JOSUWE 16 - Tupuri Bible

Tway maga à caa ne jar ma ti wer mani Efrayim wo mono

¹ Jag tway maga à caa ne jar ni Josef wo maŋ le de Jurdẽẽ ma ɓiŋ Jeriko no, leʼ go ti bii ma Jeriko ma nen wur botoŋ no kay no. Se hee ti puuli ma Jeriko no leʼ go de húulì ma Betel no.

² Se ur le Betel ni kaʼ leʼ go Lus, maŋ go ti haagu de jar Arkiyẽẽ maga wo ɓi leege Atarod mono.

³ Se maŋ go nen wur bolaw go ti haagu de jar Yafeletiyẽẽ wo hãã wo go ɓil sir Bet-Horon ma de hamge gesiŋ no, leʼ go Geser hãã wo go jag maarog no.

⁴ Sen mo nà diŋ tway maga à caa ne Manase wo de Efrayim jar ni Josefn wo mono.

⁵ Tway maga à caa ne jar ma ti wer mani Efrayim wo go de ngaɓge ti moobe taʼ taʼa. Haagu ɓaara ma nen wur botoŋn ur le Atarot-Adar hãã leʼ wo go Bet-Horon ma de maŋge ciŋ no.

⁶ Haagu ma nen wur bolawn leʼ wo go nen Mikmetad nen ɓaŋ gloŋhwede ɓe no kay no. Se ɓas le ne Taanat-Silo ti, raw see ɓe wo go nen Yanowa nen wur botoŋ no kay no.

⁷ Se ur le Yanowa ni kaʼ wo go Atarod wo de Naarata, hee wo Jeriko day nduu wo go jag Jurdẽẽ.

⁸ Haagun ur Tapuwa kaʼ fer go nen wur bolaw no kay, leʼ wo go ti pyew ma Kana no, kal wo go jag maarog ma kluu no. Mo so no diŋ tway maga à caa ne jar ma ti ɓĩĩni mani Efrayim wo mono, go de ngaɓge ti moobe taʼtaʼ a.

⁹ Ɓi leege jar ni Efrayim wo de sir ma ti ɓaara wo hay yaŋ wo go ti tway mani jar ni Manasen wo pa.

¹⁰ Ane jar ni Efrayim nii wo jar Kanaan maga hay wo Geser go gà. Jar Kanaan sen joŋ wo de tiŋ yoo ɓaara hãã wara, ane jar ni Efrayim kaŋ wo joŋre ma de põõre wo ne hara ti.