JOSUWE 18 - Tupuri Bible

Te sir maga gwaʼ bay ɓesge mono

¹ Jar Israyel tay wo ɓuy ɓi leege Silo. Saara raw baa tiŋ ma yiŋgin de Baa ni. Sirn hay go nen doo ɓaara.

² Ɓĩĩni jar Israyel taʼ taʼ renam hay bay wo de daʼ tway ma ɓaaran wa ɗa.

³ Josuwe day wii ra ga no : Nday joŋ ge naw nà gãy gorge ma yãã sir maga Manwuri, Baa mani pããre ɓay hay hãn go we mo la?

⁴ Hoo we jar ti ɓĩĩnin wo swaʼ swaʼa, ni ndi laa ra ma woge raŋ sir no. Á kon ge wo yaŋ le day car wo ɓil ɓe yaŋ go, day saara fer yaŋ le daʼ ndi.

⁵ Á car ge wo ɓil sirn yaŋ go tiʼtiʼ renam. Jar ma ti ɓĩĩni mani Judan lag ge wo ɓil tway ma ɓaaran nen ɓaŋ wãyban lay, ɓĩĩni mani Josefn lag ge wo go ɓil ɓaaran nen ɓaŋ gloŋhwede lay.

⁶ See we, car we ɓil sirn go tiʼtiʼ renam ni nday a we le daʼ ndi la. Ndi naa ge wãywáale yaŋ go we ti ɓe pel Manwuri, Baa naa la.

⁷ Ane jar ma ti ɓĩĩni mani Lefin daʼ ge wo tway yoo ɓay ni gà. Werga, ngel siɗ jag mani Manwurn diŋ tway ɓaara. Jar ni Gad wo, jar ni Ruben wo de nus jar ni Manasen hay daʼ wo ngel ma ɓaaran we le go faale Jurdẽẽ nen wur botoŋ, Moyis je peele Manwur hay hãn go ne hara.

⁸ Jar se maga à hoo ra la kal wo hooge go ciŋ. Josuwe hay wii ra we go ga : See we, raŋ we sir no, car we ɓil ɓe le go ni nday fer le daʼ ndi day ni ndi naa wãywáale yaŋ go we ti ɓe pel Manwur go Silo la.

⁹ Jar sen la kal mbaara rawge raŋ sirn so. Saara raw car ɓil sirn go tiʼ tiʼ renam, kee go de ɓi leegen wo day yer wo go ɓil kefdere. Saara kal ferge le daʼ Josuwe ti ngel lagge ma Silo no.

¹⁰ Josuwe raw naa wãywáale go ne hara ti ɓe pel Manwur go Silo ni. Se car sirn go ne jar Israyel wo, go de ngaɓge ti ɓĩĩni wo taʼ taʼ ɓuy.

Tway mani jar ma ti ɓĩĩni mani Benjamen wo mono

¹¹ À naa wãywáale, se leʼ ti ɓĩĩni mani Benjamen no, go de ngaɓge ti moobe taʼ taʼa. Tway ma ɓaaran hay ti holaŋ sir mani jar ni Judan wo de jar ni Josef wo.

¹² Go ɓaŋ gloŋhwede no kay mono, haagu ɓaara ur le jag Jurdẽẽ kaʼ leʼ wo go ti jeŋ Jeriko nen ɓaŋ gloŋhwede ɓe no kay no. Se ur le ti húulìn kaʼ leʼ wo go ti puuli ma Bet-Afen no.

¹³ Haagun hee ni day leʼ wo go ti jeŋ Lus maga diŋ Betel go ɓaŋ wãybane. Se leʼ go Atarot-Adar, cegaɗ húulì maga go ɓaŋ wãyban Bet-Horon ma de hamge gesiŋ wo go.

¹⁴ Nen wur bolaw mono, haagun kii go nen ti jeŋ maarog ma kluu go nen ɓaŋ wãyban no kay. Se ur le ti húulì ma ɓaŋ wãyban Bet-Horon kaʼ leʼ go Kiryat-Baal maga diŋ Kiryat-Yearim ɓi leege maga diŋ ma jar ni Juda wo mono. Sen mo nà diŋ haagu ɓaara ma nen wur bolaw no.

¹⁵ Haagu ma nen ɓaŋ wãyban ur le jag Kiryat-Yearim kaʼ leʼ go nen wur bolaw de ngar gedel ma Neftowan wo no.

¹⁶ Se leʼ go ti jag húulì ma de ngafge de log ma Bet-Hinom ga diŋ log ma jar Refayim wo, go ɓaŋ gloŋhwede mono. Haagun leʼ go ti jeŋ húulì mani jar Yebusn wo, go ɓaŋ wãyban no kay no hãã wo go En-Rogele.

¹⁷ Se kii go ɓaŋ gloŋhwede no kay leʼ wo go En-Semes wo de Gelilod maga kar de ngel ma de maŋge ciŋ ma Adumin mono. Se leʼ wo go ti húulì mani Bohan, je ni Ruben no.

¹⁸ Haagun hee ti jeŋ húulì ma de ngafge de ful ma Araba go ɓaŋ gloŋhwede no kay day leʼ go ti Araba no.

¹⁹ Se baa ti jeŋ húulì ma Bet-Hoglan go ɓaŋ gloŋhwede no kay leʼ wo go ti waale maarog ma luglugn go ɓaŋ gloŋhwede no kay de ngar ngel maga Jurdẽẽ kal le nen ɓe ni go ɓaŋ wãyban no kay mono. Sen mo nà diŋ haagu ma ɓaŋ wãyban no.

²⁰ Haagu ma nen wur botoŋn maŋ le de Jurdẽẽ tuu. Mo so no diŋ tway mani jar ma ti wer mani Benjamen wo, go de ngaɓge ti moobe taʼ taʼa, go ti jag ɓe leŋleŋ ɓuy lay.

²¹ Ɓi leege jar ma ti ɓĩĩni mani Benjamen de ngaɓge ti moobe taʼ taʼ hay wo diŋ Jeriko, Bet-Hogla, Emek-Ketsis,

²² Bet-Araba, Semarayim wo de Betel,

²³ Afim, Para wo de Ofra,

²⁴ Kefar-Amonay, Ofni wo de Geba, tay ɓuy ɓi leege hwal ti ɓog de sir ma ti ɓaaran wo.

²⁵ Ni pa diŋ Gabawoŋ, Rama wo de Beerod,

²⁶ Mispe, Kefira wo de Mosa,

²⁷ Rekem, Yirpel wo de Tareala,

²⁸ Sela, Elef wo de Yebus maga diŋ Jerusalem mono, Gebeyad wo de Kiryad. Tay ɓuy ɓi leege hwal ti naa de sir ma ti ɓaaran wo. Mo so no diŋ tway mani jar ma ti ɓĩĩni mani Benjamen wo, go de ngaɓge ti moobe taʼ taʼa.