tiʼ la?

¹¹ Jar Israyel joŋ wo ɓlagge, á hoo wo sug ti tayge jag maga ndi hay tayn de ɓaara mo gà. Á maŋ wo fen maga ndi hay maŋ jag ɓaara go ti ɓe mono. Bà mo pa yaw no, saara maŋn freŋ, yoŋ wo ne, heen wo yoo fẽẽre ɓaaran wo.

¹² Jar Israyel kãã ge wo ma lagge ngiŋ pel jar hee ɓaaran wo gà. Á mbuɗ gi wo mbaara faale de ɗeere doo ɓaara gahãyla á kaŋ wo ɗag go ne see ɓaara see de see ɓaara. Ndi kãã ma kay nday gà hayga nday naa fen ɗag sen go ti yoo ɓay gà no.

¹³ Ur go ciŋ, fãã ngaɓan go! Wii ra ga á mo fãã wo see ɓaara go ma toŋ gahãyla Manwuri, Baa mani Israyel ga : Fen ɗag yaŋ ti yoo ɓay, nday jar Israyel no! Hayga nday naa fen ɗag sen go ti yoo ɓay gà no, nday kãã ma lagge ngiŋ pel jar hee ɓayn wo gà.

¹⁴ Toŋ de jag toŋ mono, lag we le go ti ɓĩĩni taʼ taʼa. Ɓĩĩni maga Manwur wii doo we ti sen no, lag ge wo yaŋ le go ti wer moorebe taʼ taʼa. Moobe maga Manwur wii doo we ti sen no, lag ge wo yaŋ le go ti feele taʼ taʼa. Feele maga Manwur wii doo we ti sen no, lag ge wo yaŋ le go ti jag tiŋ kaʼ kaʼa.

¹⁵ Je tiŋ maga re ɗag sen la naa nen we see ɓe no, à roɗn ge go de fẽẽre mani ɓen wo ɓuy. Á hoo sug ti tayge jag mani Manwurn gà á joŋ yoo go yoo jar Israyel wo.

¹⁶ Josuwe raw urgi go ciŋ de toŋ mbuhu, lag jar Israyel wo le go pel ɓe ti ɓĩĩni taʼ taʼa. Doo raw leʼge ti ɓĩĩni mani Juda no.

¹⁷ Se lag ɓĩĩni mani Judan le go ti moorebe taʼ taʼa. Doo raw leʼge ti moobe mani Serag no. Moobe mani Serag lag le go ti feele taʼ taʼa, doo raw leʼge ti feele mani Sabdi no.

¹⁸ Feele mani Sabdi lag le go ti jag tiŋ kaʼ kaʼa, doo raw leʼge ti Akan je ni Karmi moo Sabdi, didi Serag ti ɓĩĩni mani Juda no.

¹⁹ Josuwe day wii Akan ga : Wel ɓi, joŋ mbo ga Manwuri, Baa mani Israyel mo daʼ togoɗge ɗa la. Dom mbo ne ɗa la! Sii mbo fen maga ndo joŋn go me ɗegere, yoŋn doo ɓi wa.

²⁰ Á kal ferge ne Josuwe ga : Kidolgi, joŋ ɓlagge see Manwuri, Baa mani Israyeln nà diŋ ndi mbi. Fen maga ndi joŋ geɗer diŋ ma kay no :

²¹ Nen ɓi baa õõbe po yoo kããra ni ga woore ɓe daʼ gahãy gà ga à joŋn le ɓil sir Sineyar mono, de solay boo ni kiskis ɓog de boo biŋni po põõre ɓe nen klew doo naa ti boŋ lay. Nen ɓi sag ti ɓaara day ndi hoo ra. Á wo patala de yoŋre gesiŋ nen sir tiŋma ni ɓi, solay wo wer taw.

²² Josuwe kal laa jar deparday tiŋma no, saara wo daʼ fẽẽren de yoŋre doosen no cwãy no, solayn wo were.

²³ Saara hoo ra le go ɓuy a wo de ɓaara ne Josuwe wo de jar Israyel wo ɓuy. Saara raw coʼ rage pel Manwur kaʼa.

²⁴ Josuwe kal hoo Akan je ni Serag de solay no, de õõbe no, de boo biŋni no, de weere ɓen wo de mayre ɓen wo, de deere ɓen wo de gerhẽẽ ɓen wo de fǐiri ɓen wo, tiŋ mani ɓen de fẽẽre ɓen wo ɓuy. Jar Israyel tay wo see ɓaara de Josuwe ɓuy kaŋ wo ra wo ɓil log ma Akor no.

²⁵ Josuwe kal ga : Ndo mbuɗ foo wùr go no maʼ le la! Manwur mbuɗ foo ɓo yaŋ go ti wur se kaʼn wara lay. Jar Israyel wo ɓuy ɓod wo ra go de húulì, à kal roɗ rage go.

²⁶ À coʼ ɗugul húulì go ne hara ti. Hãã wara, húulì sen yaŋ wo wo ni kaʼ ɗa. Ɓil Manwur kal go fuggi ne hara ti so. Diŋ wersen no kay ga à ɗe ngel sen hãã wara ga log mani Akor mono.