JOB 9 - Tupuri Bible

Job riŋ Bildad ga : Ndi ngaɓ see ɓi de Baa gà

¹ Job kal ferge ga :

² Kidolgi, ndi mbi de koge doosen nono. Je táabay joŋ ge keɗed pel Baa nà joŋge la?

³ Jobo mo riŋ bà ga se faa de Baa layblaʼ no, se kãã ma yiŋ jag ne je sen ti maapo boŋ yoo wiɗgi ɓe ma ndarn wo gà ɓuy.

⁴ Koge re wo de egren ɓuy wo nà diŋ ma Baa, wose day giŋ Baa yaŋ ga se kaŋ põõre ne hẽn ti gà la?

⁵ A yaɗ húulì wo, saara kon draʼ gà. A dwas ra go de bagge põõ ɓe no.

⁶ A daɗ tamsir go kemay kemay ɓuy, day dog ɓen hrag wo go.

⁷ A wãã wããre ne wuri, day wur naa le go gà. A tẽg jag tiŋ go ne gér wo ti.

⁸ Je maga ler ngel ma ciŋ go, day go ciŋ ti maarog wo nà diŋ se boŋ tuu.

⁹ Á hay joŋ gér ma kluurin wo, gér jar freŋ wo, de gojog wo de gér ma nen ɓaŋ wãybann wo nà diŋ se.

¹⁰ A joŋ fẽẽre ma kluuri maga jobo daʼ wer ɓaara gà wo de fẽẽre ma ngil jar wo debaŋ debaŋ.

¹¹ Koɗa á mo hee bà see ɓi la, nen ɓi kon gà. A mo yee bà nen go yaw, ndi laa mopo ni gà.

¹² Wose fer fen maga a naan go yaŋ ti ngel ɓe la? Wose wiin yaŋ ga : Ndo joŋ nà maysela la?

¹³ Baa men sõõge ɓil ɓen ti faage gà Rahab barkag ma nen biin wo de jar ma kayge ɓen wo ɓuy leɗ ge wo yaŋ go gesiŋ ɓaale ɓe.

¹⁴ Day ndi ɓin ndi ferge wããre ne hẽn an nà ferge la? Wããre ma hon ge so ga ndi kiɗn gi le ma wããge pel ɓe mo so la?

¹⁵ Ndi mo hay bà keɗed draʼa, ndi fer mopo ne hẽn gà ndi yãã pel je cag re ɓin nà diŋ o boŋ tuu.

¹⁶ Ndi mo ɗen bà, day á mo yiŋ baa jag ne ndi layblaʼ no, ndi bay de kaŋ ɗiggi ga á laa jag ɓi yaŋ nà wa.

¹⁷ Diŋ je se maga haw ti ɓi go gesiŋ de degurleege, kaŋ mbe re ma cee megen wo ne ndi ti reʼreʼ tuu,

¹⁸ Day bay men mege ɓoʼ egre meʼ wa ɓuy mono. Werga, á kãã maysee ɓi go de bone.

¹⁹ Ndi mo riŋ bà ga ndi sogn de girgiri, je egren nà diŋ se pa. Ndi ga ndi joŋ diŋ kiida, wose ɗenn yaŋ le ne ndi pel kiida la?

²⁰ Ndi hay bà keɗede, jag ɓi de baw ndi we go de wããre. Ndi mo hay bà de deele, jag ɓi de kaŋ mbe re go me ti pa.

²¹ Ndi nà de deele so yawla? Sen bay de koge me wa ɗa pa. Sãy tenen bay ti ɓi wa so.

²² Re po bay hag ndi wa! Diŋ wersen ndi wãã mbi ga Baa yee nen je ma de deelen mbe go doo je ma de re tin no lay.

²³ Daga re po mo a le ma taw naw ɓi go ɗala! Day se fruy ɓen nà ti re maga caa jar ma bay re tin wo mo yaw no.

²⁴ A hã tamsir go ne jar hãã wo doo, yee nen jar cag re ma ɓil ɓen wo go. Hayga bay diŋ se wa no, á diŋ wose sen ge so la?

²⁵ Naw ɓin ɗee wo deparday de daŋ je ɗee, á raw wo go fid fidi, ndi bay ko cõõre ɓaara wa.

²⁶ Á raw wo go doo daage fǐiri bii wo nono, doo gebeg maga de cwaage ne này ɓe ti nono.

²⁷ Ndi mo riŋ bà ga ndi yõõ ti go ti re ma see ɓi no, ndi law gà so, ndi coɓ see ɓi yaŋ mbi draʼa,

²⁸ Hẽẽne go de caa ndi doo re maga de caa ndi mo deŋ no. Ndi de koge ga ndo wãã ge ga ndi diŋ je joŋ re.

²⁹ Day je ma de re tin nà diŋ ndi mbi an so yawla! Wer mayse ga ndo gay coo ɓi no le la?

³⁰ Ndi mo yog bà le go nen bii Baa, ndi mo yog baa doo ɓi wo go de sabuli,

³¹ Ndo hee ge mbo ndi nen pããge ma gulɓud nen maga õõbe ɓin mo tegaɓ wo go, mo horge wo see ne ndi toge.

³² A bay diŋ je táabay doo ndi nen maga ndi fer wããre ne hẽne, day wùr wo de kããra jag kiida wa lay.

³³ Je blaw wùr maga wãã re wùr ɓog ɓuy bay wa pa.

³⁴ Daga á mo men mbar ndi go de graw ɓe no, mo kaŋ hẽẽne me ti ma daŋ see ɓi go wa so hase.

³⁵ Doo kay nono, ni ndi wãã ge wããre yaŋ, day ndi joŋ ge hẽẽne gà lay. Day hayga á joŋ we no gà no, see ɓi bay diŋ ma ɓi wa so.