JOSUWE 20 - Tupuri Bible

Ɓi leege ma hiiraʼ ma yãɗ waŋ wo

¹ Manwur kal wii Josuwe ga :

² Wii jar Israyel wo ga : Bag we ɓi leege ma yãɗ waŋ wo doo maga ndi hay wii Moyis ga á mo fern we nono.

³ Je maga ii húulí we reʼ gà ga doo ɓe raw ne hẽn rawge no, á mo daŋ wo go yãã waŋ ni doo je saʼ hee no.

⁴ Je ii húulín la daŋ wo go ɓi leege po yoo ɓaara. Se wo la oo jag feele ɓi leegen deŋ day se fer wããre ɓen ne jar kluuri ma ɓi leegen wo ni. Saara ɗawn ge yaŋ ɓiŋ ɓaara ni kay day saara hã ngel ne hẽn maga á mo laa tiŋ ni.

⁵ Hayga je saʼ heen maŋ blam ɓe we le no, saara naa nen je ii húulín go ne hẽn gà werga á ii húulín reʼ gà day se hay bay go de ɓe seɓaa ɓil wa lay.

⁶ Je ii húulín hay wo ɓi leege sen ni hãã à wo go cag re ɓen pel ngaɓan no, hãã je siɗ jag maga hay ti kal sen ni huu go ɗa. Blam sen mokay se fer ge mbe liŋ ni ɓe ɓi leege maga se hay ɗee le go ni mo so no.

⁷ Saara kal baa Kedes ti prog ma Galile wo ti húulì ma Neftali no, baa Sikem ti húulì ma Efrayim no, baa Kiryat-Arba maga diŋ Hebroŋ ti húulì ma Juda no.

⁸ Wo go faale Jurdẽẽ ma ɓaŋ lan nen wur botoŋ Jeriko mono, saara kal baa Betser wo ciŋ ti ngel ma de maŋge ciŋ ma ɓil puuli no, ti tway mani Ruben no. Saara baa pa diŋ Ramod ɓil sir Galaad ti tway mani Gad no, diŋ Golan ɓil sir Basan ti tway mani Manase no.

⁹ Wo mo nà diŋ ɓi leege maga à bag ra ne jar Israyel wo de waare ma yoo ɓaaran wo maga á mo daŋ wo wo go yãɗ waŋ ni de maga doo jobo raw we ne kan ɓe rawge mono. Je heen kãã ma iigi ɓe go gà hayga à cag reen go pel ngaɓan kaʼ gà ɗa mono.