JOSUWE 24 - Tupuri Bible

Josuwe tay jag jar Israyel wo de Baa pa

¹ Josuwe kal tay wer jar Israyel wo le go ɓuy ɓi leege Sikem. Se raw ɗe jar kluuri ɓaaran wo le de waŋre ɓaaran wo, jar car kiida ɓaaran wo de jar kluuri sooden wo ɓuy. Saara raw tayge le pel Baa.

² Josuwe day wii ngaɓan ɓuy ga : mokay diŋ wããre ma jag Manwuri, Baa mani Israyel no : Moore ɓay wo doo Terag pan Abraham wo de Nakor nono, hay wo le ɓaa de tiŋ faale maarog ma de pããge no. Saara hay joŋ peele ne baa ma tigriŋ wo.

³ Ndi hay baa pan ɓay Abraham le faale maarogn le ɓaŋla ni, day ndi raŋ sir ma Kanaan go de ɓe ɓuy. Ndi tes wer mani ɓe no ndi kal hã Isag ne hẽne.

⁴ Ndi hã Jakob wo de Esaw ne Isage. Ndi hã húulì ma Seyir ne Esaw ama Jakob wo de jar ni ɓe raw wo woge Ejipte.

⁵ Ndi laa Moyis wo wo de Aaron day ndi kaŋ bon ne sir Ejipte de wer fẽẽre wo sar sare, blam ɓe ndi laa we le go.

⁶ Ndi laa pããre ɓay wo le go ɓil sir Ejipte day nday a go jag Maarog ma de sẽẽ no. Jar Ejipte maŋ wo blam ɓaara le hãã a wo go jag maarog ma de sẽẽn de pus durgi ɓaaran wo.

⁷ Pããre ɓay kal wo laa roo ne Manwur ti, se raw kaŋ suŋgu ti holaŋ ɓay de jar Ejipte wo. Se kal maŋ bii go ne hara ti, maarogn ɓoʼ go ne hara ti. Nen ɓay hay yaŋ de ko fen maga ndi joŋ Ejipte de ɓe mono. Nday joŋ kiŋgi debaŋ ɓil puuli.

⁸ Ndi koɗ nday hãã a go de ɓay ti sir mani jar Amorid maga wo wo go faale Jurdẽẽ ma ɓaŋla no. Saara dur we day ndi hã ra go we ɓi coo doo. Nday yãã sir ɓaaran no, ndi taw ra go we pele.

⁹ Je ni Sipor, Balag waŋ Mohab kal urgi le ma age dur nday. Se kal ɗe Balam je ni Bowern le ga á mo a go faɗ weege.

¹⁰ Ama ndi laa jag Balam gà se kal kaŋge we ti diŋ bosaʼa. Ndi yãã we go doo Balage.

¹¹ Nday cegaɗ Jurdẽẽ le go, day nday kal age go Jeriko. Waŋre ma Jerikon dur wo we. Jar Amorid wo, jar Feresid wo, jar Kanaan wo, jar Hitid wo, jar Girgasid wo, jar Hifid wo de jar Yebusid wo ɓuy dur wo de ɓay. Ndi kal hã rage go we ɓi coo doo.

¹² Ndi kaŋ deburicay ne waŋre ma ɓog mani jar Amoridn wo ti, saara dus ɓil ɓaara go we pele. Ndi nii ra bay de moslam ma doo ɓayn wa, bay de waa ma doo ɓayn wa lay.

¹³ Ndi hã sir maga nday parn gà de ɓi leege maga nday bor tiŋ ma ɓil ɓaaran wo gà ne nday, day nday lag go patala ɓil ɓaara. Ndi hã pay tlalum wo de Olifiye maga nday peɗ ra gà ne nday, day nday de re rage wara.

¹⁴ Patalam no, joŋ we hẽẽne doo Manwuri, joŋ we peele ne hẽn ti faage ɓe, de deele lay. Lag we baa maga pããre ɓay hay wo le joŋ peele ne hara faale maarog noga le Ejipte wo wo go day ni nday joŋ we peele ne Manwuri.

¹⁵ Day hayga nday ko we ga joŋge peele ne Manwur de ɓlagge nen ɓay no, baa we je maga nday da joŋ peele ne hẽn go wara : baa maga pããre ɓay hay wo le joŋ peele ne hara faale maarog mo layblaʼa, baa mani jar Amoridn maga nday ɓil sir ni ɓaara mo layblaʼa no. Wùr ma wùr de jar ni ɓi wùr joŋ ge peele nà diŋ ne Manwuri.

¹⁶ Ngaɓan kal yiŋ jag ne Josuwe ga no : Ɗiggi se ga wùr tob Manwur go day wùr raw joŋ peele ne baa ma tigriŋ wo bay ɓil wùr wa.

¹⁷ Werga, Manwur diŋ Baa wùri. Laa wùr le go ɓil sir Ejipte tiŋ gebee nà diŋ se, wùr de pããre wùr wo. Joŋ fẽẽre mbuɗgi ma kluuri ga nen wùr ko ra nà diŋ se day ɗaw wùr le doo ti faage maga wùr see le ni noga yoo jar maga wùr hee le ni ɓaara mo ɓuy nà diŋ se.

¹⁸ Nii wer jar wo de jar Amorid maga wùr ɓil sir ɓaara mo tiʼ la go ne wùr pel nà diŋ se. Wùr lay, wùr joŋ ge peele nà diŋ ne Manwuri werga á diŋ Baa wùr no.

¹⁹ Josuwe kal wii ngaɓan ga : Nday kãã ge ma joŋ peele ne Manwur gà werga á diŋ Baa ma bay ɗage, á diŋ Baa ma de huni. A fug gi ɓil go we ti ti debaycõõre ɓay wo de ɓlagge ɓayn wo gà.

²⁰ De maga nday tob Manwur we go day nday raw we joŋ peele ne baa ma waare wo no, se kol ge yaŋ joŋ weege de ɓlagge day se caa ge wer ɓay go blam maga se joŋ de el go see ɓay mono.

²¹ Ngaɓan kal ferge ne Josuwe ga : Á joŋ ge no gà werga wùr joŋ ge mbe peele yaŋ ne Manwuri.

²² Josuwe kal wii ngaɓan ga : Nday de see ɓay tuu nday diŋ sedewa ti see ɓay werga nday baa de see ɓay ga nday da joŋ peele nà diŋ ne Manwuri. Saara kal yiŋ jag ne hẽn ga : Wùr de see wùr tuu wùr yaŋ mbe diŋ sedewa ti see wùri.

²³ Josuwe day pa ga : Lag we baa ma waare ma yoo ɓayn wo wo go patala, kaŋ we ɗiggi ɓay ti Manwuri, Baa mani Israyel no.

²⁴ Ngaɓan kal wii Josuwe ga : Wùr joŋ ge mbe peele yaŋ ne Manwuri, Baa wùr no, day wùr lag ge mbe yaŋ ti jag ɓe.

²⁵ Josuwe kal tay jag ti wùr sen ni de ngaɓa no. Se kal hã jag liŋgi wo ne hara Sikem ni, hã jag liŋgi ma ɓod faage wããre wo ne hara ni lay.

²⁶ Josuwe kal yer fẽẽre sen wo go ɓil kefder jag liŋgi mani Baa no. Se kal maŋ húulì ma kluu, raw ɓoʼge ɓe wer Cen ma jag ngel ma bay ɗag mani Manwur no.

²⁷ Josuwe day wii ngaɓan ɓuy ga : Huulin mo tiʼ joŋ ge yaŋ diŋ sedewa ti holaŋ naa de kããra. Á yaŋ de laa wããre maga naa fer ra ne kããra mo ɓuy no. Á joŋ ge yaŋ diŋ fen maga fer ge wããre go ti ɓay mo tuu de maga nday tob ge Baa ɓayn we go mono.

²⁸ Josuwe kal hã faage ne ngaɓan maga á mo fer wo liŋ ni ɓaara, wosela ɓuy ti tway ɓe.

Húulí Josuwe wo de Eleyasar

²⁹ Blam fẽẽre sen wo mono, Josuwe je ni Nun, je peele Manwurn kal huugi go ti kiŋgi kis ti ɓe hwale.

³⁰ À kal teege ɓe ti tway mani ɓen ɓi leege Timnat-Serag ciŋ ti húulì ma Efrayim wo go ɓaŋ gloŋhwede húulì ma Gaas no kay no.

³¹ Jar Israyel joŋ wo peele ne Manwur de maga Josuwe hay tenen ɗa mono. Saara joŋ peele ne hẽn de maga jar kluuri maga hay wo de Josuwe ga ko wo joŋre maga Manwur joŋ ra see jar Israyel wo mo ɓuy wo tenen ɗa mo lay.

³² À tee hm Josef maga jar Israyel hay hoo ra wo le Ejipte go Sikem ti ngel maga Jakob hay yeen doo jar ni Hamor pan Sikem solay kis mono. Ngel sen hay ti tway mani jar ni Josefn wo.

³³ Eleyasar je ni Aaron kal huugi go lay. À kal teege ɓe go ti húulì mani wel ɓe Fineyas no. À hay hã húulì sen ne hẽn wo yoo húulì ma Efrayim wo.