JOB 39 - Tupuri Bible

¹ Ndo yaŋ de ko wur maga fǐiri ma ti húulì biŋ wo mo yawla? Meene biŋ wo biŋgi la ndo yaŋ de koge ɓe yawla?

² Ndo yaŋ de kee few ɓiili ɓaara noga ndo yaŋ de ko wur biŋgi ɓaara yawla?

³ A gay wo doo twẽɗge, biŋ wo weere ɓaaran wo go day laa wo ɓil go.

⁴ Weere ɓaara coɓ wo go, gẽẽ wo mbaara tiʼ tuu. A maŋ wo ɓil wo go see maare ɓaaran wo, day fer wo le see ɓaara gà so.

⁵ Wose ɓoʼ gerhẽẽ ma yooway go ti see ɓe caw mo la? Wose pog dala go ne hẽn ɓaale mo la?

⁶ Ndi hay hã ful ne hẽn doo tiŋ ɓe nono, hã laale ne hẽn diŋ ngel naw ɓe.

⁷ Ngarge jag ma ɓi leege bay maŋ see ɓe wa. Carge põõ je ma wer pus durgin laa sug ɓe leege.

⁸ A raŋ ti húulì wo ma kiɗ hõõ ɓe no, a go caw kiɗ hõõ depãy.

⁹ Cày ɗig mbe yaŋ ga se mo hay go nen doo ɓo yawla? Ngel naw ɓe nà ti jeŋ gwoŋ piir ɓon yawla?

¹⁰ Ndo baa mbo cày yaŋ jag saale ga á mo paɗ ngel ne ndo yawla? Ndo ɗaw mbo pel ɓe yaŋ maga á mo kog soŋ le wer ɓe ma woge ɓil log wo yawla?

¹¹ Ndo kaŋ mbo ɗiggi ɓo yaŋ ti ɓe wer maga egre ɓe debaŋ mo yawla? Ndo kaŋ mbo nen joŋre ɓon wo yaŋ ti ɓe yawla?

¹² Ndo kaŋ mbo ɗiggi yaŋ ti cày ma hoo fẽẽre jeege ɓon wo le liŋ de ɓe noga ma tay ti fẽẽre ɓon wo go ɓi yaage yawla?

¹³ Gii mbeɗ graŋ ɓe go de fruygi, ndo daʼn ndo ga diŋ tãy sasiya.

¹⁴ Ane de maga á tob pããre ɓen mbaara wo go gesiŋ lage, day men ra mbe wo go gesiŋ lag leʼ wùu nen ceg mono,

¹⁵ Ti ɓe yõõ go ti maga ɓaale jobo day la mbug ra go, noga này ma yoofíi po kaŋ ɓaale go ne hẽn ti mono.

¹⁶ Á ko weere ɓen wo nen gà doo ga á bay wo diŋ ma se wa nono. A ɗig ti ga á hay gay wo se gà.

¹⁷ Werga, Baa bay de hã koge re ne hẽn wa, á bay de hã ti ne hẽn doo kããran wa.

¹⁸ De maga á bud see go, day leʼ ɗee mono, piir wo de je yaʼge ɓen maŋ wo mopo see ɓe gà.

¹⁹ Hã egre ne piir nà diŋ ndo noga hee bulgum ma ɗee leege ne hẽn soole nà diŋ ndo yawla?

²⁰ Joŋ nen maga á mo yor doo matihoŋ nono diŋ ndo yawla? Bũygi ɓen tawa caa hẽẽne jar go.

²¹ A yor go ne log ma kleere wo ti, day ɓil ɓe go feh ti egre ma ɓil ɓe no. Á ɗee mbe wo ne fẽẽre durgi wo ti hãy koɗe.

²² Re hẽẽne po bay see ɓe wa, á caa hẽẽne go doo mopo gà lay, day se dag go de wer doo hẽẽne moslam gà lay.

²³ Waa fũy wo le ɓil hùl kemay kemay see ɓe, jaw wo de manjaw car wo wùu ne hẽn ti.

²⁴ De sen ɓuy se gjig gjigi doo egre go ciŋ ga caw. A laa roo cõõ we no, see ɓe da ngel gà so.

²⁵ De maga cõõ ra we no, se leʼ mbe bũygi tuu, maŋ hũy ɓe wo ciŋ ma fõõ ngel jaw no, ma laa gẽẽge waŋre ma car põõ ne kããran wo de war jawn wo no.

²⁶ Hã ti ne tikõõge ga á mo uri, noga mo blar graŋ ɓe wo go, day mo raw wo nen ciŋ nà diŋ ndo yawla?

²⁷ Hã jag ne ʼwǔr ga á mo ur wo go ciŋ hãã day mo kaŋ tiŋ ɓen wo go ciŋ hãã nà diŋ ndo yawla?

²⁸ Á le go de tiŋ nà yoo húulì wo, nà go ti cõõ húulì ma doo kor ma de egre kiŋkiŋ nono.

²⁹ A beg này ɓen le nà ni yeʼe, nen ɓe kon nà le ni hãã tuu.

³⁰ Weere ɓe jo wo cíi fẽẽre, day ti ngel maga fẽẽre ma de húulìn wo ni mo ɓuy, ndo daʼn nà ni.