JOB 5 - Tupuri Bible

¹ ʼWaa mbo war so, je maga yiŋ jag yaŋ ne ndo daʼ yaŋ layblaʼ no! Ndo wii gi nà diŋ wose yoo jar ma bay ɗagn wo mo so la?

² Kidolgi jag jiili taw je ma bay ko reen go, sõɗge ɓil ʼwar je ma de loɗgen go.

³ Ndi ko je ma bay ko reen de laa cẽw, kola tiŋ mani ɓen mbe go de frumgi koɗe.

⁴ Weere ɓe maŋ wo ɓil go see faage pẽẽge no, re raw baw rage jag kiida, day je yãã rage go bay wa hase!

⁵ Jar maga wo koŋne re ge wo mo maga a ween go, hẽẽ wo laɓ hõõre ma ti ɓen gà ɓuy. Jar ma de koŋne ɓil lig gi wo horog ɓen go.

⁶ Re maga caa jobo kal le go nen sir gà bon maga daʼ jobo tĩĩ le gesiŋ gà.

⁷ Je táabay biŋ go nà ma joŋ bone, doo ga felge wùu raw wo go ciŋ yee nen go no lay no.

⁸ Á hay nà diŋ ndi no, ndi de kiɗ ɓin diŋ Baa, ndi de men re ɓin ɗawa nà diŋ ne Baa doo.

⁹ A joŋ fẽẽre ma kluuri wo de fẽẽre maga daʼ wo wer doo jobo gàn wo, joŋ fẽẽre ma ngil jar wo ngaɓa.

¹⁰ A ra baa le ciŋ ti tamsiri, cwaa bii le ɓil payre wo.

¹¹ A lag jar maga wo go blam kããra wo go ciŋ ti jare, day jar maga wo nen lawge wo wo daʼ see ɓaara.

¹² A ɓlag fẽẽre maga jar ma de ɗeŋ kaŋ wo ra wo pel ma joŋge wo go, day doo ɓaara kãã ma joŋ mopo maga sii ti ɓaara gà hase.

¹³ A bag jar ma de ko reen wo de ɗeŋ ɓaaran ɓuy, day bagge yaŋ ɓaara ma de hilan draʼ maŋ mopo ne hara meʼ draʼ gà hase.

¹⁴ Diŋ jar se maga suŋgu ɓoʼ mbe ne hara ti de ceg kãg tuu, day saara lam ngel de wur ɗeger doo ga ngel de suŋ no mono.

¹⁵ Ane Baa yãã je coon go jag moslam maga kal le go jag ɓaara mono, yããn go doo je ma de egre no.

¹⁶ Doo kay no so no ɗiggi je huglin raw ferge le gor mopo, day je ma debaycõõre kaŋ ge doo go ti dum lay.

¹⁷ Doo kay no so mono, de woore ti je maga Baa ruun mono! Hoo sug ti liŋgi maga je ma de egre ɓuyn de liŋ ndo mono!

¹⁸ Werga, caa wããge ne jobo see, day saʼn nà diŋ se. Á kaŋ re ne jobo ti, day se yããn go jag ɓe.

¹⁹ A dog ge yãɗ ndo yaŋ go jag re wo ɓaale hiiraʼa, day ma de renam mokay re po ma de ɓlagge daʼ ndo gà so.

²⁰ Á yãã ge ndo yaŋ go jag húulí ti wur koŋne no, yãã ge ndo yaŋ go jag moslam ti wur jawn lay.

²¹ Wããre kal ge le go jag jobo ti ɓo de ɓlagge gà lay, ndo joŋ ge hẽẽne de maga re ma ɓlag jarn a ge mo gà lay.

²² Ti ɓo joŋ ge yaŋ go de yõõge nen re ma ɓlag jarn doo ma ti wur koŋnen no pa no. Ndo joŋ ge hẽẽne doo nàyre ma ti tamsirn wo gà lay.

²³ Werga, ndo tay ge jag yaŋ go de húulì ma ɓil payre wo, day nàyre ma yoofíi joŋ ge wo yaŋ go jam de ɓo.

²⁴ Ndo ko ge yaŋ ga jam yaŋ liŋ ni ɓo, ndo wo ge yaŋ ko ngel koɗ horog ɓon wo, day fen ɓo po boŋ gwaʼ ge go gà.

²⁵ Ndo ko ge wer mani ɓon wo yaŋ de tesge ngaɓa, day kããge ɓo jor ge yaŋ doo fíi ma ti sir nono.

²⁶ Ndo kal ge yaŋ ɓi tuu go de tããbe koyãɓ doo maga à caa coore go ti gesaŋ ti wur ɓe nono.

²⁷ Mokay diŋ fen maga wùr daʼ wer ɓe go mono, day a nà no tuu seŋ no! Gwaʼ diŋ maga ndo laa ne, day ndo kon ga á nà no lay!