JOB 40 - Tupuri Bible

Jobe, ndo ga ndo ngaf de ɓi so mono

¹ Manwur fer wãã wããre tigriŋ pa day riŋ Job ga :

² Je ko faaren ɗe je ma de egre ɓuyn nà pel kiida so yawla? Je giŋ Baan yaŋ de fen ma ferge ti sen ni yawla?

Job fer wããre ne Baa

³ Job raw ferge ne Manwur ga :

⁴ Koɗa, ndi diŋ mopo meʼ koɗe, day ndi ferge mayse baa ne ndo ni la? Ndi kuɓ doo we go jag ɓi.

⁵ Ndi hay wãã go ɓaale boŋ, ndi fer mopo ni gà so hase. Ma de ɓogn mokay ndi wãã mopo ciŋ ti ɓe ni meʼ gà so hase.

Jobe, ndo ga ndo foo gà so mono

⁶ Manwur kal fer wããre ne Job nen degurleege day ga :

⁷ Saʼ sag ɓo de mblaaga doo jobo ma twar nono. Ndi wiɗ gi jag ɓo yaŋ, ni ndo kaŋ nen ɓi ti ɓin so.

⁸ Ndo da wããge nà ga ndi ko cag re de el gà so yawla? Ndo baw ge ndi de wããre nen maga ma ɓo mo coo so yawla?

⁹ Doo ɓo yaŋ mbe doo mani Baan no yawla? Ndo car mbo põõ yaŋ go de gẽẽge kloŋ kloŋ doo ɓen no lay yawla?

¹⁰ Bag jag see ɓo go de gragge de woore, grag see ɓo go de togoɗge wo de kluu so!

¹¹ Sõõ ɓil go twore sõõ lay, ko jar far ti see ɓaara ciŋn wo day ni ndo fer ti ɓaara go gesiŋ so!

¹² Ko jar far ti see ɓaara ciŋn wo ɓuy, ni ndo ham jag ɓaara go so! Ndreɗ jar ɓlaggen wo go jag taʼ boŋ ɗa lay so la?

¹³ Yee nen ɓaara go jag taʼ boŋ nen siri, maʼ jag ɓaara ɓil tiŋ daŋgay ma de hebgen so!

¹⁴ Doo kay no so no, ndi de see ɓi ndi maŋ ge ti ɓo yaŋ ciŋ, werga de deele ɓon joŋ ge diŋ fen hã pẽẽge ne ndo so mono!

Jobe, joŋ ker diŋ ndo yawla?

¹⁵ Ko ker ma nen bii maga ndi joŋn doo ndo no lay mo ɗala : A re fíi doo day no lay.

¹⁶ Kon ɗala, egre ɓen nà sag ɓe, á de hm yoo nà wer này ɓe ma de saɗge kidkid nen ɓil ɓen mono.

¹⁷ A hig waale ɓe go doo koo seder nono, kããge ma ɓaale ɓen wo go de kalge nen kẽẽ krwaʼ krwaʼa.

¹⁸ Hm ɓe wo doo boo dob ma de rum ɓil nono, hm ɓe wo ɓuy doo boore ma de kadge wo nono.

¹⁹ Á diŋ jag joŋre mani Baa no, je maga joŋn raw her moslam ne hẽn jage.

²⁰ Á wo le daʼ rege ɓen ti ngel ma de farge ciŋ wo, ti ngel maga nàyre ma yoofíi joŋ wo hragge ni mono.

²¹ Á suu nà wer gedem wo, wo de yoŋre wer gusur ma nen bii wo.

²² Gedem baa wo nencee ne hẽn ti, kesme ma ɓil log yoŋ wo ne go.

²³ Yuuri bii maarogn mo hay bà ii layblaʼ no, se joŋ hẽẽne gà hase. Bii Jurdẽẽ mo kag baa ne hẽn jag yaw, se mbe tum go de yõõ ti.

²⁴ Hayga nen ɓe go lag koge no, jobo baan mbe yaŋ yawla? Jobo baan yaŋ mbe ti rew ma fee hũy ɓe yawla?

Jobe, ndo joŋ mbo hragge yaŋ de sĩĩ yawla?

²⁵ Ndo baa mbo sĩĩ yaŋ le go ciŋ ti tiɗeb ma bag cẽẽ yawla? Ndo kaa mbo jag ɓe yaŋ de saale yawla?

²⁶ Ndo hee mbo fǐiri bii yaŋ ne hẽn jag yawla? Ndo tul mbo jag gesiŋ ɓe yaŋ de waa yawla?

²⁷ A yõõ ti yaŋ mbe kem ndo wolaŋ yawla? A wãã mbe wããre ma de el yaŋ ne ndo yawla?

²⁸ Á tay mbe jag yaŋ de ɓo yawla? Ndo baa mbo yaŋ go gebee ɓo ma tum yawla?

²⁹ Ndo joŋ mbo foo yaŋ de ɓe doo ga ndo joŋ de wedwee no yawla? Ndo saʼn yaŋ mbo kaʼ maga mayre tigliiri ɓon mo joŋ wo hragge de ɓe yawla?

³⁰ Jar bag cẽẽ ma de tay doo baan wo yaŋ mbaara ma woge de ɓe go yeege nen maga jar trere joŋ wo yoo ɓe yawla?

³¹ Ndo soʼ mbo ne yaŋ ti hõõge ɓe de ko ma de ceɗ jage, noga ndo soʼn mbo yaŋ ti de gecweg yawla?

³² Leʼn mbo durgi ɗala, ndo dog ge toɓog ɓe gà so hase.