JOB 41 - Tupuri Bible

¹ Gorge ɓe tawa caa bii go ne jar ɓili. Tiʼ ɓen tawa kaŋ wer jar go leɗge gesiŋ gorgesarge.

² Jobo bay de jiili boŋ ma woge duʼgi ɓe wa, wose day oo yaŋ deŋ ma yiŋ pel de ɓi la?

³ Wose hay taa mopo we ne ndi maga ndi de hay fern ne hẽn la? Fẽẽre ma ti tamsir wo ɓuy diŋ ma ɓi.

⁴ Ndi fer go baʼ doo hẽẽne ɓaale ɓen wo gà lay, doo egre ɓen wo de hõõgese ɓe ma luman mo tiʼ gà lay.

⁵ Wose hay naa õõbe we go ne hẽn ti la? Wose kal see ɓe yaŋ ne hẽn jag la?

⁶ Wose hay hãʼ jag ɓe we go ti boŋ la? Saŋ ɓe joŋ wo hẽẽne ne jare.

⁷ Flegre ma faale ɓe ma de hoo jag ciŋn wo doo gidigli ma kiŋkiŋ wo nono, day wo go de saɗge see kããra kidkid doo ga à car saara carge de mopo nono.

⁸ Á wo go de hee doo see kããra, leege laa go nen ɓaara meʼ gà hase.

⁹ Á wo go de saɗge see kããra, ɗaw wo kããra day blaw ɓil go gà hase.

¹⁰ Cwũyri ɓe bel wùu, nen ɓe wo doo sagge waa maga naa le de jag toŋ nono.

¹¹ Wùu ray le go jag ɓe, wùu fel wo le go jag ɓe.

¹² Cug ndar le go hũy ɓe doo toɓoole ma de kaŋge ti wùu nono, doo temnee maga go de ur ti debaŋ nono.

¹³ Ɓodge egre ɓe baa wùu hegre, trum wùu kal le go jag ɓe.

¹⁴ Egre ɓen nà gõõge ɓe, jar san wo go doo mblar ɓe.

¹⁵ Ɓlog ma see ɓen wo go de saɗge see kããra kidkid ɓuy. Mopo re see ɓe gà has ɓuy.

¹⁶ Piili ɓe graŋ doo húulì nono, graŋ doo man niini nono.

¹⁷ De maga á maŋ ti ɓe ciŋ mono, jar ma de egren wo draʼ joŋ wo hẽẽne, paɗ wo go ti jeŋ doo mblar ɓe maga far ra go mono.

¹⁸ Je maga see wo ne hẽn ti mono, moslam ɓe no, jaw ɓe no, manjaw ɓen wo de ngoŋ ɓen kãã wo see ɓe gà.

¹⁹ Á ko boon doo fíi nono, ko boo dobn doo koo ma de sõʼge nono.

²⁰ Á ɗee doo waa gà húulì maga à jwag ra de garfũyda wo see ɓe doo fíi nono.

²¹ Graw see ɓe doo fíi nono, á ɓoʼ foo samge manjawn go.

²² Ponde ma de ndar jag ndelem ndelem wo nen ɓil ɓe, ndo daʼ ndo ga boo ma mbug nen sir maga de kogge nen pããge nono.

²³ Á ndar pããge ma wer maarog wo le go ciŋ doo temnee maga ndar mopo le go ciŋ ti wùu taʼ nono. Á doɓ nen maarog go doo ɓil temnee maga à roɗ fen fõõre ni nono.

²⁴ Blam ɓe gwaʼ tiʼ sagge, bii pud ti ɓe proh de puy doo ti je tããbe nono.

²⁵ Ti tamsir la je wãã re ɓe bay wa. À hay boon maga hẽẽne mo joŋn wa hase.

²⁶ Nen ɓe ti fẽẽre ma de daŋ kããra kluuri ciŋn wo mo ɓuy no, day se diŋ waŋ nàyre maga wo go ti kããra mo ɓuy no.