JOSUWE 11 - Tupuri Bible

Josuwe yãã sirn go ɓuy so

¹ De maga Yabin waŋ Hatsor wo laa re sen wo mono, se raw ɓoʼ soole ne Yohab waŋ Madon, ne waŋ Simron wo de ma Aksaf no.

² Se kal ɓoʼ soole wo ne waŋre ma ciŋ ti húulì ma ɓaŋ gloŋhweden wo, ne maga wo ɓil Araba ma nen ɓaŋ wãyban Kinarodn wo, ne ma ɓil Sefelan wo, ne maga wo ti prog ma Dor nen wur bolawn wo,

³ ne jar Kanaan ma nen wur botoŋn wo de ma nen wur bolawn wo, ne jar Amorid wo, ne jar Hitid wo, ne jar Feresid, ne jar Yebusid ma ti húulìn wo, ne jar Hifid ma ti sir Mispa ga wo ɓaale húulì Hermon mo ɓuy no.

⁴ Saara laa le go ɓuy de soode ɓaaran wo ɓuy, tay wo le ngaɓa doo duguɗgi ma jag maarog nono. Piiri ɓaaran wo de pus durgi ɓaaran wo debaŋ lay.

⁵ Waŋre sen tay wo le go ɓuy see kããra, á wo kaŋge ti jeŋ bii ma Merom no, ma dur jar Israyel wo.

⁶ Manwur kal wii Josuwe ga : Joŋ hẽẽne doo ɓaara wa hase gahãyla, toŋ de wur doo kaʼ la nono, ndi sraʼ ra yaŋ go ne jar Israyel wo pel de húulí. Ndo car ge ɓaale piiri ɓaaran wo yaŋ go day ndo roɗ ge pus durgi ɓaaran wo yaŋ go ɓuy lay.

⁷ Josuwe wo de soode ɓen kal wo naa rage doo gug ti jeŋ bii ma Merom ni, á wo go ne hara ti rus tuu.

⁸ Manwur kal hã rage go ne jar Israyel wo ɓi coo doo. Saara id ra go, nii wo ra hãã wo wo go kaŋ rage Sidoŋ ɓi leege ma kluu no, wo go Misrofot-Mayim hãã wo go ɓil log ma Mispa nen wur bolaw no kay no. Saara id ra go ɓuy, jobo daŋ go boŋ gà hase.

⁹ Josuwe joŋ ra doo maga Manwur hay wãã ne hẽn nono. Se kal car ɓaale piiri ɓaaran wo go, roɗ pus durgi ɓaaran wo go lay.

¹⁰ De maga Josuwe fer le de sen mokay no, se yãã ɓi leege Hatsor go, car waŋ ɓen go de moslam. Werga, ti wurpo mono, ti tway sen wo ɓuy hay doo jar Hatsor wo.

¹¹ À car jar ma ɓi leege Hatsor wo go de moslam, à caa wer ɓaara go ɓuy. Fen po maga ɓod egre ɓuy gwaʼ ɓi leege ni boŋ gà. À hee wùu go ne Hatsor lay.

¹² Josuwe yãã sir mani waŋre sen wo mo deŋ go ɓuy de waŋre ɓaaran wo ɓuy lay. Se car jar ma ɓil ɓaaran wo go de moslam, caa wer ɓaara go ɓuy lay doo maga Manwur hay wãã ne je peele ɓe Moyis nono.

¹³ Ane jar Israyel roɗ wo ɓi leege ma tigriŋ go yoo tiŋ ma ti húulìn wo gà say diŋ Hatsor maga Josuwe hee wùu go ne hẽn mo tawa tuu.

¹⁴ Jar Israyel hoo wo fẽẽre wo de horog de fũy ma ɓi leege sen wo ɓuy, ane saara car jar téebeeren ɓuy wo go de moslamre wo, taw ra go ɓuy ko jobo gwaʼ boŋ gà hase.

¹⁵ Fen maga Manwur hay wããn ne Moyis je peele ɓen mono, Moyis fern ne Josuwe day Josuwe baa jag ɓe go. Josuwe men mopo go gà joŋ doo maga Manwur hay wãã ne Moyis no taw taw no.

¹⁶ Josuwe yãã sirn go ɓuy : ma ti húulìn wo, sir Negef go ɓuy, sir ma Gosen go ɓuy, Sefela no, Araba no, húulì mani Israyeln de ngel ma ɓil Sefelan ɓuy.

¹⁷ Sir maga maŋ le ti húulì ma ti koɗ ga le nen Seyir mo hãã wo go Baal-Gad ɓil log ma Libaŋ ɓaale Hermon mo ɓuy, Josuwe yãã ra go de waŋ ɓaaran wo ɓuy. Se taw jar sirn wo go, id ra go ɓuy.

¹⁸ Durgi maga Josuwe dur de waŋre sen wo mono, joŋ naw pur debaŋ.

¹⁹ Sir po tay jag de jar Israyel wo gà say diŋ jar Hifid ma Gabawoŋ wo tawa tuu. Jar Israyel yãã wo sir sen mo ɓuy diŋ de jaw.

²⁰ Werga Manwur joŋ nen maga wer jar sen wo ɓuy mo hig wo jiili go, mo hoo wo le dur Israyel wo day ni jar Israyel mo caa wo wer ɓaara go, mo ko wo decoo ɓaara wa day mo id ra wo go doo maga Manwur hay wããn ne Moyis nono.

²¹ De sen ni Josuwe kal rawge id jar Anakim ma ti húulì Hebroŋ wo, ma Debirn wo, ma Anabn wo de ma ti húulì ma Judan wo de ma ti húulì mani Israyeln wo go ɓuy. Josuwe caa wer ɓaara go de ɓi leege ɓaaran wo ɓuy.

²² Je Anakim po gwaʼ ɓil sir mani jar Israyeln wo gà say wo ɓi leege Gasa, de Gad wo de Asdod tawa.

²³ Josuwe yãã sirn go ɓuy doo maga Manwur hay wãã ne Moyis no ɓuy no. Josuwe kal carge ɓe go ne jar Israyel wo, wosela ɓuy de tway yoo ɓĩĩni mani ɓen wo. Blam sen mokay sirn raw joŋge jam, durgi joŋ gà lay.