JOSUWE 13 - Tupuri Bible

Sir maga sen gwaʼ bay yããge mono

¹ Josuwe taw tããbe go debaŋ kiŋgi ɓe joŋ go pur lay. Manwur kal riŋgi ɓe ga no : Ndo taw tããbe go, kiŋgi ɓo joŋ go pur lay. Sir maga nen yããge gwaʼ kluu debaŋ.

² Á gwaʼ mono diŋ sir mani jar Filistẽẽ wo ɓuy, sir mani jar Gesurid wo ɓuy,

³ maŋ le jag Sihor maga le jag feele Ejipte kaʼ hãã wo go ti haagu de Ekron nen ɓaŋ gloŋhwede no kay ga diŋ sir ma jar Kanaan wo, sir se maga waŋre ma dwee mani jar Filistẽẽ wo de lagge ni mono : waŋre sen wo diŋ ma Gasa no, ma Asdod no, ma Askaloŋ, ma Gadn wo de ma Ekron. Sir mani jar Afiyẽẽ wo gwaʼ lay.

⁴ Wo nen ɓaŋ wãyban no kay mono, gwaʼ diŋ sir mani jar Kanaan wo ɓuy, diŋ ɓi leege Meara maga diŋ sir ma jar Sidoŋ wo mono, diŋ sir maga maŋ le de Afeg hãã wo go ti haagu de jar Amorid wo mono.

⁵ Gwaʼ pa mono diŋ sir mani jar Gibliyẽẽ wo, sir ma Libaŋ ma nen wur botoŋ ɓuy tĩĩ le Baal-Gad le ɓaale Hermon hãã leʼ wo go jag feele Hamade.

⁶ Diŋ jar ma ciŋ ti húulì wo ɓuy ga tĩĩ wo le Libaŋ kaʼ hãã wo go Misrefot-Mayim mono, diŋ jar Sidoŋ wo ɓuy lay. Sir sen wo mo ɓuy no, ndi nii gi jar ma ɓil ɓaaran wo yaŋ go day ndi hã ge sir sen yaŋ go ne jar Israyel wo. Ane, ma ɓo Josuwe mono, ɓes sirn go ne jar Israyel wo, naa wãywáale go ti ɓe doo maga ndi hay wãã ne ndo nono.

⁷ Patalam no, car ɓil sir mo tiʼ go ti ɓĩĩni jar Israyel ma kaawaʼn wo de nus jar ma ti ɓĩĩni mani Manase ma lan wo lay.

Sir jar Israyel ma faale Jurdẽẽ nen wur botoŋ no

⁸ Nus jar ma ti ɓĩĩni mani Manasen wo de ɓĩĩni mani Ruben wo de Gad hay daʼ wo tway ma ɓaaran le go faale Jurdẽẽ nen wur botoŋ no. Hay hã sir sen ne hara diŋ Moyis je peele Manwur no.

⁹ Sir ɓaaran maŋ le Arower ti diŋdiŋ Arnoŋ, de ɓi leege ma ɓil log no, kal de ngel ma de maŋge ciŋ ma Medeba no, hãã wo go Dibon,

¹⁰ kal de sir mani Sihon waŋ jar Amorid maga hay de hayle Hesbon mono hãã wo go ti haagu de jar ni Amoŋ wo,

¹¹ kal de sir Galaad maga hay nen doo jar Gesurid wo de jar Maakatid wo mono, húulì Hermon ɓuy, sir Basan ɓuy hãã wo go Salka.

¹² Kal de sir mani Og waŋ Basan maga hay de hayle Astarod wo de Edrey mo ɓuy. Og hay diŋ jobo yoo jar ma mbaŋ maga gwaʼ wo ti wer mani jar Refayim wo mono. Moyis hay dur de waŋre sir sen wo mo deŋ ɓuy day se yãã sir ɓaaran wo.

¹³ Ane jar Israyel yãã wo sir mani jar Gesurid wo de jar Maakatidn wo go gà. Saara joŋ de tiŋ yoo jar Israyel wo hãã wara.

¹⁴ À hã tway gà diŋ ne ɓĩĩni mani Lefin boŋ tawa tuu. Tway ɓaaran diŋ fẽẽre maga à a de ɓaara siɗ jag ne Manwuri, Baa mani Israyeln mono. Manwur hay wãã ne hara doosen nono.

¹⁵ Moyis caa tway go ne ɓĩĩni mani Ruben wo, go de ngaɓge ti moobe taʼ taʼa.

¹⁶ Tway ɓaaran maŋ le de Arower ti diŋdiŋ Arnoŋ wo de ɓi leege ma ɓil log no, kal de ngel ma de maŋge ciŋ ma ti jeŋ Medeban ɓuy.

¹⁷ Kal de Hesbon de ɓi leege ma ti ngel ma de maŋge ciŋ wo ɓuy ga wo diŋ Dibon, Bamot-Baal, Bet-Baal-Meon.

¹⁸ Yahsa, Kedemod, Mefaad,

¹⁹ Kiryatayim, Sibma, Seret-Hasahar ma ciŋ ti húulì ma ɓi log no,

²⁰ Bet-Power de jeŋ húulì ma Pisgan wo, Bet-Heyesimode.

²¹ Pa mono, diŋ ɓi leege ma ti ngel ma de maŋge ciŋ wo ɓuy, sir mani Sihon waŋ jar Amorid maga hay de hayle Hesbon mo ɓuy. Moyis hay taw jar sir sen wo go de jar kluuri sir ma Madiyaŋ maga hay wo de saʼ jag de Og mo ɓuy day hay wo joŋ waŋ ti ɗúu ɓe mono. Jar kluuri sen hay wo diŋ Efi, Rekem, Sur, Hur wo de Reba.

²² Yoo jar maga jar Israyel car wo ra go de moslam mono, je ni Bower ga diŋ Balam je ko nen ni lay.

²³ Haagu jar ni Ruben maŋ le ti diŋdiŋ Jurdẽẽ. Mo ɓuy no diŋ tway maga à caa ne jar mani Rubenn wo mono, go de ngaɓge ti moobe taʼ taʼa. À hã ɓi leege wo ne hara de sir ma ti ɓaara wo.

²⁴ Moyis hay caa tway go ne ɓĩĩni mani Gad go de ngaɓge ti moobe taʼ taʼ lay.

²⁵ Sir maga à hã ne hara diŋ Yaeser, diŋ ɓi leege ma ɓil sir Galaad wo ɓuy, nus sir mani jar Amoridn wo, hãã wo go Arower maga kar de Raba mono.

²⁶ Sir ɓaaran maŋ le jag feele Hesbon hãã leʼ wo go Ramat-Mispe wo de Betonim, le Mahanayim hãã wo go haagu de Debir.

²⁷ Le ɓil logn mo lay no, sir ɓaaran wo diŋ ɓi leege Bet-Haram, Bet-Nimra, Sukod wo de Safon, te sir maga Sihon waŋ Hesbon hay wãã re ɓaara mono, caa Jurdẽẽ le ɓil de jeŋ ɓen wo ɓuy hãã wo go ti tawge ti maarog ma Kinered no. Sir sen wo ɓuy wo wo go faale Jurdẽẽ nen wur botoŋ.

²⁸ Mo ɓuy so no, diŋ tway maga à caa ne jar ma ti ɓĩĩni mani Gad wo mono, go de ngaɓge ti moobe taʼtaʼ a. À hã ɓi leege wo ne hara de sir ma ti ɓaaran wo.

²⁹ Moyis hã tway go ne nus jar ma ti ɓĩĩni mani Manasen wo go de ngaɓge ti moobe taʼ taʼ lay.

³⁰ Sir maga à hã ne hara maŋ le Mahanayim, kal de sir ma Basan ɓuy, de sir mani Og waŋ Basan no, de ɓi leege ma doo hiiraʼ mani Yayir ga wo ɓil sir Basan mono.

³¹ Ni pa mono, diŋ nus sir ma Galaad no, ɓi leege ma kluuri ma ɓog ga wo ɓil sir mani Og mono. Ɓi leege sen wo diŋ Astarod wo de Edreyi day à hã ra ne jar ni Makir je ni Manasen wo, go de ngaɓge ti moobe taʼ taʼa.

³² Mo ɓuy so no, diŋ sir maga Moyis hay ɓes le go ɓil ful ma Mohab nen wur botoŋ faale Jurdẽẽ maga kar de Jeriko mono.

³³ Moyis hã tway ne ɓĩĩni mani Lefin wo gà. Manwuri, Baa mani Israyel diŋ tway ɓaara tuu doo maga se hay wii ra nono.