JOB 7 - Tupuri Bible

Job ga : Baa, ɗawa taw ndi go

¹ Tenen je táabay ti tamsir la bay doo mani soode no wa yawla? Naw ɓen bay wo doo mani je maga joŋ joŋre ti solay no wa yawla?

² Doo gebee maga de sãy nencee ti nono, doo je joŋre ti solay maga de gor poɗge ɓen nono,

³ Ndi daʼ tum ti few ma ɓin wo diŋ lawge, poɗge ma ɓin tum de suŋ diŋ bone.

⁴ De maga ndi suu mono ndi ga ndi ur go ciŋ nà hun ga day ngel tee go me ti mo sola? Day see ɓi mbe jag daɗ ndi ceɓ doo cege no, hãã wo go de jag toŋ.

⁵ Cogcõõre see wo ne ndi see sunug sunugi, gwẽẽ go see ɓi ɓuy. Hõõgese ɓi kuyuɓ go, car go nduguɗ nduguɗi.

⁶ Naw ɓin ɗee wo deparday de daŋ saale mbaaraw mani je ɓod õõbe no, á dwas wo go, ndi gor mopo gà so!

⁷ Fer mbo ɗig ti ga tenen ɓi bay diŋ mopo wa ɗala! Nen ɓi ko ge wo fruygi po ge gà so.

⁸ Nen maga de ko mege baa ge ndi gà so hase, ndo raŋ ge nen yaŋ kiɗ ndi, day ndi joŋ ge gà so hase.

⁹ Sware dwas go, yee nen go, je maga raw wo ni jar húulí wo, kãã ma ferge le go ciŋ gà so doosen no lay.

¹⁰ Á fer ge le liŋ ni ɓe gà so hase, ngel maga á hay de tiŋ ni yõõ ge ti go ti ɓe lay.

¹¹ Diŋ wersen so ga ndi day ɗaw jag ɓi gà mono, ndi wãã ge mbi go ti coocoo maga de baa ndi nen ɗiggi ɓi mono, ndi law ge mbi see ɓi ti bon ma ti maysee ɓi no.

¹² Ndi diŋ maarog noga barkag nen maga nen ɓo me ti taʼ gor ti ɓi yawla?

¹³ De maga ndi ɗig ga ndi daʼ teŋge nen yaŋ ti ngel suuli ɓi no, noga ndi suu we no, lawge ɓin joŋ yaŋ ɗawa mono,

¹⁴ Ndo caa hẽẽne ɓi go de lwaʼge wo, ndo daŋ jiili ɓi go de fẽẽre mbuɗgi nen wo.

¹⁵ Ti ɓi diŋ sãy maga dog me go mono! Húulí ɗawa de daŋ ngogre ma se ga gwaʼ diŋ hm tawa mono!

¹⁶ Sãy sen bay ti ɓi wa so! Ndi bay mbi ma tum wa lay pa mono! Men mbo ndi go ɗala, werga naw ɓin bay wo diŋ mopo mbaara wa lay mono.

¹⁷ Je tabayn bà diŋ wose lay so ga ndo kaŋ ɗiggi ti kluu ɓe no, day ndo ɗawn ɓil doo kay no lay so la?

¹⁸ A bà diŋ wose maga ndo car ngel le koge ɓe tum de jag toŋ, day ndo lamn de re wo ceɓ no la?

¹⁹ Ndo maŋ ge nen ɓo go ne ndi ti nà hunla? Ndo men ge ndi ɗawa maga ndi mo lig sããre lay nà hunla?

²⁰ Riŋga ndi de ma joŋ ɓlagge so layblaʼ no, ndi hay joŋ mo de mayse no maʼ la, ndo je ma gor ti jar téebeere wo no? Wer mayse ga ndo mbuɗ nen ma ɓon diŋ de ɓi no la? Wer mayse ga ndi kol see ɓo diŋ põõre la?

²¹ Ndo bay nen maga ndo maŋ ɓlagge ɓin go day ndo kaŋ ti ti debaycõõre ɓin gà so wa yawla? Werga, ndi day nà kalge go nen sir so, ndo kiɗ gi ndi day ndi joŋ ge gà so hase.