JOSUWE 2 - Tupuri Bible

Josuwe laa jar wo ɓog ko ɓi leege Jeriko

¹ De maga jar Israyel wo Sitim mono, Josuwe je ni Nun kal hoo jar ɓog ma woge ko sir Kanaan wo de ɓi leege Jeriko. Se day riŋ ra ga : See we. Saara kal rawge, laa wo liŋ ni mangawlaŋ po ɗúu ɓe ga Rahab. Saara nà ni.

² À kal riŋ waŋ Jeriko ga : Jar Israyel yaŋ wo de age suŋ la ma ɓod eŋre sir no.

³ Waŋ Jeriko kal laa jar wo wii Rahab ga : Laa jar maga a wo day lag wo ni ɓo go siigi werga á a wo nà ma ko sir no.

⁴ Ama wãy sen la raw hoo jar ma ɓogn wo la, kal yoŋ rage. Se day wii jar peele waŋ wo ga : Kidolgi jar sen la a mbaara we ni ɓi, ane ndi ko ngel maga á a wo le ni mo gà.

⁵ Day pa, de maga ngel wo go joŋge daymola de ngar ngel maga à tẽg jag korn go mono, jar sen la laa wo go. Nen ɓi baa ra gà so. Hoo we ɗeere wer ɓaara ni nday daʼ ra yaŋ mbay.

⁶ Paga se yoŋ ra wo go ciŋ ti tiŋ ɓi duuli maga se hay baan wo go ciŋ ni de gesaŋ mono.

⁷ Jar Jeriko po kal wo hoo ɗeere wer ɓaara ti faage maga wo ti ngel maga à cegaɗ Jurdẽẽ go may ni mono. À tẽg jag tiŋ go blam ɓaara tuu lay.

⁸ Taŋgu maga jar ko ngeln wo bay suɗgi ɗa mono, Rahab raw ɗiigi wo ciŋ see jar ma ɓogn wo.

⁹ Se day riŋ ra ga : Ndi de koge ga Manwur go de hã sirn la we, hẽẽne ɓay go de caa wùr yaw, jar ma ɓil sirn ɓuy wo go de caa bii ɓil doo ɓay lay.

¹⁰ Werga wùr yaŋ de laa fen maga Manwur caa ɓil maarog ma de sẽẽn go ne nday pele, day nday laa le go ti ngel de heeg ti wur maga nday laa le go ɓil sir Ejipte mono. Wùr yaŋ de laa fen maga á joŋ waŋre ma ɓog mani jar Amoridn wo le faale Jurdẽẽ de ɓe mono, waŋre se ga diŋ Sihon wo de Og maga nday taw ra go mono.

¹¹ Wùr de laa re sen wo. Ɗiggi wùr go de daŋge, egre wosela ɓuy go de hooge. Werga Manwuri, Baa ɓayn diŋ Baa maga le go ciŋ hãã lay, go gesiŋ ti tamsir la lay.

¹² Patalam no, haʼ we go ne ndi de ɗúu Manwur ga nday joŋ ge tiŋ mani ɓin yaŋ de el doo maga ndi hay joŋ we de el no lay no. Day ni nday kaŋ fen po maga kaŋ nen ɓi yaŋ ga cwãy nday joŋ ge yaŋ doosen nono ne ndi.

¹³ Haʼ we go me ga nday ii gi pããre ɓi wo de hẽẽre ɓi wo go gà day nday ɓlag ge fẽẽre ɓaaran wo go gà lay.

¹⁴ Jar ma ɓogn wo la kal wo ferge ne Rahab ga : Wùr go de hã see wùr ma huugi wer ɓay hayga nday laa húulí we go ne wùr ti gà no. Day de maga Manwur hã ge sirn la we go ne wùr no, wùr joŋ ge ndo yaŋ de el ti ngel ɓe keɗed lay.

¹⁵ Rahab raw laa rage wo ti feneder kor ma ti Jeriko no werga tiŋ ɓe hay ti kor no.

¹⁶ Se day wii ra ga : Fer we go nen ti húulì no kay no nen maga jar maga raw wo wo kiɗ nday mo yiŋ wo de ɓay ti faage wa. Yoŋ we ni naw swaʼa, hãã á mo fer wo le go ɗa, blam ɓe ni nday maŋ we faage ɓayn so.

¹⁷ Jar Israyel ma ɓog la raw wo wii Rahab ga : mokay diŋ fen maga kaŋ wer wùr yaŋ joŋge doo maga wùr hay haʼ go la no mono.

¹⁸ De maga wùr laa ge we le ɓi sirn lam no, ni ndo saʼ saale ma de sẽẽn mokay ti feneder maga ndo laa wùr le go ni mono. Tay pan ɓo wo de man ɓo wo de hẽẽre ɓo wo go liŋ ni ɓo ɓuy.

¹⁹ Je maga kal ge we go siigi no, cíi je sen mbe ti ɓe, re je sen joŋ ge ti wùr gà lay. Day hayga jobo baa doo we ne jar maga tay ge wo go see ɓo mono, cíi ɓe ti wùr lay.

²⁰ Ane, ndo laa húulí we go ne wùr ti no, haʼge maga wùr haʼn joŋ ge diŋ ngel de koɗe.

²¹ Rahab kal ga : Reen doo maga nday wããn nono. Se kal men rage mbaara rawge so. Doo ni tuu, se saʼ saale ma de sẽẽ ti feneder kor no.

²² Jar ma ɓogn la raw wo ciŋ ti húulì, joŋ wo naw ni swaʼ hãã jar maga hay raw wo kiɗ rage fer wo wo go ɗa. Jar kiɗ ragen kiɗ wo ngel go ɓuy, saara daʼ ra gà.

²³ Jar Israyel ma ɓogn ɗii wo le go gesiŋ, kal wo cegaɗge wo go see Josuwe je ni Nun no. Saara fer wããre go ne hara ti fẽẽre maga daʼ wo saara mo ɓuy no.

²⁴ Saara day wii Josuwe ga : Kidolgi, Manwur go de hã sirn ne naa. Jar ma ɓil sirn draʼ wo go de caa hẽẽne doo naa lay.