JOB 38 - Tupuri Bible

MANWUR YIŊ JAG NE JOBE Yiŋgi jag ɓe ma taŋgu no

¹ Manwur raw fer wããre nen degurleege ne Jobe, day ga :

² Sen diŋ wose sen ga ɓod suŋgu ne joŋre ɓi maga ndi go de ɓod faage ɓaara nen de wããre ma bay ngar wo mo la?

³ Saʼ sag ɓo de mblaaga doo jobo maga twar nono. Ndi wiɗ gi jag ɓo, ni ndo kaŋ nen ɓi ti ɓin so.

⁴ De maga ndi de ɓoʼ wer tamsir mono, ndo hay genla? Wããn ne ndi so, hayga ndo yaŋ de ti ngel ma koge ɓe no.

⁵ Wose hay riŋ ga ngaɓge ɓe mo hay no kay no kay mo la, ndo yaŋ de koge ɓe yawla? Wose hay ɗaw saale ma ngaɓge ɓen mo la?

⁶ Á de ɓoʼ wer nà ciŋ ti mayse la? Wose hay ɓoʼ húulì ma ti cõõ ɓen gesiŋ

⁷ De maga gér ma de jag toŋ wo go ti siŋ blum po po deŋ, day jar ni Baa wo go deŋ ʼwad war fruygi lay mo la?

⁸ Wose hay dig jag maarog de maga á hay ur le, men ngel suuli ɓen le go mo la?

⁹ De maga ndi hay hee swaare ne hẽn ti doo õõbe nono, saʼ suŋgu ne hẽn wer doo farda nono,

¹⁰ De maga ndi ɓod faage wããre ɓin wo go ne hẽne, ndi hee manyãã ne hẽn jage, day ndi mbar jag tiŋ wo go ne hẽn ti mono,

¹¹ De maga ndi hay riŋn ga á taw la, á cegaɗ go ne ngel sen ti gà egre kaŋngaw ɓen taw wo mo taʼ la mono, wose hay joŋ we no la?

¹² Hãã le ti wur maga ndo ti tamsir mono, ndo hay wii ngel we ga á mo tee go yawla? Ndo kaŋ nen waa we ti naage ɓe le go.

¹³ Maga á mo ler ngel go ne tamsir ti, day mo gas jar ma joŋ re de suŋ wo go mo yawla?

¹⁴ De maga ngel tee go mono, fẽẽre ɓuy kol wo go doo pãy booge maga à kaŋ kase go ti ɓe nono, mayse la ɓuy ko go de woore kaʼ kaʼ doo ga se de õõbe ti nono.

¹⁵ Ama jar ɓlaggen joŋ wo mbaara tum nen suŋgu, doo ɓaara maga far ciŋ mbar jar laa wo go gesiŋ lay.

¹⁶ Ndo hay wo we le go gesiŋ wer maarog wo ko kããge maga á law wo le ni mo yawla?

¹⁷ À hay kaŋ nen ɓo we go ti jag tiŋ mani húulín yawla? Ndo hay ko jag faage sir mani jar húulín wo we yawla?

¹⁸ Ndo yaŋ de ko kluu tamsir yawla? Wãã ne ndi so, hayga ndo yaŋ go de ko fẽẽren ɓuy mono.

¹⁹ Faage maga leʼ wo liŋ ni poɗag nà genla? Suŋgu wo le de tay ti nà gen.

²⁰ Maga ndo daʼ wer go ne haagu ɓaara, noga ndo daʼ wer go ne faage maga wo wo ti ngel naw ɓaara mo so la?

²¹ Ndo go de koge ɓuy go taŋgu maga ndo bay biŋgi, day kiŋgi ɓo go pur de daŋ sen yaw so mono!

²² Ndo wo we le go ti ngel maga gedembar le de tayge ni kaʼ mo yawla? Ndo yaŋ de ko ngel maga húulì-baa ma laage wo le de tayge ni mo yawla?

²³ Ndi coʼ ra go kaʼ ma gor wur ɓaara, ma gor wur jaw wo de durgi no.

²⁴ Ndo yaŋ de ko faage maga poɗag a le ni wo de faage maga leege ma nen wur botoŋ naa le ni ma age ti tamsir mo yawla?

²⁵ Wose ɓoʼ blam le ne baabis wo, day bul faage le ne sagge Baa wo de carge põõ Baa.

²⁶ Maga á mo ra wo baa go ti ngel maga jar téebeere bay wo ni wa, go ti puuli maga jobo bay ni boŋ wa,

²⁷ Day mo taŋ ngel maga go de heeg bay bii day fǐi mo tĩĩ ni mo la?

²⁸ Baa maga ra mono, pan ɓe yaŋ yawla? Wose joŋ nen maga meebe mo leʼ mo la?

²⁹ Bii maga ɗee boo go mono, á kal le go ɓil mayse la? Húulì Baa maga laa le ciŋ mono, wose joŋn la?

³⁰ De maga ceere naa mono, bii ɗee boo go doo húulì nono, day ti bii ma kluu see go see kẽẽ kĩg tuu lay.

³¹ Ndo yaŋ de kããge ma ɗaw gojog wo see kããra noga ma dus ɓil gér jar freŋ wo go yawla?

³² Joŋ ga fẽẽre maga kol wo ciŋ mo ɓuy mo kol wo ciŋ nà diŋ ndo yaw, noga see de gér ma kluun wo de ma kleere ma ti ɓen wo nà diŋ ndo yawla?

³³ Ndo yaŋ de ko jag liŋgi ma nen ngel ma ciŋn wo noga joŋ ga tamsir mo see no kay no kay nà diŋ ndo yawla?

³⁴ Gẽẽge ɓo day yaŋ wo go ciŋ see swaare wo nen maga baa mo ra le mo ti yawla?

³⁵ Ɓod faage wo ne sagge Baa maga á mo car wo wùu jag nà diŋ ndo yawla? Á yaŋ wo wiɗ ndo ga : Wùr mo lag pel ɓo la no yawla?

³⁶ Wose hã koge re le ne jar ɓili, noga hã ti ne jar le ti ɗiggi ɓaara mo la?

³⁷ Wose yaŋ de ko re ga kãã yaŋ ma kee swaare wo go, day jel jag cããge ma ciŋ wo yaŋ le go gesiŋ.

³⁸ Nen maga beɗef mo cãã go, day sir ma de was nen mo fer wo go neɗge see kããra mo la?

Wãã re nàyre wo diŋ ndi Baa

³⁹ Bag này ne man mingir nà diŋ ndo yaw, noga ii koŋne weere mingir wo go nà diŋ ndo.

⁴⁰ De maga á wo de hulgi le ɓi tuu ɓaara, day wo de yoŋre yoo lir wo doo ga saara ti ngel naw ɓaara wo no mo yawla?

⁴¹ Wose ʼwũy rege gawla go ne hẽn de maga weere ɓen ra wo wo ne Baa ti day wo go de halge deŋ doo coo rege mo la?