JOB 8 - Tupuri Bible

Bildad fer wããre ne Jobe : Ɓlagge bas bay re gà

¹ Bildad ma Suwa kal wãã wããre day gana :

² Ndo men ge wãã fẽẽre ma doo se kayn wo nà hunla? Day wããre ma jag ɓo kol ge wo diŋ degurleege ma gig gig so yawla?

³ Ndo ko nen ɓo ga Baa bay joŋ re ti ngel ɓe wa so gà yawla? Je ma de egre ɓuyn bay joŋ mopo ti faage ɓe wa so yawla?

⁴ Hayga weere ɓon hay joŋ wo ɓlagge we see ɓe, day se kaŋ we ne hara ti nà diŋ põõre debaycõõre ɓaara muyla!

⁵ Ane, ma ɓo mono, hayga ndo kiɗ Baa we, ndo yãã o we pel je ma de egre ɓuyn no,

⁶ Hayga ndo joŋ we bay cerge see, day ndo oo we de deele no, kidolgi cwãy se oo ge yaŋ ti ɓo, day se fer ndo yaŋ go ti ngel hayle ɓon keɗede.

⁷ Twore maga ndo hay taŋgu nen ɓe joŋ ge bà diŋ mopo meʼ ɗa pa yaw, maga sen a ge le blam joŋ ge kluu de daŋ se no.

⁸ Wiɗ jag jar maga hay joŋ wo le go taŋgu naa mono, kaŋ ti ti fẽẽre maga hay joŋ wo le nen pããre ɓaara wo mono.

⁹ Werga, naa nà diŋ jar ma suu wo, naa bay de ko mopo wa. Naw naa ti tamsir la doo nencee nono.

¹⁰ Á wo de see ɓaara had ge wo ndo yaŋ, day wããn ge wo yaŋ ne ndo. Á fer ge wo wããre ma ɓil ɓaara yaŋ ne ndo doo kay nono gana :

¹¹ Gusur tĩĩ mbe yaŋ ti ngel ma bay bii yawla? Fíiri-bii jaw mbe yaŋ bay bii yawla?

¹² Bii joŋ we gà no, á de laɓay tiʼ ɗa, day jobo saŋn go gà lay, se hig mbe go deparday tuu taŋgu fíi ma lan wo.

¹³ Re daʼ jar maga yõõ wo ti go ti Baa nà doosen no lay, Mopo maga je maga bay hẽẽ Baa wa has de gorge ɓe nen ɗiggi ɓe ndoʼ ti go rus tuu lay.

¹⁴ Fen maga hay nen ɓe dwas go, kaŋge ɗiggi maga se hay de kaŋge ɓe nà doo bay goboŋgoboŋgi nono.

¹⁵ Á de gis see ɓe see tiŋ ɓe no, se leʼ go lay. Á kaŋ faale ɓe see ɓe, tiŋ laa go lay.

¹⁶ Á de ceg kaʼ de pãy, jag doo ɓe ɗee wo doo go ne pay sugnee ɓen ti,

¹⁷ Kããge ɓe kal wo ti holaŋ húulì wo kurwaʼ kurwaʼa, kal wo yoo húulì wo.

¹⁸ Day de maga à naa we go no, ngel maga á hay ni kaŋ kiŋ go ti ɓe ga : Ndi kon bà ti boŋ gà has ɓuy!

¹⁹ Mokay diŋ re maga á yiŋ de ɓe ti faage ɓen mono, day jar ma tigriŋ tĩĩ wo go ti ngel ɓe.

²⁰ Cwãy, Baa bay go tob je ma de deelen wa, day se maŋ doo jar maga joŋ wo ɓlagge go ciŋ gà lay.

²¹ Ge la meʼ tuu mono, á hã ge mbe feg yaŋ ne ndo jage, day jag ɓo caa ge feg yaŋ go.

²² Sõõre wùu gi ti yaŋ go ne jar maga wo de caa hee de ɓo mono, tiŋ mani jar joŋ ɓlaggen yee ge nen yaŋ go.