JOSUWE 3 - Tupuri Bible

Jar Israyel cegaɗ wo Jurdẽẽ go

¹ Josuwe kal urgi go ciŋ de toŋ mbuh de jar Israyel wo, saara kal men Sitim go, kal wo hooge wo wo go jag Jurdẽẽ. Saara nà ni.

² Naw wo maŋge go swaʼ mono, jar kluuri soode ma yoo ɓaaran kal wo raŋ yoo ɓaara go ɓuy ma riŋ rage ga :

³ De maga nday ko komrom mani Manwurn we ti jar siɗ jag ma ti ɓĩĩni mani Lefin wo taʼ no ni nday hoo go ciŋ, maŋ we blam ɓe.

⁴ Ane nday yaʼ ge wo wer ɓe maŋ gà holaŋ ɓay joŋ ge go mbeɗa see ɓe nen klew meeder boŋ, kaŋ ge nen ɓay ti faagen nà diŋ se, werga nday hee ti faage sen la ti boŋ gà.

⁵ Josuwe kal wii ngaɓa jar Israyel wo ɓuy ga : Fãã we see ɓay go, gahãyla toŋ mokay Manwur joŋ ge fen mbuɗgi yaŋ ti yoo ɓay.

⁶ Josuwe day wii jar siɗ jag wo lay ga : Maŋ we komrom tayge jag no, see we pel ngaɓa no. Saara raw maŋ komrom no, kal wo maŋ faage pel ngaɓa no.

⁷ Manwur kal riŋ Josuwe ga : Wara ndi kol mo go kluu nen jar Israyel wo so, nen maga á mo ko wo ga ndi yaŋ de ɓo doo ga ndi hay joŋ de Moyis no lay no.

⁸ Day ndo ma ɓon wii jar siɗ jag wo ga : De maga nday day we ti diŋdiŋ bii no, lag we nen bii ni nday lag ɓil Jurdẽẽ ni lagge.

⁹ Josuwe day wii jar Israyel wo ga : Yaʼ we see ɓay le laa wããre mani Manwuri, Baa ɓay no.

¹⁰ Josuwe day pa ga : Mokay diŋ fen maga kaŋ nen ɓay yaŋ mbalmbal ga Baa ma tenen yoo ɓay, fen maga kaŋ nen ɓay ga á nii gi jar Kanaan wo, jar Hitid wo, jar Feresidn wo, jar Girgasidn wo, jar Amoridn wo de jar Jebusidn wo yaŋ go ne nday pel kidolgi mono.

¹¹ Komrom tayge jag mani Waŋkluu je wãã re tamsirn ɓuy kal ge yaŋ pel ɓay ma cegaɗ Jurdẽẽ go.

¹² Hoo we jar hwal ti ɓog go ti ɓĩĩni mani jar Israyel wo boŋ boŋ ɓuy.

¹³ Day de maga ɓaale jar soɗ komrom mani Manwur je wãã re tamsirn ɓuy baa wo bii we no, Jurdẽẽ caa ɓil yaŋ go. Bii maga le de yuugi oo ge yaŋ day coʼ ge ɗugul yaŋ ti kẽẽ kaʼa.

¹⁴ De maga jar Israyel men wo ngel maga saara hay ni go ma woge cegaɗ Jurdẽẽ go mono, jar siɗ jag ma soɗ komrom kal wo maŋ faage pel ɓaara.

¹⁵ Ti wur sen ni doo maga á joŋ tum ti wur weege no mono, Jurdẽẽ hay go de duggi fẽẽfẽẽ. De maga ɓaale jar siɗ jag ma soɗ komrom baa wo bii no kay mono,

¹⁶ bii maga hay le yuugi kal ooge, raw coʼ ɗugul ne kẽẽ ti le go hãã see ɓaara de ngar ɓi leege Adam ma ti jeŋ Sartan no. Bii maga hay wo go yuugi nen maarog ma ɓil ful ga diŋ maarog ma luglug sol wo go tuu lay. Jar Israyel cegaɗ wo wo go ti ngel maga de kaŋ ti ne Jeriko mono.

¹⁷ Jar siɗ jag ma soɗ komrom tayge jagn lag wo ɓil Jurdẽẽ ni lag ti ngel de heege, hãã jar Israyel cegaɗ wo go ɓuy ɗa.