JOŊRE 4 - Tupuri Bible

Á hoo Piyer wo de ge Jaŋ pel jar Kluurin wo

¹ De maga Piyer wo de ge Jaŋ le de sii wããren ne jar wo ɗa, jar siɗ jag wo, soode ma gor ti tiŋ Baa wo, de Sadusiyẽẽ raw wo age see ɓaara.

² Ɓil ɓaara de sõõge ti maga jar se ɓog wo yoo jar peele Yeso hadn wo, siɗ wo ga Yeso fer we go bir gi, had wo jar ga jar ma de húulín kãã wo ma fer ge go bir gi pa mono.

³ Á raw wo hoo rage, raw wo de ɓaara ti daŋgay ga say toŋ kway, werga wur hay go de coŋ ge.

⁴ Ti sen ni yoo jar maga hay coʼ wo sug wããre jar peele Yeson wo mono, debaŋ yoo ɓaara raw wo hã ɓili. Ngaɓa jar ma de yãã wããre Yeson raw wo yaʼge ciŋ ni nen ndar dwee.

⁵ Wo day ge toŋ ɓe, waŋre jar Jwif wo de jar kluuri ɓaaran wo, jar ma ndar wer wããre Baa wo ɓuy, raw wo tay see ɓaara le Jerusalem.

⁶ Á tay wo ti de gee an je kluu ma pel kããra siɗ jag no, Kayf, Jaŋ, Aleksaŋder wo de weere ma ti ɓĩĩni mani je kluu ma siɗ jag no.

⁷ Á raw wo ɗe jar peele Yeson wo le see ɓaara, raw wo wii rage ga : Diŋ de egre wose, noga ti jag wose ga nday pẽẽ bloo sen go de ɓe mo la?

⁸ Ama Nenterse ma bay ɗag raw baa ɓil Piyer go mbaŋ mbaŋ, Piyer kal riŋ rage ga : Nday waŋren wo, nday jar kluurin wo no,

⁹ nday wiɗ wùr wara ti de el maga wùr joŋ je ma de gayren de ɓe, ga wùr mo wãã go ga wùr pẽẽn go pẽẽ ge la so ga yawla.

¹⁰ Nen daga nday mo kon go de ele, nday ɓuy, daga jar Israyel mo ko wo ɓuy lay, bloo sen go de oo le pel ɓay mo woŋ deŋ, diŋ wer egre Yeso Kris ma Nasared maga nday ɓaln go ciŋ ti koo ma ɓal jar mono, Baa raw bir gi ɓe le go.

¹¹ Yeso diŋ je maga kefder Baa wãã ti ɓe ga : Á diŋ húulì maga nday jar bor tiŋ ɓoʼn wo go, Á fer kol ge diŋ húulì ma ti cõõ tiŋ so yaw.

¹² Je yãã jar go po ma tigriŋ bay wa so hase, werga ti tamsir la ɗúu je tigriŋ po ga Baa hãn le maga jar mo daʼ wo see ɓaara wer ɓe bay wa so.

¹³ Jar kluuri ma ɓoɗ faare wããren raw wo ngel ge, wer maga á ko wo cwãy re maga Piyer wo de gee Jaŋ de lagge ni mo lag no, ko wo lay ga á bay wo diŋ jar ma de had re po wo debaŋ wa pa, wo de koge ga á wo diŋ jar maga hay wo le wer Yeso ɓaa.

¹⁴ Ko wo bloon go de pẽẽ ge ɓiŋ ɓaara deŋ lay, blam sen á laa wo daʼ faage ma fer wããre ne hara ga so hase.

¹⁵ Á wo le ɓi tiŋma ma ɓoɗ ti wããre no, á raw wo riŋ rage ga : Laa we go, gwaʼ wo ɓoʼ faare wããre sen ti yoo ɓaara.

¹⁶ Á raw wo riŋ kããra ga : Jar Jerusalem wo ɓuy de ko fen mbuɗgi maga á joŋ ne wo mo deŋ lay, naa kãã ma kaŋ kiŋ ti ɓe ga lay, naa mo joŋ ra joŋ ge la?

¹⁷ Ama naa da we ga wããre sen mo dus go yoo wer jar wa no, ni naa joŋ bon ɓaara maga á mo sii wo wããre Yeso go ne jar wa so hase.

¹⁸ Á raw wo ɗe rage le, raw wo ruu rage ga : Sii we wããre, noga had we wããre Yeso wa so hase.

¹⁹ Piyer wo de gee Jaŋ raw wo fer wããre ne hara ga : Er we wããre sen de see ɓay ɗa la. Á yaŋ mbe de el ti ngel ɓe pel Baa maga wùr mo yãã jag ɓay daŋ Baa yawla?

²⁰ Ama ma wùr, fẽẽre maga wùr ko ra, wùr laa ra, wùr men siɗ rage go gà.

²¹ Jar kluuri ma ɓoɗ ti wããren fer wo joŋ bon ɓaara tigriŋ pa, blam sen á raw wo laa rage ga á mo see wo, werga á daʼ wo re maga saara mo laa ra ti daŋgay ti re ɓe ga, werga jar Jwif wo ɓuy togoɗ Baa ti fẽẽre maga joŋ mo hãʼ no.

²² Bloo se maga pẽẽ go de fen mbuɗgin la, kiŋgi ɓe go de daŋ doo naa.

Jar ma ti jag Baa tos wo

²³ De maga á laa ra wo go mo tuu, Piyer wo de gee Jaŋ raw wo raw ge se te ɓaaran wo, kal wo siɗ re maga waŋre jar siɗ jagn wo de jar kluuri jar Jwif wãɗ wo ne hara mono.

²⁴ Á wo wo laa wããre sen mokay, á raw wo hoo gẽẽge ɓaara ciŋ degaʼ ɓuy tos Baa ga : Ndo Waŋ wùr no, ndo joŋ ngel ma ciŋ wo de tamsirn ɓog ɓuy diŋ ndo, maarog de fẽẽre ma ɓil ɓaaran ɓuy joŋ ra diŋ ndo.

²⁵ Ndo wãã re sen le go de Nenterse ɓo, ndo raw kalge ɓe ne moo wùr Dafid wejõõ ɓon jag ga : Wer jarn fĩɗ wo see ɓaara keɗ see ɓaara le ɓa? Weere wer jarn kiɗ wo diŋ re ma de koɗ koɗ le ɓa?

²⁶ Waŋre ma kluuri ma ti sir la grag wo see ɓaara go ma dur gi, Jar kluurin tay wo jag go boŋ lay, Ma dur gi de Baa Waŋkluu wo de Mesi mo lay.

²⁷ Mbe doosen no kidolgi, ɓi leege sen lam taʼ la, Poŋse Pilad wo de Herod raw wo tay jag boŋ, de waŋren wo, weere Israyel wo de jar dehãy wo dur gi de Yeso wejõõ ɓo maga ndo maŋ go mono, diŋ Mesi.

²⁸ Mbe de sen ɓuy á bag wo go diŋ jag egre ɓo wo de ɗiggi ɓo maga ndo hay ɗign le go taŋgu pel bol mono.

²⁹ Patala ko car ge põõ ɓaaran ɗa la Waŋkluu, hã egre ne weere jõõre ɓon wo ga á mo sii wo wããre ɓon go bay hẽẽne.

³⁰ Mbeɗ doo ɓo le, ma pẽɗ jar go, de re ma kaŋ nen jar ti fẽẽre mbuɗgi maga ndo joŋ ra de egre wejõõ ɓo Yeso mono.

³¹ Á wo wo taw tosgen go mokay, ngel maga á wo de lagge ni raw fĩɗ gi, á wo ɓuy ɓil ɓaara raw bag ge go de Nenterse ma bay ɗag á raw wo ɓoʼ ɗee siɗ wããre Baa go de egre bay hẽẽne.

Jar ma ti jag Baa tay wo fẽẽre ɓaaran go ti kẽẽ boŋ

³² Ngaɓa jar ma de yãã wããre Yeson wo ɓuy tay wo jag go boŋ, de ɓil ɓaara ɓuy, de ɗiggi ɓaara ɓuy, jobo boŋ yoo ɓaara maga wãã ga kay la diŋ mo ma se bay wa, werga fẽẽren ɓuy de tayge ti kẽẽ boŋ.

³³ Jar peele Yeso kal wo rawge siɗ wããre Baa ne jare, lag wo go de egre wãã ge go ga Waŋkluu Yeso fer we go bir gi. Baa raw woo rage debaŋ lay.

³⁴ Jobo boŋ yoo ɓaara maga bay daʼ fen ma yaʼ re ma se ɓen wa bay wa, werga jar maga wo de payre, de tiŋri wo mo ɓuy, yeɗ ra wo go, a wo de solay sen wo ɓuy,

³⁵ hã ra wo ne jar peele Yeso wo doo, á raw ɓes solayn go, hã ne wosela ɓuy nen yaʼ re ma se ɓe go.

³⁶ Wersen Josef je Lefi, biŋ ɓi sir Sipre, jar peele Yeso raw wo kaŋ ɗúu togoɗge ɓe ga Barnabas (wer ɓe ga je coɓ nen jare),

³⁷ pay ɓe yaŋ, á raw yee ge ɓe go, raw age hã solay ne jar peele Yeso wo.