JOSUWE 22 - Tupuri Bible

Jar durgi ma ɓil sir ma nen wur botoŋ fer wo le liŋ so

¹ Dayge so, Josuwe kal ɗe jar durgi ma ti ɓĩĩni mani Ruben wo, ma ti ɓĩĩni mani Gad wo de nus ɓĩĩni mani Manase maga wo wo go faale Jurdẽẽ nen wur botoŋ wo.

² Se day riŋ ra ga : Nday hoo sug we ti fen maga Moyis je peele Manwur hay wãã we mo ɓuy, nday hoo sug go ti jag ɓi maga ndi hay fern we mo ɓuy lay.

³ Nday tob hẽẽre ɓay wo go gà naw yaŋ go wara puri. Nday hoo sug we ti jag Manwuri, Baa ɓay no.

⁴ Day de maga patala ga Manwur hã ngel iggi go ne hẽẽre ɓayn wo so mono, fer we liŋ ni ɓay wo so, ɓil sir maga diŋ tway ɓay ga Moyis je peele Manwurn hay hãn we wo go faale Jurdẽẽ ɓaŋla mono.

⁵ Joŋ we nen maga nday mo see ti jag maga Moyis je peele Manwur hay fer ra we mono. Da we Manwuri, Baa ɓay no. See we ti faage maga á ɓod ra mono. Hoo we sug ti jag liŋgi ɓen wo. Saʼ we see ɓay see ɓe day ni nday joŋ we peele ne hẽn go de jiili ɓay ɓuy, go de maysee ɓay ɓuy lay.

⁶ Josuwe kal kaŋ bosaʼ ne hara ti, kal men rage rawge. Saara kal rawge liŋ ni ɓaara.

⁷ Moyis hay hã tway we le go ne nus jar ma ti ɓĩĩni mani Manase wo le go ɓil sir Basan, Josuwe kal hãge ne nus ma lan wo yoo hẽẽre ɓaaran wo faale Jurdẽẽ nen wur bolaw lay. De maga Josuwe men ra rawge liŋ ni ɓaara wo mono, se kal kaŋ bosaʼ ne hara ti.

⁸ Day wii ra ga : Wo we liŋ de horog debaŋ, de horog de fũy wo doo debaŋ, de solay, de boo biŋni, boo dobe, de boore, de õõbe wo debaŋ. Ɓes we fẽẽre maga nday hay yãɗ ra le doo jar hee ɓay wo de hẽẽre ɓayn wo.

Re maga leʼ leʼge ti holaŋ jar Israyel wo mono

⁹ Jar ni Ruben wo, jar ni Gad wo de nus jar ni Manase men wo hẽẽre ɓaaran wo Silo, ɓil sir Kanaan ni, saara kal ferge ma woge ɓil sir Galaad, sir maga Moyis hay lag ra ni ti jag Manwur mono.

¹⁰ De maga saara wo dayge jag Jurdẽẽ ti sir maga diŋ Kanaan ɗa mono, saara kal boo ngel siɗ jag po sara ni kaʼ jag bii ni.

¹¹ À raw age wii jar Israyel ma lan wo ga : Ko we ɗa, jar ni Ruben wo, jar ni Gad wo de nus jar ni Manasen boo wo ngel siɗ jag we ti sir Kanaan maga wo jag Jurdẽẽ mono.

¹² De maga jar Israyel wo wo laa re sen mokay, saara tay le go ɓuy Silo ma woge dur rage.

¹³ Jar Israyel raw wo ɓoʼ Fineyas je ni Eleyasar je siɗ jag wo ɓil sir Galaad see jar ni Ruben wo de jar ni Gad wo de nus jar ni Manasen wo.

¹⁴ Waŋre wo wer ɓe ni hwale, waŋ go ti ɓĩĩni jar Israyel wo boŋ boŋ ɓuy. Jar sen la wo ɓuy wo diŋ waŋre ti ɓĩĩni mani ɓaaran wo.

¹⁵ Saara wo daʼ jar ni Ruben wo, jar ni Gad wo de nus jar ni Manasen wo ɓil sir Galaad. Saara day riŋ ra ga :

¹⁶ mokay diŋ wããre ma jag ngaɓa jar mani Manwurn wo ɓuy : Sen nà diŋ debay yããge jag mayse no maʼ ga nday joŋn see Baa mani Israyel ga nday mbuɗ faale go ne Manwur wara day nday boo ngel siɗ jag la? Nday joŋ ti graŋ go see Manwur wara le la?

¹⁷ Re ma Pewor hãã wara yaŋ ti nà tiʼ ɗa, day nday kon nen ɓay nà fen foo yawla?

¹⁸ Wara nday fer joŋ ti graŋ see Manwur pa mono! Day hayga wara nday joŋ ti graŋ we go see Manwur no, jiili ɓe caa ge go toŋ nà diŋ ne ngaɓa jar Israyel wo ti ɓuy pa.

¹⁹ Hayga sir maga diŋ tway ɓay yaŋ go de ɓlagge no, cegaɗ we le go ɓi sir maga sen diŋ tway mani Manwur ga Manwur de hayle ni mono, day ni nday daʼ ngel lagge yaŋ yoo wùri. Ane joŋ we ti graŋ go see Manwur wa! Kol we see ɓay jar hee wùr ga nday boo ngel siɗ jag po sar de daŋ mani Manwuri, Baa naan wa.

²⁰ De maga Akan je ni Serag yãã jag Manwur ti fen maga á hay maŋ jag naa go ti ɓe gà mono, re leʼ nà diŋ ne ngaɓa jar Israyel wo ti ɓuy, huu diŋ se boŋ ti re ɓlagge ɓen gà.

²¹ Jar ni Ruben wo de jar Gad wo de nus jar ni Manase kal wo ferge ne waŋre ma ti ɓĩĩni jar Israyeln wo ga :

²² Baa, Baa Manwur yaŋ mbe de koge, day jar Israyel kon ge wo mbaara yaŋ lay. Hayga á yaŋ diŋ ti graŋ noga debay yããge jag no, yãã wùr go wara wa.

²³ Hayga wùr boo ngel siɗ jag we ga wùr mbuɗ faale ne Manwuri, hayga á yaŋ ga wùr joŋ siigi jag maga à roɗ fẽẽre ɓaaran go ɓuy wo ti ɓe noga wùr a de fẽẽre wo ne Baa ni, hayga á yaŋ ga wùr siɗ jag ma joŋ suseʼ ne Baa ni no, Manwur mo kaŋ mbe põõre ɓe ne wùr ti.

²⁴ Á bay doo maga nday ɗig no wa. Wùr joŋ mo nà diŋ doo hẽẽne maga ti wurpo weere ɓay day wii wo jar ni wùr wo ga re mayse tay we de Manwuri, Baa mani Israyeln la laybla no.

²⁵ Tiga á riŋ wo ra ga : Nday jar ni Ruben wo de Gad no, Manwur ɓoʼ haagu naa go de Jurdẽẽ, mayse tay we de Manwur la laybla no. Diŋ wer wããre se ga lagge wo le go jag weere ɓay wo, jar ni wùr men ge wo joŋ hẽẽne doo Manwur go laybla no.

²⁶ Diŋ wersen so, wùr kal wii kããra ga wùr mo boo ngel siɗ jage, bay maga wùr roɗ fẽẽre ti ɓe wa lay, bay ma siɗ jag ti ɓe wa lay.

²⁷ Ane wùr joŋ mono, maga á mo hay diŋ fen kaŋ nen ti holaŋ naa de kããra, ti holaŋ weere naa wo blam naa. Sen mono, ma kaŋ nen ga wùr de joŋ peele ne Manwur lay, de goŋge ɓe de roɗge fẽẽre wo, de siɗgi jag wùrn wo, de siɗgi jag wùr ma joŋ suseʼ wo ne hẽn lay. Sen mono maga weere ɓay mo wii wo jar ni wùr wo toŋ ga mayse tay we de Manwur la wa.

²⁸ Wùr day so ga : Koh á mo wii bà wo jar ni naa wo wurpo no so laybla no naa yiŋ gi jag yaŋ ne hara ga : Ko we mbay ngel tosge mani Manwur maga pããre wùr hay boon wo mo kaʼ no. Á hay boon wo mono bay ma roɗ fẽẽre wo ti ɓe wa lay, bay ma siɗ jag ti ɓe wa lay, ama maga á mo hay diŋ fen kaŋ nen ti holaŋ naa de kããra.

²⁹ Ɗiggi maga wùr mo joŋ ti graŋ see Manwur noga wùr mbuɗ faale ne Manwur wara mono, sen bay le ɓil wùr wa. Wùr boo nà bay diŋ ngel siɗ jag ma roɗ fẽẽre, ma age de fẽẽre ne Baa ni noga siɗ jag ti ɓe go sar de daŋ ngel siɗ jag mani Manwuri, Baa naan ga de kaŋge jag tiŋ ɓen mo wa so.

³⁰ De maga Fineyas je siɗ jag wo de waŋre ma pel ngaɓan wo de jar kluuri maga sen hay wo ni laa wo wããre ma jag jar ni Ruben wo de jar ni Gad wo de nus jar ni Manasen wo mono, ɓil ɓaara raw joŋge go fehe.

³¹ Day Fineyas je siɗ jagn kal riŋ jar ni Ruben wo de Gad wo de nus jar ni Mansen wo ga : Wùr de koge wara ga Manwur yaŋ de naa wer ga nday cegaɗ jag Manwur go gà day nday joŋ ga Manwur mo kaŋ bon ne jar Israyel wo ti gà lay mono.

³² Fineyas je ni Eleyasar je siɗ jagn wo de waŋre ma pel jar Israyel men wo jar ni Ruben wo de jar ni Gad wo le go. Saara men sir Galaad le go, fer wo go ɓil sir Kanaan ɓiŋ jar Israyel wo. Saara kal fer wããre ne hara ti woge ɓaaran le mono.

³³ Jar Israyel kal wo joŋ ɓil go feh ti wããre maga á fern wo ne hara mono, kal wo joŋ suseʼ ne Baa. Saara men ɗiggi maga saara mo wo dur sir Galaad maga jar ni Ruben wo de jar ni Gad wo de lagge ni mo go, men ɗiggi maga saara mo wo go frumgi ɓe go lay.

³⁴ Jar ni Ruben wo de jar ni Gad raw wo kaŋ ɗúu ne ngel tosge se no day wo ga : Á diŋ fen kaŋ nen ti holaŋ naa ga Manwur diŋ Baa.