JOSUWE 5 - Tupuri Bible

Jar Israyel caa wo ɓĩĩni ɓaara ɓi leege Gilgal

¹ De maga waŋre mani jar Amorid ma faale Jurdẽẽ nen wur bolaw wo de waŋre mani jar Kanaan ma ti jeŋ maarog wo ɓuy laa wo ga Manwur caa ɓil bii ma Jurdẽẽ go ne jar Israyel wo pel mono, jiili ɓaara daŋ ra go doo hẽẽne, caa ra go doo jar Israyel wo.

² De ngar ngel sen ni Manwur kal wii Josuwe ga : Ceɗ mbegre húulì wo ni ndo caa ɓĩĩni jar Israyel wo go ni ɓaale boŋ pa.

³ Josuwe kal ceɗ mbegre húulì sen wo, raw caa ɓĩĩni jar Israyel wo go ciŋ ti húulì ma Aralod no.

⁴ Mokay no diŋ fen maga Josuwe caa ɓĩĩni ɓaara ti re ɓe mono, jar maga laa wo le go Ejipte mo ɓuy, werpiiri de jar durgin wo ɓuy huu wo le go ti faage ɓil puuli blam maga saara men sir Ejipte le go mono.

⁵ Jar maga hay laa wo le go ɓil sir Ejipte mo ɓuy wo go de caa ɓĩĩni, ama maga sen biŋ wo ti faage ɓil puuli blam maga saara men sir Ejipte le go hay bay wo de caa ɓĩĩni wa.

⁶ Werga jar Israyel hay joŋ wo kiŋgi doo naa ɓil puuli hãã jar maga hay wo de kããge ma durgi ti wur maga saara laa le go ɓil sir Ejipte taw wo go ɓuy ɗa. A hay yãã wo jag Manwur gà diŋ wersen so Manwur raw haʼge go ga á ko wo sir maga se hay hã jag go ne pããre ɓaara wo ti ɓe mo gà sir se maga pãã wo de noo yõõre yuu wo ni mono.

⁷ Manwur kol weere ɓaara wo go ti ngel ɓaara, Josuwe caa nà diŋ ɓĩĩni weere sen wo gahãyla á hay bay wo de caa ɓĩĩni wa werga jobo caa ɓĩĩni ɓaara de maga saara ti faagen mo tiʼ gà.

⁸ De maga à caa ɓĩĩni jar go ɓuy, saara lag ti ngel ni hãã wããge ɓaaran rug wo go ɓuy ɗa.

⁹ Manwur kal wii Josuwe ga : Ndi maŋ sõõre ma Ejipten we go ne nday ti wara so. Le ti wur sen ni hãã wara, saara ɗe ngel sen ga Gilgal.

Jar Israyel joŋ wo few Pag ma taŋgu ɓi sir Kanaan

¹⁰ Jar Israyel laa wo tiŋ Gilgal ni. Saara raw joŋ few Pag de law ti naw ma hwal ti naa nen few ma taŋgun ɓil ful ma Jeriko no.

¹¹ Toŋ ɓe mokay saara tĩĩ re coore ma ɓil sir ni. Ti wur sen ni saara re hoole ma bay defõõre, soo wo coore ma de cogge lay.

¹² De maga jar Israyel baa wo jag go ne coore ma ɓil sir see mono, Mann taw lagge go toŋ ɓe tuu. Saara daʼ Mann gà so, saara re nen kiŋgi sen ni diŋ fẽẽre ma ɓil sir Kanaan wo.

Waŋ jar durgi mani Manwurn a daʼ Josuwe

¹³ Wer maga Josuwe hay wo ti jeŋ Jeriko mbaŋ mono, se kal maŋ nen ɓe wo ciŋ, kola jobo de oole pel ɓe la deŋ de moslam bay fra ti doo kay. Josuwe raw woge ɓiŋ ɓe day wiin ga : Ndo nà diŋ je ma wer wùr yaw noga je hee wùr yawla?

¹⁴ Je sen la kal ferge ne hẽn ga ndi bay diŋ je hee wa, ama ndi diŋ waŋ soode mani Manwur wo. Ndi de age mokay ɗa no. Josuwe raw leʼge gesiŋ pel ɓe, goŋ ne, day ga : Waŋkluu wãã ne gebee ɓen bà nà gahãyla?

¹⁵ Waŋ soode mani Manwurn wo, kal wii Josuwe ga : Ndar taarag ma ɓaale ɓon wo go gahãyla ngel maga ndo ni mo hãʼ diŋ ngel ma bay ɗage. Josuwe raw joŋge doosen nono.