JOSUWE 14 - Tupuri Bible

Faage maga à ɓes sir Kana de ɓe mono

¹ mokay no diŋ sir maga à car ɓil ɓe go ne jar Israyel wo ɓil sir Kanaan mono. Car sir sen go ne hara diŋ Eleyasar, je siɗ jag no, diŋ Josuwe je ni Nun wo de jar kluuri ma ti ɓĩĩni mani jar Israyeln wo.

² Doo maga Manwur hay wãã ne Moyis nono, à car ɓil sirn go ti ɓĩĩni jar Israyel ma kaawaʼ de nus wo diŋ de naage wãywáale.

³ Moyis hay hã tway go ne ɓĩĩni ma ɓog de nusn wo faale Jurdẽẽ ma ɓaŋla no, ane se hã tway ne ɓĩĩni mani Lefin wo yoo ɓaara ni gà.

⁴ Jar ni Josef hay wo wer ɓoge, Manase wo de Efrayim day à hã tway ne ɓĩĩni mani Lefin wo gà. À hã ne hara diŋ ɓi leege po wo de ngoɗog ɓaara wo ti, nen maga á mo lag wo ni day horog ɓaara mo re wo ni.

⁵ Jar Israyel joŋ wo doo maga Manwur hay wããn ne Moyis nono, saara kal ɓes sirn go.

Tway maga à caa ne Kaleb mono

⁶ Jar ma ti ɓĩĩni mani Judan kal wo age Gilgal see Josuwe day Kaleb je ni Yefune ti moobe mani Kenasn kal wiigi ɓe ga : Ndo de ko fen maga Manwur hay wãã ne Moyis, je mani Baan ti naa de kẽẽ le Kades-Barneya mono.

⁷ Kiŋgi ɓi hay doo naa de maga Moyis ɓoʼ me le Kades-Barneya ma ko sirn mo tiʼ lam no. Ndi wo fer wããre ne hẽn de deele, go de ɓil boŋ lay.

⁸ Hẽẽre ɓi maga wùr hay a ɓuy mono, car wo jiili ngaɓan go. Ama ma ɓi ndi hay see ti jag mani Manwuri, Baa ɓi no.

⁹ Ti wur sen ni, Moyis kal haʼge go ga : Sir maga ɓaale ɓo duʼn ge mo ɓuy joŋ ge yaŋ diŋ tway ɓo ma tum werga ndo see ti jag mani Manwuri, Baa ɓi no.

¹⁰ Hãã wara, Manwur men me tenen doo maga se hay wãã nono, kiŋgi yaŋ wara doo naa ti dwee maga Manwur hay wãã fen sen ne Moyis mono, de sen jar Israyel hay wo seege ɓil ful ɗa. Wara, kiŋgi ɓi go doo nenmaʼ ti dwee.

¹¹ Ndi yaŋ mbi de egre ɓil doo maga ndi hay ti wur maga Moyis ɓoʼ me le no ɗa no. Egre yaŋ mbe ɓil ɓi patala ma durgi, ma kalge pel jare, ma fer ge le de ɓaara doo ma ti wurpon no ɗa pa no.

¹² Patalam no, hã húulì se kaʼn ga Manwur hay wãã ti ɓe ti wur sen me. Ndo hay laa we ti wur sen ni ga jar ma ti wer mani Anag wo wo ti húulì sen ni day ɓi leege ɓaaran wo kluuri lay wo de bor kor ti lay. Manwur kay me we no, ni ndi nii ra yaŋ go doo maga se hay wãã nono.

¹³ Josuwe raw kaŋ bosaʼ ne Kaleb je ni Yefunen ti, se kal hã ɓi leege Hebroŋ ne hẽne.

¹⁴ Ɓi leege sen hãã wara diŋ ma Kaleb je ni Yefune, je ma ti moobe mani Kenas no, werga á hay yãã jag Manwuri, Baa mani Israyeln go ti ngel ɓe.

¹⁵ À hay ɓaa ɗe Hebroŋ ga Kiryat-Arba. Arba hay diŋ je maga ra ɗúu yoo jar ma ti wer mani Anagn wo mono. Sirn raw daʼ see ɓe durgi joŋ gà so.