JOSUWE 4 - Tupuri Bible

Ɗugul húulì ma hwal ti ɓogn wo

¹ De maga jar Israyel cegaɗ wo Jurdẽẽ go ɓuy so mono, Manwur kal wii Josuwe ga :

² Hoo jar hwal ti ɓog yoo ngaɓa no, baa go ti ɓĩĩnin wo boŋ boŋ ɓuy.

³ Wii ra ga á mo far wo húulì doo ɓaara boŋ boŋ hwal ti ɓog ɓuy, ti ngel maga jar siɗ jagn wo de lagge ni mono. A mo wo wo coʼ rage ti ngel maga nday nà ge ni mono.

⁴ Josuwe kal hoo jar hwal ti ɓog yoo jar Israyel wo, go ti ɓĩĩnin wo boŋ boŋ ɓuy

⁵ day riŋ ra ga : Kol we go pel komrom mani Manwuri, Baa ɓay no, wosela ɓuy mo maŋ húulì bay ɓe boŋ boŋ ɓuy, de ngaɓge degaʼ de ɓĩĩni jar Israyel wo.

⁶ Sen mono nen maga weere ɓayn mo ko wo ni. De maga á wii gi wo we wurpo ga húulì sen mo kaʼ kaŋ nen ti mayla no,

⁷ ni nday wii ra ga de maga komrom mani Manwur hay cegaɗ Jurdẽẽ go mono, biin caa ɓil go ne hẽn pele. Húulì sen wo la joŋ ge wo yaŋ diŋ fen kaŋ nen weere ɓay wo ti se no.

⁸ Jar Israyel kal wo joŋ fen maga Josuwe wii ra ti ɓe mono, saara hoo húulì ma hwal ti ɓogn wo le ɓil Jurdẽẽ go ti ɓĩĩnin wo boŋ boŋ ɓuy doo maga Manwur hay wããn ne Josuwe nono. Saara kal coʼ húulì sen wo ti ngel maga saara nà ni mono.

⁹ Josuwe raw ɗegal húulì ma tigriŋ wo hwal ti ɓog ti gesiɗgi Jurdẽẽ ti ngel maga jar siɗ jag hay wo de lagge ni mono, hãã wara húulì sen yaŋ wo ni ɗa.

¹⁰ Jar siɗ jag ma soɗ komromn lag wo ɓil Jurdẽẽ ni lag hãã à joŋ fẽẽre maga Manwur hay wii Josuwe ti ɓaara go ɓuy ɗa, de ngaɓge degaʼ de fen maga Moyis hay yern go ne Josuwe mo ɓuy no. Ngaɓan cegaɗ go deparday.

¹¹ De maga á cegaɗ wo go ɓuy mono, jar siɗ jag kal wo ɗiigi go de komrom mani Manwurn ciŋ, kal wo kolge go pel ngaɓa no.

¹² Jar ma ti ɓĩĩni mani Ruben wo de mani Gad wo de nus jar ma ti ɓĩĩni mani Manasen kal wo kolge go pel ngaɓan de fẽẽre durgi ɓaaran wo doo, doo maga Moyis hay wii ra nono.

¹³ Á hay wo nen ndar doo naa tiʼ pel Manwuri, go de gragge ma durgi, wo de kaŋ ti ne ful ma Jeriko no.

¹⁴ Wur sen ni mono, Manwur kol Josuwe kluu nen jar Israyel wo. Saara hoo sug ti ɓe nen naw maga se tenen mo ɓuy doo maga saara hay hoo sug ti Moyis no lay no.

¹⁵ Manwur day wii Josuwe ga :

¹⁶ Wii jar siɗ jag ma soɗ komrom ma sedewan wo ga á mo ɗii wo go ciŋ.

¹⁷ Josuwe kal wii rage ga : Ɗii we le go ciŋ.

¹⁸ De maga jar siɗ jag ma soɗ komrom mani Manwur ɗii wo go ciŋ day ɓaale ɓaara duɗ wo ti ngel ma de heeg no kay mono, bii ma ɓil Jurdẽẽ fer go ti ngel ɓe, dug go ti ngel ɓe fẽẽfẽẽ doo ma taŋgu nono.

¹⁹ Jar Israyel cegaɗ wo Jurdẽẽ go ti naw ma de hwal nen few ma taŋgu no, saara kal lagge Gilgal ti cõõ sir ma Jeriko ma nen wur botoŋ no.

²⁰ Josuwe raw ɗegal húulì ma hwal ti ɓog maga se hay hoo ra le ɓil Jurdẽẽ Gilgal ni.

²¹ Day se wii jar Israyel wo ga : De maga weere ɓay wii wo jag ɓay we wurpo ga húulì sen wo mo kaʼ kaŋ nen ti mayla no,

²² ni nday naa wer ɓe ne hara day ni nday wii ga jar Israyel hay cegaɗ wo Jurdẽẽ le go ti ngel de heege.

²³ Werga Manwuri, Baa ɓayn hay caa ɓil bii go ne nday pele day nday cegaɗ go ti ngel de heeg doo maga Manwur hay caa ɓil maarog ma de sẽẽn go ne wùr pele day wùr cegaɗ go ti ngel de heeg no lay no.

²⁴ Manwur joŋ fẽẽre sen wo mono nen maga wer jar ma ti tamsir wo ɓuy mo ko wo ga se diŋ Baa ma de egre no, day pa nen maga nday mo joŋ hẽẽne doo Manwuri, Baa ɓay no.