JOSUWE 6 - Tupuri Bible

Jar Israyel yãã wo ɓi leege Jeriko

¹ Jar Jeriko tẽg wo jag korn go ti ɓaara kãd doo jar Israyel wo. Jobo kãã ma kalge go siigi noga kal wo ni gà hase.

² Manwur day wii Josuwe ga : Ndi hã sir ma Jerikon go mo ɓi coo doo de waŋ ɓe no, de soode ɓe ma de egren wo ɓuy.

³ Nday de sooden wo ɓuy, kii we ti ɓi leege no. Ti naw hiiraʼ nday kii gi ti ɓe yaŋ nen síilí kaʼ ɓaale boŋ.

⁴ Jar siɗ jag po wo renam mo hoo wo cõõ gamlaare wo doo ɓaara, day mo see wo pel komrom mani Manwur no. Ti naw ma de renamn mono, nday kii gi ti ɓi leegen yaŋ ɓaale renam day ni jar siɗ jagn mo ʼwaa wo cõõ no.

⁵ De maga á ʼwaa wo cõõ wo we, day nday laa ge roo cõõ wo we no, ni ngaɓan ɓuy mo swele. Kor ma ti ɓi leegen leʼ yaŋ go de see ɓe ni nday laa we ɓi leege no, wosela ɓuy mo see pel ɓe de deele.

⁶ Josuwe je ni Nun kal ɗe jar siɗ jagn wo day riŋ ra ga : Maŋ we komrom tayge jagn ti ɓay. Jar po yoo ɓay renam mo hoo wo cõõ doo ɓaara, mo see wo pel komrom mani Manwur no.

⁷ Blam ɓe Josuwe kal wii ngaɓan ɓuy lay ga : See we, kii we ti ɓi leege no, jar durgin mo kol wo go pel komrom no.

⁸ Saara kal joŋge doo maga Josuwe wããn ne hara no ɓuy no. Jar siɗ jag ma renamn kal wo hoo cõõ doo ɓaara, kal wo hoo seele pel komrom mani Manwur no, wo tiʼ ʼwad cõõ wo. Jar ma de komrom mani Manwurn wo ti wo le blam ɓaara.

⁹ Jar durgi ma po wo de seege pel ʼwad cõõn wo, ma lan wo le wer komromn lay. De maga saara ti seele mo tiʼ no, à de ʼwad cõõn wo tuu tuu lay.

¹⁰ Josuwe hay go de wii ngaɓan an ga á mo ngar wo jag wa lay, mo wãɗ wo wããre wa lay, mo see wo jag baʼbaʼ say á mo wii ra ga swel we ɗa ni á mo swel wo kay so.

¹¹ Jar Israyel kii wo ti ɓi leege Jeriko de komromn boŋ, saara kal wo ferge ti ngel lagge ɓaara hãã ngel tee go.

¹² Toŋ mokay Josuwe kal urgi go ciŋ de toŋ mbuhu. Jar siɗ jag raw wo maŋ komrom mani Manwurn ti ɓaara.

¹³ Jar siɗ jag ma de cõõ gamlaaren wo doo kal wo hoo seele pel komrom mani Manwur no, wo tiʼ de ʼwad cõõn wo. Jar durgi ma po wo pel ɓaara, ma lan wo le wer komrom mani Manwur no. De maga saara ti seele mo tiʼ no à de ʼwad cõõn tuu tuu lay.

¹⁴ Jar Israyel kii wo ti ɓi leege Jeriko ti naw se ma de ɓogn ni boŋ pa, saara fer go ti ngel lagge ɓaara. Saara joŋ doosen nono nen naw hiiraʼa.

¹⁵ Ti naw ma de renamn mono, saara kal hooge go ciŋ de maga waa naa le go mono. Saara kii ti ɓi leegen ɓaale renam de sraʼge doo ma taŋgun no pa no. A kii wo ti ɓi leegen ɓaale renam nà ti wur sen tawa tuu.

¹⁶ Ti naw ma de renamn mokay so no, jar siɗ jagn kal wo ʼwaa cõõn wo. Josuwe kal wii ngaɓan ga : Swel we, gahãyla Manwur go de hã ɓi leegen we.

¹⁷ Manwur caa ge wer ɓi leegen mo tiʼ la go de jar ma ɓil ɓen wo ɓuy. Gwaʼ ge diŋ Rahab mangawlaŋn wo de jar ma liŋ ni ɓen wo tawa tuu werga Rahab hay yoŋ jar maga naa hay laa ra le ko ngel wo de ele.

¹⁸ Ane ko we see ɓay, ɗaw we see ɓay. Baa we doo ti fen ɗag po nen maga nday kaŋ ɗag ne ngaɓa jar Israyel wo see day re po caa ra wa.

¹⁹ Solay, boo biŋni, fẽẽre maga wo de yorge de boo dobe noga wo de torge de boore sen wo mo ɓuy joŋ ge wo yaŋ go ti nen taʼ ma Manwuri. À laa ge ra ɓil tiŋ horog mani Manwur no.

²⁰ Ngaɓan raw swelge. À raw ʼwaa cõõn wo. De maga ngaɓan laa roo cõõn mokay, saara raw swelge. Kor ma ti Jerikon raw leʼge mbe go de see ɓe tuu. Ngaɓan raw wo laage ɓi leege no, wosela ɓuy see pel ɓe de deele. Jar Israyel yãã wo ɓi leege no.

²¹ Werpiiri de naare, weere kleere de jar ma de tããrebe, deere de sããre de gerhẽẽ maga hay wo ɓi leegen ni mo ɓuy, jar Israyel caa wo wer ɓaara go, car wo ra go de moslamre wo.

Jar Israyel men wo Rahab tenene

²² Josuwe hay wii jar ma ɓog maga hay a wo ko ngel ga á mo wo wo liŋ ni mangawlaŋ no, mo hoon wo le go de fẽẽre ɓen wo ɓuy doo maga á hay haʼ wo go ne hẽn nono.

²³ Weere jõõre se maga hay a wo ko ngel la raw wo laa Rahab wo le go de pan ɓe, de man ɓe, de hẽẽre ɓe wo de fẽẽre ɓen wo ɓuy. Saara yoŋ ra wo go sara lag de ngar ngel lagge jar Israyeln wo.

²⁴ Blam ɓe saara kal hee wùu go ne ɓi leegen de fẽẽre ma ɓil ɓen wo ɓuy. Gwaʼ diŋ solay, boo biŋni, de fẽẽre ma de yorge de boo dobn wo de ma de torge de boore wo mo tawa no. À laa sen wo ɓil tiŋ horog mani Manwur no.

²⁵ Josuwe men Rahab mangawlaŋ wo de jar ni ɓe wo tenene, de fẽẽre ɓaaran wo ɓuy. Saara joŋ de tiŋ yoo jar Israyel wo werga Rahab yoŋ jar maga Josuwe hay laa ra le ko Jeriko wo de el mono.

²⁶ Josuwe kal haʼge go deŋ pel Manwur ga : Faɗge go ti je maga ur gi ga se fer laa Jeriko pa mono. Je sen ɓoʼ ge wer tiŋ ɓen ti jag wel ɓe no day her ge ɓen wo go ti wel ɓe ma kleen lay!

²⁷ Manwur joŋ de Josuwe, riŋ Josuwe leʼ go ɓil sir ni ɓuy.