JOSUWE 10 - Tupuri Bible

Jar Israyel yãã wo sir Kanaan ma ɓaŋ wãyban no

¹ Adoni-Sedeg waŋ Jerusalem kal laage ga Josuwe yãã Ay go day taw jar ma ɓil ɓen wo go doo ga se hay joŋ jar Jeriko wo de waŋ ɓaara no pa no. Se laa pa ga jar Gabawoŋ tay wo jag go de jar Israyel wo, kol wo go de tiŋ yoo kããra.

² Hẽẽne raw caage ɓe debaŋ werga Gabawoŋ hay diŋ ɓi leege ma kluu doo ɓi leege waŋre wo nono. Á hay kluu de daŋ Ay day jar ma ɓil ɓen hay wo diŋ werpiiri lay.

³ Adoni-Sedeg waŋ Jerusalem kal ɓoʼ soole ne Hoham waŋ Hebroŋ, ne Pireyam waŋ Yarmud, ne Yafiya waŋ Lakisi, ne Debir waŋ Eglon. Day se riŋ ra wo ga :

⁴ Tay we le see ɓi ma kay mege nen maga naa mo wo dur jar Gabawoŋ wo wer maga á tay wo jag go de Josuwe wo de jar Israyel wo mono.

⁵ Waŋre se ma dwee mani jar Amorid wo la ga wo diŋ ma Jerusalem no, ma Hebroŋ, ma Yarmud no, ma Lakis no, ma Eglon no, tay wo see ɓaara le ɓuy de soode ɓaara wo wer ɓaara ɓuy. Saara a kaŋge jag feele Gabawoŋ day leʼn wo durgi.

⁶ Jar Gabawoŋ kal wo ɓoʼ soole wo ne Josuwe ti ngel lagge ɓaara ma Gilgaln ga : Tob gebeere ɓon wo go wa, a le deparday ma yãã wùr go : Caa war wùr le, gahãyla waŋre mani jar Amorid maga wo le ti húulì mo ɓuy maŋ wo põõ le ti wùri.

⁷ Josuwe raw urgi le Gilgal de sooden wo wer ɓe ɓuy, de jar ma de egre jag jawn wo ɓuy lay.

⁸ Manwur day wii Josuwe ga : Joŋ hẽẽne doo ɓaara wa werga ndi go de hã rage mo ɓi coo doo, jobo yoo ɓaara kãã ge ma ooge pel ɓo gà.

⁹ Josuwe kal naa rage doo gugi werga á nà ti seele poɗag de maga se ur le Gilgal mo hãã no.

¹⁰ Manwur dus ɓil ɓaara go ne jar Israyel wo pele. Jar Israyel mbuɗ wo foo ɓaara ti wur sen Gabawoŋ ni, nii wo ra hãã wo wo go de ɓaara ti faage maga leʼ wo Bet-Horon hãã wo wo go taw rage ɓi leege Aseka wo de Makeda.

¹¹ De maga jar Amoridn wo ti ɗee mo tiʼ pel jar Israyel wo no, Manwur laa húulì-baa ma kluuri wo ne hara ti, tĩĩ le Bet-Horon hãã wo go Aseka, saara huu debaŋ. Jar maga huɗ wo doo húulì-baan daŋ wo maga jar Israyel id wo ra de moslamre wo mono.

¹² Ti wur se maga Manwur hã jar Amorid wo go ne jar Israyel wo ɓi coo doo mono, Josuwe kal wii Manwuri day wããn go pel jar Israyel deŋ ga : Wuri, oo eŋ ciŋ ti Gabawoŋ, Ndo few, oo eŋ ciŋ ti log ma Ayalonn lay.

¹³ Wur kal ooge, few kal men seele lay, hãã jar Israyel naa wo blum jar hee ɓaaran wo go ɗa. Wããre sen go de yerge ɓil kefder mani je ma Keɗed no. Wur caa mbe waŋ ni kaʼa, leʼ go gesiŋ deparday gà hãã síilí halla.

¹⁴ Hayba le taŋgu seno noga blam ɓe, síilí po joŋ doosen nono ga Manwur laa gẽẽge je táabay doo kay nono, joŋ gà. Sen joŋ mono werga Manwur hay durgi wer jar Israyel wo.

¹⁵ Josuwe wo de jar Israyel wo ɓuy kal wo ferge go ti ngel lagge ɓaara ma Gilgal no.

¹⁶ Waŋre ma dween daŋ wo, wo wo yoŋge ɓi rum húulì ma Makeda no.

¹⁷ À raw age wii Josuwe ga waŋre ma dween yaŋ wo wo de yoŋre ɓi rum húulì ma Makeda no.

¹⁸ Josuwe kal ga : Legad we húulì wo le, tẽg we jag rum no day ni nday lag we jar gor ti ɓaara.

¹⁹ Ma ɓay mono, lag we wa, kaŋ we ne jar hee ɓayn wo nene. Men ra laage ɓi leege ɓaaran wo wa, gahãyla Manwuri, Baa ɓayn go de hã rage we ɓi coo doo.

²⁰ Josuwe wo de jar Israyel mbuɗ wo foo jar Amorid wo debaŋ, taw wo ra go ɓuy. Gwaʼ diŋ maga sen yor wo go ga daŋ wo day wo wo laage ɓi leege ma kluuri wo mono.

²¹ Blam sen mokay jar Israyel fer wo le go jam daʼ Josuwe ɓi leege Makeda. Jobo bay go buŋ jag pel ɓaara wa hase.

²² Josuwe day so ga : Buŋ we jag rum go, laa we waŋre se ma dween wo le go siigi.

²³ À raw laa rage le go ne hẽn siigi. Á hay wo diŋ waŋ Jerusalem, waŋ Hebroŋ, waŋ Yarmud, waŋ Lakis wo de waŋ Eglon, waŋre sen wo dwee ɓuy.

²⁴ De maga à a go de ɓaara see Josuwe mono, Josuwe raw ɗe jar Israyel wo le ɓuy. Day se wii jar kluuri soode maga hay wo seege wer ɓe ga : Yaʼ we le, kaŋ we ɓaale ɓay ne waŋre sen wo soole. Saara kal yaʼge le, kaŋ wo ɓaale ɓaara ne hara soole.

²⁵ Josuwe day wii ra ga : Joŋ we hẽẽne wa, ɓil ɓay mo caa bii wa lay, teŋ we nen ɓay, coɓ we see ɓay lay. Werga, Manwur joŋ ge jar hee ɓay maga nday de dur rage mo ɓuy wo ge nà doosen nono.

²⁶ Blam ɓe Josuwe kal car rage go, id ra go. Se kal hag rage go ciŋ ti koore wo dwee hãã wur coŋ go.

²⁷ De maga wur go de leʼge gesiŋ mono, Josuwe kal ga pog ra le go gesiŋ. À raw laa rage wo ɓi rum húulì maga á hay yoŋ wo ni mono. À tẽg jag ɓaara de húulì ma kluuri wo. Húulì sen yaŋ wo ni lag hãã wara ɗa.

²⁸ Ti wur sen ni Josuwe yãã Makeda go, se id jar ma ɓil ɓen wo go ɓuy de moslam, waŋ de jar sir ɓen wo ɓuy, jobo boŋ daŋ gà hase. Josuwe joŋ waŋ Makeda doo maga se hay joŋ waŋ Jeriko no pa no.

²⁹ Josuwe wo de jar Israyel wo ɓuy men wo Makeda go, wo wo leʼ Libna.

³⁰ Manwur kal hã ɓi leegen go ne hara ɓi coo doo de waŋ ɓen ɓuy pa. Jar Israyel car wo ra go ɓuy de moslam wo. Jobo boŋ daŋ go gà hase. Saara joŋ waŋ Libna doo maga saara hay joŋ waŋ Jeriko no pa no.

³¹ Josuwe wo de jar Israyel wo ɓuy men wo Libna go, wo wo Lakisi, saara kal lagge jag feele ɓe day leʼn wo durgi.

³² Manwur kal hã jar Lakis wo go ne hara ɓi coo doo. Saara kal yãã sirn go ti naw ma de ɓog no, car wo ra go de moslamre wo doo ga saara hay joŋ jar Libna wo no pa no. Jobo daŋ go boŋ gà hase.

³³ Horam waŋ Geser raw urgi le caa war Lakisi. Josuwe taw wo ra go de jar ɓen ɓuy. Jobo boŋ daŋ go gà hase.

³⁴ Josuwe wo de jar Israyel wo ɓuy men wo Lakis go, wo wo Eglon.

³⁵ Saara lag jag feele ɓe day leʼn wo durgi. Saara yãã sirn go ti naw sen ni tuu, car wo jar ma ɓil ɓen wo go ɓuy de moslamre wo. Josuwe caa wer ɓaara go ti wur sen ni tuu doo ga se hay joŋ jar Lakis wo no pa no.

³⁶ Josuwe wo de jar Israyel wo ɓuy men wo Eglon go, wo wo Hebroŋ day leʼn wo durgi.

³⁷ Saara yãã sirn go, car wo jar ma ɓil ɓen wo de waŋ ɓaaran go de moslamre wo. Saara id jar ma ti progre ɓen wo go ɓuy lay. Jobo daŋ go boŋ gà has doo ga saara hay joŋ jar Eglon wo no pa no. Jar Israyel caa wo wer jar maga hay wo ɓi leege sen ni wo go ɓuy.

³⁸ Josuwe wo de jar Israyel wo ɓuy wo wo Debir day leʼn wo durgi.

³⁹ Saara yãã sirn de waŋ ɓen ɓuy de ɓi leege maga wo ti progre ɓen wo mo ɓuy. Saara car jar ma ɓil ɓaaran wo go ɓuy de moslamre wo, caa wo wer ɓaara go. Jobo boŋ daŋ go gà hase. Josuwe joŋ wo jar Debir wo de waŋ ɓaaran doo maga saara hay joŋ Hebroŋ nono, doo maga saara hay joŋ jar Libna wo de waŋ ɓaaran no pa no.

⁴⁰ Josuwe taw jar ma ɓil sirn wo go ɓuy : Jar ma ti húulìn wo, ma nen ɓaŋ ni wãyban wo, ma ɓil fuln wo, ma ti jeŋ maarog ma kluun wo ɓuy. Se taw waŋre ɓaaran wo go ɓuy lay. Josuwe caa wer ɓaara go ɓuy, men jobo go daŋge boŋ gà hase doo maga Manwuri, Baa mani Israyel hay wãã ne hẽn nono.

⁴¹ Josuwe taw jar sir maga le Kades-Barneya hãã leʼ go Gasa go ɓuy, de maga maŋ wo le Gosen hãã leʼ go Gabawoŋ mono.

⁴² Josuwe yãã sir sen wo go de waŋre ɓaaran wo ɓuy werga Manwuri, Baa mani Israyel hay durgi wer jar Israyel wo.

⁴³ Josuwe wo de jar wo ɓuy kal wo ferge le Gilgal ti ngel lagge ɓaara no.