JOSUWE 23 - Tupuri Bible

Josuwe fer jag húulí ɓe go ne jar Israyel wo

¹ Naw raw go debaŋ blam maga Manwur hã ngel iggi go ne jar Israyel wo day yãã ra go doo jar hee ɓaaran wo lay mono. Josuwe hay go de tããbe lay, kiŋgi ɓe joŋ go pur lay.

² Josuwe kal ɗe jar Israyel wo le ɓuy de jar kluuri ɓaaran wo, de waŋre ɓaaran wo, de jar car kiidan wo de jar kluuri sooden wo se day riŋ ra ga no : Ndi taw tããbe go debaŋ, kiŋgi ɓi joŋ go pur lay.

³ Nday de see ɓay nday yaŋ de ko fen maga Manwuri, Baa ɓayn joŋ wer jar lan wo de ɓe mono. Werga je maga hay durgi wer ɓay mo nà diŋ Manwuri, Baa ɓay no.

⁴ Ko we mbay, ndi hã tway go we diŋ de naage wãywáale. Tĩĩ wer ti jar maga sir ɓaara gwaʼ bay yããge leʼ go de sir maga ndi caa wer jar ma ɓil ɓaaran wo go ɓuy, ndi hãn go we. Sirn maŋ le ti Jurdẽẽ kaʼ leʼ wo go jag maarog ma kluu ma nen wur bolaw no.

⁵ Manwuri, Baa ɓayn maŋ ge ɓil ɓaara yaŋ wo go see ɓay hãã day nii gi ra yaŋ go ne nday pele. Nday yãã ge sir ɓaaran wo yaŋ go doo maga Manwur, Baa ɓayn hay wããn we nono.

⁶ Tob we egre ɓay go ma hoo sug ti fen po ɓuy maga de yerge ɓil kefder jag liŋgi mani Moyisn mono, nen maga nday mo joŋ joŋre de ɓaara. Cel we go ti doo war wa lay, go ti doo gur wa lay.

⁷ Sen mono nen maga nday mo tay see ɓay go de wer jar maga gwaʼ wo yoo ɓay la ni mo wa. Nday ɗe ge ɗúu baa ɓaaran wo jag ɓay gà nday haʼ ge de ɓaara gà lay, nday joŋ ge peele ne hara gà lay, nday laa ge kõyõgre pel ɓaara gà lay.

⁸ Ane nday saʼ ge see ɓay yaŋ see Manwuri, Baa ɓayn doo maga nday hay joŋ le hãã wara nono.

⁹ Manwur hay nii jar ma ngaɓa ma de egre wo go ne nday pele, hãã wara, jobo oo deŋ pel ɓay dur weege gà.

¹⁰ Jobo boŋ, yoo ɓay nii jar ndare werga Manwuri, Baa ɓayn hay durgi wer ɓay doo maga se hay wããn we nono.

¹¹ Ko we see ɓay de ele, da we Manwuri, Baa ɓay no.

¹² Hayga nday mbuɗ faale we ne hẽne, day nday tay we go de wer jar se maga gwaʼ wo yoo ɓay mono, hayga nday tay jag we go de ɓaara ti kaŋge kããra day nday tay nen we go de ɓaara no,

¹³ ko we go ti ɓay de el ga Manwuri, Baa ɓay joŋ ge wo tum nii wer jar sen wo go ne nday pel gà. Saara kol ge yaŋ see ɓay diŋ bày wo de rew, diŋ mbreŋ ma jwag we ge yoo, diŋ hõõre ma ɓer we ge nene hãã nday yeege nen go ti sir se maga Manwuri, Baa ɓayn hay hãn go we mono.

¹⁴ Ma ɓi ndi day rawge ti ngel maga jar ɓuy wo wo ni mono. Nday yaŋ de koge le go ɓil ɓay tem, go de maysee ɓay ɓuy ga wããre ma de el maga Manwuri, Baa ɓayn hay wãã ra ti ɓay mono, ma po gwaʼ bay leʼ jag gà gà. Á bag wo jag go ti ɓay ɓuy, ma po gwaʼ bay ɓoʼ jag gà hase.

¹⁵ Doo maga Manwuri, Baa ɓayn bag jag wããre ma de el maga se hay wãã ra ti ɓay go ɓuy nono, diŋ doosen no taw taw pa Manwur kaŋ ge bon maga se hay wãã ti ɓaara mo ɓuy go ne nday ti lay hãã se kol ge go ma taw weege go ti sir se ma de woore maga Manwuri, Baa ɓayn hay hãn we mono.

¹⁶ Hayga nday ɓlag tayge jag maga Manwuri, Baa ɓayn hay tayn de ɓay we go, hayga nday raw we joŋ peele ne baa ma tigriŋ wo day nday laa kõyõgre we pel ɓaara no, baage põõ mani Manwur leʼ ge we ti, day nday caa ge wer go deparday ti sir se ma de woore ga á hay hãn we mono.