JOB 6 - Tupuri Bible

Job fer wããre ne Elifase

¹ Ndi ra de koɗ gà. Job raw fer wããre ne hẽn ga :

² Hayga á mo hay we ga à maŋ klew fen maga de cog ndi, day à tay re maga wo de caa ndi mo ɓuy go boŋ ti klew no,

³ Á de hay wo patala põõge de daŋ duguɗgi ma jag maaroge. Diŋ wersen ga à bay go ko wããre ɓin wo go diŋ mopo hala wa mono.

⁴ Werga, waa mani je ma de egre ɓuyn wo de tõɗ mege, day nee ɓaaran go de kalge me nen này. Fẽẽre ma joŋ hẽẽne mani Baan cir wo le go ma dur ndi.

⁵ Gerhẽẽ ma yooway ra mbe koŋne yaŋ ti jeŋ hõõ depãy yawla? Bloodày ra mbe koŋne yaŋ ti jeŋ jug ɓe ma de coʼgen yawla?

⁶ Jobo re mbe mo ma kuɓkuɓ bay manda ti mbe yawla? Kris pããre mopo yaŋ mbe yãã jag jobo yawla?

⁷ Fen maga sãy duʼgi ɓe hay bay ti ɓi wa, ndi kol go rege ɓe, hayba de maga á bay ma rege wa mo ɓuy!

⁸ Daga wiigi ɓin mo bag wo jag go, day Baa mo bag jag fen maga ndi de gorge ɓe go ɗala!

⁹ Daga á mo coo jag Baa, day á mo a ndreɗ ndi go ɗala! Daga á mo coŋ doo ɓe, day mo dog ndi go ɗala!

¹⁰ Ndi de hay bà yaŋ de teŋ nen ɗawa, ndi mo hay yor yaŋ ciŋ de fruygi, bà mbe de maga bon ma see ɓin de raw ti ɓi mo ɓuy. Sen kaŋ ne ga ndi hay go de tob wããre je ma bay ɗagn wa ɗa.

¹¹ Egre ɓi sen kemay nono maga ndi gorn pa la? Tawge ti ɓi bà diŋ mayse maga ndi hay yeʼ tenen pa la?

¹² Egre ɓi diŋ egre húulì yawla? See ɓi diŋ boo dob yawla?

¹³ Je caa war ɓi bay wa, day ngar maga ndi mo joŋ no kay yaŋ po mbe nen ɓi pa yawla?

¹⁴ Je maga de ma joŋ bon ko mbe decoo nen bar ɓe, á mo hay bà ga a men joŋ hẽẽne go doo je ma de egre ɓuyn yaw.

¹⁵ Hẽẽre ɓin jãɗ wo ndi doo blam bii nono, doo blam bii maga ɓil ɓe hig go nono.

¹⁶ Bii ɓaara doɓ wo go doo glas no, neje ngroɓ wo ne hẽn nen ni pa.

¹⁷ Ngel ti cege wo age mokay saara õg go, ceg leʼ wùu go mokay saara hig ɓil go.

¹⁸ Faage raw yee nen jar raŋge maga wo wer kããra ngaɓa wo go, saara raw wo yoo puuli no, day taw wo go.

¹⁹ Jar raŋge maga wo wer kããra ngaɓa ma ti sir Tema kaŋ wo nen ɓaara wo ti bii sen wo, jar raŋge ma Saban kaŋ wo ɗiggi ɓaara ti ɓe.

²⁰ Ama sõõre joŋ ge ra ti maga saara kaŋ ɗiggi ɓaara ti ɓe mono, day sõõre wùu gi ti go ne hara de maga saara wo ge go dayge jag ɓe ni lag so mono.

²¹ Nday patala mo lag nà doosen no so no, nday ko re maga de caa ndi mono day hẽẽne raw caa nday go!

²² Ndi hay wii nday we ga nday mo hã mopo me noga nday mo coo ti ɓi go de horog ma doo ɓay wo yawla?

²³ Ndi hay wii nday we ga nday mo yãã ndi go doo je hee no, noga nday mo hog ndi le go doo jar hunn wo yawla?

²⁴ Kaŋ we nen ɓi ti wããre, ni ndi fer yaŋ go baʼa, kaŋ we nen ɓi ti ngel maga ndi de yeege ni mono.

²⁵ Wããre ma ti ngel ɓe kay mbaara jobo, day pedped ruugi ɓayn wo mo deŋ maŋ wo mayse bà me so la?

²⁶ Nday ɗig nà ga nday ɓoʼ foo wããre ɓin wo go, nday kol wããre je maga ɗiggi ɓe daŋ go, go diŋ wããre ma nen leege so ge?

²⁷ Nday ɓoʼ mbay re ne wel holge ti de wãywáale tuu, day nday coo bar ɓayn go de mopo lay!

²⁸ Patalam no, mbuɗ we nen ɓay mbay ne ndi ti ɗala, ndi mbi nà diŋ je maga car geteʼ pel ɓay yawla?

²⁹ Fer we ɗiggi ɓay le, ndi kam nday kamge, hay we diŋ jar ma bay ngar wa! Fer we mbay ɗiggi ɓay le, keɗed ɓin yaŋ mbe see ɓi ɗa!

³⁰ Jag ɓi hay wãã fen ma bay ngar we la yawla? Ti wããre ma jag ɓi wo mono, ndi bay go car ɓil re maga leɗ wo ne jar ti wo wa yawla?