JOSUWE 17 - Tupuri Bible

Tway mani nus jar ma ti ɓĩĩni mani Manase lan wo mono

¹ À hã tway ne jar ni Manase jag wel Josefn lay. Jar ni Makir jag wel mani Manasen ga diŋ Galaad hay daʼ wo sir ma ɓaaran wo le go ɓil sir Galaad wo de Basan werga Makir hay diŋ jobo ma de ko durgi.

² À caa tway go ne jar ni Manase ma lan wo go de ngaɓge ti moobe taʼtaʼ lay. À caa ne jar ni Abiyeser wo, ne jar ni Heleg wo, ne jar ni Asriyel wo, ne jar ni Sikem wo, ne jar ni Hefer wo, ne jar ni Semida wo. Wo mo ɓuy nà diŋ weere ma twerpiiri mani Manase je ni Josef wo, go ti moobe taʼ taʼa.

³ Selofod je ni Hefer, moo Galad, didi Makir ti ɓĩĩni mani Manasen biŋ wel ma twar gà. Se biŋ diŋ mayre tawa. À ɗe ra ga Mahla, Nao, Hogla, Milka wo de Tirsa.

⁴ Saara nduu daʼ Eleyasar je siɗ jagn wo de Josuwe je ni Nun wo de waŋre ma pel jar Israyeln wo day riŋ ra wo ga no : Manwur hay wii Moyis we go ga á mo car tway ne wùr yoo hẽẽre wùrn wo lay. Diŋ wersen à raw caa tway ne hara yoo kawre ɓaaran wo doo maga Manwur hay wãã nono.

⁵ À caa ngel tiʼ tiʼ hwal ne jar ni Manase wo ciŋ ti sir ɓaara maga sen le go Galaad wo de Basan faale Jurdẽẽ ɓaŋ lan mo pa no.

⁶ Werga à caa tway ne ma tnaare ma ti wer mani Manasen wo yoo hẽẽre ɓaara ma twerpiirin wo lay. Sir ma Galaad go diŋ ma jar ni Manase ma lan wo lay.

⁷ Haagu Manase maŋ le de Aser kaʼ hãã wo go Mikmetad maga kar de Sikem mono. Se leʼ go Yamim nen ni jar ma En-Tapuwan wo no kay no.

⁸ Ngel ma ti Tapuwan ɓuy diŋ ma jar ni Manase wo. Tapuwa de see ɓe ciŋ ti haagu no ane se diŋ ma jar ni Efrayim wo.

⁹ Haagu tway mani jar ni Manasen maŋ le de jag pyew ma Kana ma ɓaŋ wãyban no. Ane ɓi leege maga wo ti jeŋ pyewn ni wo diŋ ma jar ni Efrayim wo. Haagu ɓaara ma ɓaŋ gloŋhwede ur le ti pyewn kaʼ leʼ wo go ti maarog ma kluu no.

¹⁰ Sir Efrayim hay go ɓaŋ wãybane, sir Manase hay go ɓaŋ gloŋhwede maŋ le haagu de Asere, ma nen wur botoŋn go haagu de Isakar lay.

¹¹ Ɓi leege ma jar ni Manase hay wo go ti tway mani jar ni Isakar wo de Aser ni pa. Ɓi leege sen wo diŋ Bet-Seyan de progre ɓen wo, Yibleyam de progre ɓen wo, Dor de progre ɓen wo, En-Dor de progre ɓen wo, Taanag de progre ɓen wo, Megido wo de progre ɓen wo. Sir ma kluuri tiʼtiʼ swaʼa.

¹² Jar ni Manase joŋ wo de egre ma yãã ɓi leege sen wo gà. Jar Kanaan dur wo mbaara maga saara mo joŋ de tiŋ ɓi leege sen wo ɗa.

¹³ De maga jar Israyel kol wo go de egre mono, saara kol jar Kanaan wo go gebeere ane saara joŋ de egre ma nii rage go gà.

¹⁴ Jar ni Josef kal wo wii Josuwe ga no : Manwur de kaŋ bosaʼ ne wùr ti, wùr de tesge debaŋ hãã wara. Wer mayse ga ndo caa tway ne wùr no meʼ no day se boŋ tuu pa la?

¹⁵ Josuwe kal ferge ne hara ga no : Hayga nday ngaɓa day húulì ma Efrayim de pẽẽ we ge no, see we wo yooway mani jar Feresid wo de jar Refayim wo, ni nday poʼ we ngel wo ni.

¹⁶ Jar ni Josef kal wo ga no : Huulin kãã wùr gà bà ɓuy pa mono, jar Kanaan maga wo wo de tiŋ ɓil logn wo de pus durgi boore doo, maga wo wo Bet-Seyan wo de progre ɓen no, maga wo wo ɓil log ma Jisreyel mo ɓuy wo doosen no lay.

¹⁷ Josuwe kal wii jar ni Efrayim wo de Manase, jar ni Josef wo ga no : Nday ngaɓa debaŋ, nday de egre lay, tway ɓay joŋ ge boŋ tuu gà.

¹⁸ Huulin joŋ ge mbe ma ɓay ko á mo hay bà ga á diŋ yooway draʼa. Nday poʼn ge yaŋ go day sir joŋ ge yaŋ go diŋ ma ɓay go ti jag ɓe leŋleŋ ɓuy. Werga, nday nii gi jar Kanaan wo yaŋ go, bà de maga á wo de pus durgi boore noga wo de egre mo ɓuy no.