JOB 4 - Tupuri Bible

Elifas wãã wããre ne Jobe

¹ Elifas ma Teman raw wãã wããre day ga :

² Hayga à wãã wããre po we mo meʼ nà sen gay ndo yawla? Day wose kãã yaŋ ma ɗaw jag ɓe ti wããre gà.

³ Koɗa, ndo hay had jar debaŋ de wããre wo, ndo hay coɓ nen jar maga gay wo go mono,

⁴ Ndo hay maŋ je maga hay leʼ go gesiŋ go ciŋ de wããre ma jag ɓo wo, ndo hay kay je maga hay hrag ɓaale go mono.

⁵ Day patala á kol ti ɓo lay so, ndo raw gayge go! Day patala de maga reen duʼ ndo lay so, ndo raw maʼ nen ti go!

⁶ Hẽẽne maga ndo joŋ doo Baa bay diŋ fen ma deŋ ndon wa yawla? Kay ndo nen maga ndo mo kaŋ mbo ɗiggi ɓo gorge ɗa mo nà bay diŋ faage ɓo ma de deelen wa yawla?

⁷ Fer ɗiggi ti ngel ma blam le ɗala, je ma bay re ti ma hon hay taw go so la? Sen hay joŋ le gen ga jar ma de deele yee wo nen go so la?

⁸ Doo maga ndi hay kon no mono, jar maga jee wo wer debaycõõre, day joʼ wo hun mono, sen weege wo leʼge ɓe.

⁹ Baa sam pũũri go de ɓaara day leege bagge põõ ɓen raw de ɓaara were.

¹⁰ Mingir bũɗi, gaagir car roo, saŋ weere mingir hrag wo go.

¹¹ Mingir huu go doo coo này, day weere manmingir dus wo ɓil go.

¹² Wããre po nduu ndi le freŋ day sug ɓi raw laa sweg ɓe.

¹³ De wur maga wer lwaʼge a wo ne jar ti sarsar de suŋ, day jar téebeere wo go de laa naa ɓuy mono.

¹⁴ Hẽẽne raw caa ndi, see ɓi kal daɗ ndi day hm ɓi wo ɓuy yir wo ndi.

¹⁵ Nenceere mopo raw heege me ti, day ti ɓi raw hoo ndi.

¹⁶ Jobo hay de oole deŋ pel ɓi, day ndi laa daʼ wer go ne hẽn ga á diŋ wosela gà. Nenceere ɓe hay mbe nen ɓi taʼ ane. Ndi kal laa gẽẽge po de grumgi gesiŋ gana :

¹⁷ Mopo maga huu joŋ mbe yaŋ keɗed pel Baa yawla? Je táabay joŋ mbe yaŋ bay ɗag pel je maga joŋn mo yawla?

¹⁸ Hayga Baa bay de kaŋ ɗiggi ti weere jõõre ɓen wo wa yaw, day daʼ bà mo ma bay ngar see jar peele ɓen wo yaw,

¹⁹ Jar maga nà wo ɓil tiŋ pãy ga à joŋ ra diŋ de ɓurgi siri, day à ndreɗ ra go doo tenɗe no mono, sen bà wo này pa so yawla!

²⁰ Tĩĩ de jag toŋ hãã wo go de law, re mbe tum de caa rage. A huɗ wo mbaara go nà ma tum, ama jobo bay ɗiggi ti sen mo taʼ wa hase.

²¹ À ndar jag kor ɓaaran go, day saara huɗ go bay ko re.