JOSUWE 21 - Tupuri Bible

Ɓi leege maga à hã ra ne jar ni Lefin wo mono

¹ Waŋre ma ti ɓĩĩni mani Lefin kal wo age see Eleyasar je siɗ jagn wo de Josuwe je ni Nun wo de waŋre ma ti ɓĩĩni ma yoo jar Israyel wo.

² Saara a see ɓaara Silo ɓi sir Kanaan day wii wo ra ga no : Manwur hay wii Moyis we go ga à nen hã ɓi leege ne wùr ma lagge, de ngoɗog ɓaara wo ma re horog wùr wo.

³ Ti jag Manwuri, jar Israyel raw wo hã ɓi leege wo de ngoɗog ɓaara wo ne jar ni Lefi wo ɓil tway ɓaaran wo.

⁴ À raw naa wãywáale ne jar ma ti moobe mani Kehadn wo. Yoo jar ni Lefi ma sen wo mono, jar ni Aaron je siɗ jagn kal wo daʼ ɓi leege hwal ti swaʼ ti tway mani jar ma ti ɓĩĩni mani Judan wo de Simeyoŋ wo de mani Benjamen wo.

⁵ Jar ni Kehad ma lan daʼ wo ɓi leege hwal ti tway mani jar ma ti wer ɓĩĩni Efrayim wo de mani Daŋ wo de mani nus jar ni Manasen wo.

⁶ Jar ni Gerson daʼ wo ɓi leege hwal ti swaʼ ti tway mani jar ma ti ɓĩĩni mani Isakarn wo de mani Asern wo, de mani Neftalin wo de nus jar ni Manase maga wo wo Basan mono.

⁷ Jar ni Merari wo go de ngaɓge ti moobe taʼ taʼ daʼ wo ɓi leege hwal ti ɓog ti tway mani jar ma ti ɓĩĩni mani Ruben wo de mani Gadn wo de mani Sabulonn wo.

⁸ Jar Israyel naa wo wãywáale day hã wo ɓi leege sen wo go ne jar ni Lefi wo doo maga Manwur hay wããn ne Moyis nono.

⁹ Ti tway mani jar ma ti ɓĩĩni mani Judan wo de Simeyoŋ mono, ɓi leege maga à hã ra ne hara mokay

¹⁰ wo diŋ ma jar ni Aaron ma ti moobe mani Kehad je ni Lefin wo, werga à naa wãywáale taŋgu nà ti ɓaara.

¹¹ Ɓi leege ɓaaran wo diŋ Kiryat-Arba maga diŋ Hebroŋ ga wo ti húulì ma Judan mono de ngoɗog ɓen wo ɓuy. Arba hay diŋ pan Anage.

¹² Ane payre ma Hebroŋ de sir ma ti ɓen wo ɓuy wo diŋ ma Kaleb je ni Yefune no.

¹³ Ɓi leege maga à hã ne jar ni Aaron je siɗ jagn wo diŋ : Hebroŋ ɓi leege maga jar maga doo ɓaara yee wo wo yãɗ waŋ ni mono, de ngoɗog ɓen wo, Libna de ngoɗog ɓen wo,

¹⁴ Yatir de ngoɗog ɓen wo, Estemowa de ngoɗog ɓen wo,

¹⁵ Holon de ngoɗog ɓen wo, Debir de ngoɗog ɓen wo,

¹⁶ Ayn de ngoɗog ɓen wo, Bet-Semes de ngoɗog ɓen wo, Tay ɓuy ɓi leege kawaʼ ti tway mani ɓĩĩni ma se ɓogn wo.

¹⁷ Ti tway mani jar ma ti ɓĩĩni mani Benjamen wo mono, à hã ne hara diŋ Gabawoŋ de ngoɗog ɓen wo, Geba de ngoɗog ɓen wo,

¹⁸ Anatod de ngoɗog ɓen wo, Almon de ngoɗog ɓen wo. Tay ɓuy ɓi leege naa.

¹⁹ Ɓi leege maga à hã sen wo ne jar siɗ jag jar ni Aaron wo ɓuy hwal ti swaʼ de ngoɗog ɓaaran wo.

²⁰ À naa wãywáale ne jar ni Lefi ma ti moobe mani Kehad ma lan wo. Saara daʼ ɓi leege go ti tway mani jar ni Efrayim wo.

²¹ À hã Sikem ɓi leege ma yãɗ waŋ jar maga doo ɓaara yee ne hara de ngoɗog ɓen wo. Sikem wo ciŋ ti húulì ma Efrayim no. À hã ne hara pa diŋ Geser de ngoɗog ɓen wo,

²² Kibsayim de ngoɗog ɓen wo, Bet-Horon de ngoɗog ɓen wo. Tay ɓuy ɓi leege naa.

²³ Ti tway mani jar ma ti ɓĩĩni mani Daŋ wo mono, à hã ne hara diŋ Elteke de ngoɗog ɓen wo, Gibeton de ngoɗog ɓen wo.

²⁴ Ayalon de ngoɗog ɓen wo, Gat-Rimon de ngoɗog ɓen wo. Tay ɓuy ɓi leege naa.

²⁵ Ti tway mani nus jar ma ti ɓĩĩni mani Manasen wo mono, à hã ne hara diŋ Taanag de ngoɗog ɓen wo, Gat-Rimon de ngoɗog ɓen wo, ɓi leege ɓoge.

²⁶ Ɓi leege maga à hã ra ne jar ma ti moobe mani Kehad ma lan wo tay wo ɓuy hwal de ngoɗog ɓaaran wo.

²⁷ Ɓi leege maga à hã ra ne jar ma ti ɓĩĩni mani Lefi maga wo ti ɓĩĩni mani Gerson ga day wo ti tway mani nus jar ma ti ɓĩĩni mani Manasen wo ɓoge : Golan wo ɓil sir Basan, ɓi leege maga jar maga doo ɓaara yee wo wo yãã waŋ ni mono, de ngoɗog ɓen wo, Bestra de ngoɗog ɓen wo.

²⁸ Ti tway mani jar ma ti ɓĩĩni mani Isakarn wo mono, à hã ne hara diŋ Kisyon de ngoɗog ɓen wo, Dabrad de ngoɗog ɓen wo,

²⁹ Yarmud de ngoɗog ɓen wo, En-Ganim de ngoɗog ɓen wo lay. Tay ɓuy ɓi leege naa.

³⁰ Ti tway mani jar ma ti ɓĩĩni mani Asern wo mono, à hã ne hara diŋ Miseyal de ngoɗog ɓen wo, Abdon de ngoɗog ɓen wo,

³¹ Helkad de ngoɗog ɓen wo, Rehob de ngoɗog ɓen wo lay. Tay ɓuy ɓi leege naa.

³² Ti tway mani jar ma ti ɓĩĩni mani Neftalin wo mono, à hã ne hara diŋ Kedes ɓil prog ma Galile de ngoɗog ɓen wo, ɓi leege maga jar maga doo ɓaara yee wo wo yãã waŋ ni mono de ngoɗog ɓen wo, Hamot-Dor de ngoɗog ɓen wo, Kartan de ngoɗog ɓen wo lay. Tay ɓuy ɓi leege swaʼa.

³³ Ɓi leege maga à hã ra ne jar ni Gerson wo go ti feele taʼ taʼ tay wo ɓuy hwal ti swaʼ de ngoɗog ɓaaran wo.

³⁴ Ɓi leege maga à hã sen wo ne te jar ma ti ɓĩĩni mani Lefi maga wo ti feele mani Merarin ga day wo ti tway mani jar ni Sabulon wo diŋ Yokneyam de ngoɗog ɓen wo, Karta de ngoɗog ɓen wo,

³⁵ Dimna de ngoɗog ɓen wo, Nahalal de ngoɗog ɓen wo. Tay ɓuy ɓi leege naa.

³⁶ Ti tway mani jar ni Ruben wo mono, à hã ne hara diŋ Betser de ngoɗog ɓen wo, Yahsa de ngoɗog ɓen wo,

³⁷ Kedemod de ngoɗog ɓen wo, Mefaad de ngoɗog ɓen wo. Tay ɓuy ɓi leege naa.

³⁸ Ti tway mani jar ma ti ɓĩĩni mani Gadn wo mono, à hã ne hara diŋ Ramod ɓi sir Galaad, ɓi leege maga jar maga doo ɓaara yee wo wo yãã waŋ ni mono, de ngoɗog ɓen wo, Mahanayim de ngoɗog ɓen wo,

³⁹ Hesbon de ngoɗog ɓen wo, Yeaser de ngoɗog ɓen wo. Tay ɓuy ɓi leege naa.

⁴⁰ Ɓi leege maga à naa wãywáale ti ɓaara ne te jar ma ti ɓĩĩni mani Lefi ma ti feele mani Merarin go ti moore ɓe taʼ taʼ tay ɓuy hwal ti ɓoge.

⁴¹ Ɓi leege maga wo diŋ tway mani jar ni Lefin wo tay wo ɓuy doo naa ti nenmaʼ de ngoɗog ɓaara wo ti.

⁴² Ɓi leege ma honla ɓuy de ngoɗog ɓen wo ti, saara ɓuy doosen nono.

⁴³ Manwur hã sir maga se hay haʼ go ga se hãn go ne pããre ɓaara wo ne jar Israyel wo doo kay no so no. Saara yãã sirn go day laa wo tiŋ go ni.

⁴⁴ Manwur hã jam go ne hara ti ɓaara ɓuy doo maga se hay haʼ go ne pããre ɓaara wo nono. Je hee ɓaara po boŋ hay kãã ma ooge pel ɓaara gà hase. Manwur hay hã blum go ne hara ti jar hee ɓaaran wo ɓuy.

⁴⁵ Wããre maga Manwur wãã ra ti tiŋ mani Israyel mo ɓuy no, ma po gwaʼ ga baa jag go gà bay wa á bag wo jag go ɓuy.