JOB 42 - Tupuri Bible

Job ko mbe tuu ga se bay diŋ mopo wa

¹ Job raw fer wããre ne Manwur ga :

² Ndi ko we ga ndo de kããge ti fẽẽren ɓuy. Ndi ko we ga mopo bay de gaali see ɓo maga ndo ɗig wer ɓe ɗiggi ɗa wa.

³ Ndo ga wose ɓod suŋgu ne joŋre ɓo maga ndo ɓod faage ɓaara go nen de wããre ma bay ngar wo la mono, kidolgi ndi wãã fẽẽre ma ngil jar ma de raw ti ɓi ga ndi hay bay de ko rage wa nà doo bay daʼ were.

⁴ Ndo ga ndi mo coʼ sug ɓo day ni ndo wãã wããre, ndo wiɗ jag ɓi, ni ndi mo kaŋ nen ɓo ti ɓo no.

⁵ Sug ɓi hay laa wããre ti ɓo laage, day patala nen ɓi ko ndo we so.

⁶ Diŋ wersen ndi baw see ɓi de wããre, day ndi ɓod jag go de suuli nen sir wo de sããge.

BAA FER JOB GO DOO MA TAŊGUN NONO

⁷ Blam maga Manwur wãã wããre sen wo go ne Job mono, Manwur kal riŋ Elifas ma Teman ga : Ɓil ɓi de sõõge debaŋ ne nday ti de bar ɓo ma ɓogn wo werga nday hay wãã wããre ti ɓi de faage ɓe doo maga wejõõ ɓi Job hay wãã no gà.

⁸ Patala hoo bloore deere renam de gamlaare renam, ni nday wo we daʼ wejõõ ɓi Jobe, day se sii siigi jag maga à roɗ mo ɓen go ɓuy yaŋ go ti ɓay. Wejõõ ɓi Job tos yaŋ ti ɓay, day wer maga ndi laa jag ɓe mono, ndi joŋ ge nday ti jag loɗge ɓayn gà. Werga, nday hay wãã wããre ti faage ɓe doo ga wejõõ ɓi Job hay wããn no gà.

⁹ Elifas ma Temane, Bildad ma Suwa wo de Sofar ma Naama raw wo rawge. Saara kal joŋge doo maga Manwur hay wããn ne hara nono, day Manwur raw laa jag Jobe.

¹⁰ De maga Job tos go ti bar ɓen wo mono, Manwur raw fer Job go doo ma taŋgun nono. Manwur kal yaʼ fẽẽre Job wo ne hẽn ciŋ ni jag jag ɓoge.

¹¹ Hẽẽre ɓe ma twerpiirin wo, ma tenaaren ɓen wo de jar ma de koge ɓe ɓaan wo ɓuy raw wo age see ɓe, day saara re de ɓe liŋ ni ɓe. Saara raw lawge ɓe, teŋ wo nen ɓe ti re maga Manwur hay a de ɓaara ne hẽn ti mo ɓuy no. Wosela ɓuy yoo ɓaara hã solay Kesita ne hẽn boŋ de ɓeege boo biŋni boŋ lay.

¹² Manwur raw kaŋ bosaʼ ne tenen Job ma blamn ti de daŋ ma taŋgu no. Job raw joŋge de sããre ndar hwal ti naa, yoŋyoŋ wo ndar hiiraʼa, deere jag jag ndare, maare gerhẽẽre wo ndar lay.

¹³ Se raw biŋ weere ma twepiiri renam, mayre swaʼa lay.

¹⁴ Se kal kaŋ ɗúu ne may ma taŋgun ga Yemima, ne ma de ɓogn ga Ketsiya, ne ma de swaʼn ga Keren-Hapug.

¹⁵ Naare po hay bay wo ɓil sirn ni de woore doo mayre mani Jobn wo no lay wa. Pan ɓaara raw car tway ne hara yoo hẽẽre ɓaaran wo lay.

¹⁶ Job raw kiŋgi blam sen ni kis ti ɓe doo naa. Se raw ko weere ɓe wo, ko weere mani weere ɓen wo hãã wo go ti gutur-gutur ɓe wo.

¹⁷ Job huu go de tããbe debaŋ lay, de kiŋgi pur lay.